《Hūiphêng ê 古坑咖啡》

 | | | 轉寄

Lāupē 80 hòe chioksiū kámgiân 老爸80歲祝壽感言

作者 Chng Hūiphêng 2021.01.10





Goán pa.a, chhutsì tī Hûnlîm koān Kó͘kheⁿ Lûn'á, kehpiah chng ū Môahn̂g, hūkīn ê chngsiā, ē tàng ēng goán sèhàn chi̍t siú liāmiâu"Làm'á lám chabó͘, Lûn'á lûn chhiakó͘, Kó͘kheⁿ kòng kó͘, Chúitùi chhōabó͘ " lâi hêngiông. Goán kong.a, goán pâ.a, lóng sī tōakiáⁿ. Chhutsì hitchūn sī Ji̍tpún sîtāi, m̄ koh tha̍kchheh ê sî íkeng sī Kokbîntóng thóngtī, tī chng.ni̍h in hit iân.ê, lóng sī ēng Ji̍tpún miâ teh chhengho͘, he sī in se̍ksāi ê miâjī, goán kacho̍k line ê thoânmiâ mā sī chioh i ê Ji̍tpún miâ 武彥(HIKHO).

Goán lāupē sī chòsitlâng, i sinchâi sûijiân sánthio, m̄ koh khangkhòe ē chò, khachhiú liúlia̍h, 10 kúi hòe chiū chò tōalâng khangkhòe, tī in hit iân.ê, tāike oló, khòaⁿ i siàuliân tī Kimmn̂g chòpeng ê siòngphìⁿ, mā sī iântâu'ásàng.

I chia̍hpn̄g ê sî, m̄ bat thiaⁿ i oànthàn bô chhài á sī pn̄g siuⁿ lia̍p, phòe chhài ū kàu séng; i ài chia̍h háisán, iûkîsī chhiⁿ ê chîm'á, hî'á, chhoe.e, chú thng.e siōng ha̍h i ê bī, khòaⁿ i teh chhńg, he m̄ chai ū jōa hóchia̍h leh.

Góa tùi i siōng chá ê ìnsiōng sī sèhàn ê sî, tī kongthiaⁿ phâng bīntháng chúi, chē tī hō͘tēng kā góa sé sengkhu, tha̍k koksió ê sî, goán chng.ni̍h tng teh sîkiâⁿ chèng siôngjiông, goán tau mā khí 2, 3 tòng siôngjiôngliâu (cháchêng sī ēng tekkóng chò kè'á, sokkapò͘ chò piah, gōakhak khàm kamchià ha̍h, lāité ū 2 lêng, chi̍t lêng ū 3, 4 chàn ê siôngjiông pêⁿ, pêⁿ lāité ū tiūchháu pûi, khúnsi, téngbīn khàm thô͘）.

Chèng siôngjiông ê khangkhòe ū kàu chē, chhiūⁿkóng sio chēngkhì 2 mê 2 ji̍t; au tiūchháu pûi, tiūchháu pûi sī kā tiūchháu chián hō͘ té, akchúi, iā pûiliāu (jiōsò͘ kah kòechio̍h'á ..) , péng 6, 7 piàn, chiah ēng bi̍t'ánâ té khì pho͘ siôngjiông pêⁿ; thai chhânthô͘ ê khangkhòe, góa mā chò ū tio̍h, chē tī thai'á ê piⁿa kā chhânthō͘ thai hō͘ sè lia̍p koh iā chio̍hhoe satkhún, chiah ēng pùnki té khì khàm siôngjiông pêⁿ.

