《各各他e5目屎--苦難得安慰》

 | | | 轉寄

十字架kám是教會ê商標？

作者 紀福讚 2006.01.01

「我奉獻****錢！」一聲一聲teh喝。福音電視節目傳來一陣氣氛熱烈、hō͘人感動ê聖歌kap畫面。

「Praise the Lord ! Praise the Lord!」電視佈道家史華格不斷對會眾奉獻ê聲teh喝。

這是為電視佈道家史華格復出ê特別聚會。「奉獻金額愈濟，祝福愈大」？Siōng無「Pho̍k á聲」mā會khah濟。

今á日，真濟虔誠ê基督徒teh問，基督教ê十字架káⁿ是已經成做教會組織、電視佈道家ê商標？伊ê象徵無koh是「神ê受苦，邀請人參與伊ê受苦，來hō͘家己kap別人得tio̍h祝福」，反轉是teh賣「祝福kap虛名」ê記號。

電視佈道家修勒ê「神能時間」（Hour of Power)不斷拍出ê奉獻廣告，每年奉獻600箍，你會得tio̍h一隻雕刻ê老鷹。伊ê廣告電話是「1－800－94－USoar(飛翔）」，廣告ê內容是：你若參與奉獻，是有份tī神能時間，你ê九四年ê生活會親像以賽亞40：34所講ê「若鷹鳥展翅飛高，走bē siān，行bē厭」。

台灣社會受資本主義影響ê結果，真濟宗教傳教ê方式，也是靠廣告提昇家己ê知名度、形象，m̄是靠「仁義」來介紹信仰ê本質。親像siōng hō͘台灣人肯定ê慈濟功德會最近teh賣證嚴法師ê像，一張幾十萬。基督教mā kāng 款，有一位稱做青年佈道家ê，家己出錢借一間三千人ê禮拜堂，電視、報紙廣告，結果有三百個親人朋友來參加，拍做一支真súi ê廣告片，寄去台灣推銷家己，結果推銷成功。將現場拍做廣告，koh推銷轉來美國，ánni，將家己「鍍金身」，竟然也成功，但是尾á soah鬧出「參加佈道會，送金十字架」ê笑話。這是傳福音「歹見證」ê模式－－「做廣告」代替「生活ê見證」，十字架變成商標，上帝成做產品，m̄是敬拜ê對象。

Tī耶穌ê時代，也有真濟人來跟隨耶穌，但是目的是beh看表演、看神蹟、高舉耶穌，家己坐大位。親像今á日ê教會，奉耶穌ê名，鬥爭看bē順眼ê對敵；高舉耶穌ê結果，是家己名利全收；結果為tio̍h beh討觀眾ê歡喜，不得不出賣耶穌，將十字架鍍金，hō͘人只看tio̍h十字架ê光彩，忽略十字架受苦ê意義；kantaⁿ看十字架ê「復活」，忽略十字架ê「受死」。這是宗教ê騙術，變質beh出賣耶穌，得tio̍h群眾，喪失上帝。但耶穌ê作法tútú相反，為tio̍h beh順服上帝，soah來hō͘群眾棄絕。

今á日台灣歸個環境ê變遷，政治人物根本失去受苦ê自覺，反轉只有kap利益相結連來壯大家己ê勢力；教會也kāng款，成做中產階級ê代表，真少參與tī社會弱勢者ê受苦，無穿散赤ê外衫，穿上分享權利ê禮服；為tio̍h beh hō͘消費者滿意，只好將十字架鍍金。這種「金權」ê文化，不但充滿tī政治kap選舉，也充分污染tio̍h基督教ê福音。鍍金身、拜金牛，這是自古早就不斷teh變形ê宗教現象，tī今á日，台灣教會也bē當避免金權ê污染？

十字架kám是教會ê商標？