Siôngjiông tōa châng, pòaⁿmê tio̍h khíchhn̂g, chhiat siôngjiông, bē siôngjiông kha ( ē tàng bē chîⁿ chò sìsiù'á ) , cháikhí chiū ū senglílâng chài óaⁿkóe kah pau'á bánthô lâi bē, lâng he óaⁿkóe khiūtehteh, téngbīn ū chham chhàipó͘ ,nā chham soànjiông tāuiû, chia̍h khí.lâi ū kàu hó chubī; pau'á kah bánthô, nā chham hiam tāuiû, mā sī ū kàu chán, hitchūn chhùlāi tohténg ê chhài, sùsiông lóng sī siôngjiông liāulí, m̄ sī siôngjiông khan keⁿ, bô tio̍hsī siôngjiông chhá hôliântāu, kiuⁿsi môaiû chhá siôngjiông.

Koh lâi chiūsī siókang tng chē ê sî, In 4, 5 tiám khì bôêng chhân ê khang khòe, tńglâi chia̍h cháikhí, chia̍h soah, koh kóaⁿ khì chò siókang; chò siókang nā khah chá tńglâi, tio̍h koh khì chhân.ni̍h, bôêng kah àmbînbong, chiah kam tńglâi chhù.

I kah goán bú'á bômêbôji̍t ūi chit ê ke teh phahpiàⁿ lúichek, chiah tī góa kotiong ê sî, kā goán tau ê thô͘piahchhù hoan khí lâu'áchhù, koh ū hak kúi nā tè chhân

Khah chá ê i, tûliáu hunsàu ígoā, sán bóng sán, m̄ koh iáu ná gû hiahnih ióng, 10 kúi nî chêng hit pái ê chhiúsu̍t, chiah hoatkak i ê sinthé íkeng phahchiat, káihun khiūⁿchhùi bô koh chia̍h pinnn̂g, úisūpih, pótiâu sèⁿmiā, chit kúi nî siū tio̍h COPD hìpēⁿ ê chekbôa, hō͘ i koh khah sán, khòaⁿ tī sīsè ê goán, si̍tchāi chin m̄ kam, m̄ koh chòekīn khòaⁿ i sinthé chiāmchiām ióngkiāⁿ, chin thè i hoaⁿhí.

Kámsiā i kah goán bú.á, chhiâⁿ ióng goán tōahàn, hō͘ goán o̍h tio̍h khûnkhiām phahpiàⁿ, khata̍hsi̍ttē, biánkiaⁿ bōe chhutthâuthiⁿ.


阮爸.a，出世tī雲林縣古坑崙仔，隔壁庄有麻園，附近个庄社，會當用阮細漢一首念謠「湳仔攬查某，崙仔輪車鼓，古坑摃鼓，水碓娶某」來形容。阮公.a，阮爸.a，lóng是大囝。出世彼陣是日本時代，m̄ koh 讀冊个時已經是國民黨統治，tī 庄裡in彼沿.ê，攏是用日本名teh稱呼，he是in熟似个名字，阮家族line 个團名mā是借伊ê日本名武彥(HIKHO).

阮老爸是做穡人， 伊身材雖然瘦thio，m̄ koh khangkhòe會做，跤手liúlia̍h，10幾歲就做大人khangkhòe，tī in彼沿.ê， 大家oló，看伊少年tī金門做兵个相片，mā是緣投sàng。

伊食飯个時，m̄ bat 聽伊怨嘆無菜抑是飯siuⁿ灄(lia̍p)，配菜有夠省；伊愛食海產，尤其是鮮ê蟳仔，魚仔，炊.e，煮湯.e上ha̍h伊个味，看伊teh 吮(chhńg)，he毋知有偌好食咧.

我對伊上早个印象是細漢个時，tī公廳phâng面桶水， 坐tī戶碇kā我洗身軀，讀國小个時，阮庄裡當teh時行種松茸，阮tau mā 起2，3棟松茸寮（早前是用竹管做架仔，塑膠布做壁，外殼khàm甘蔗ha̍h ，內底有2 lêng，一lêng 有3，4層个松茸pêⁿ，pêⁿ內底有稻草肥，菌絲，頂面崁塗）.

種松茸个工課有夠濟，像講燒淨氣2暝2日；嘔稻草肥，稻草肥是kā 稻草剪互短，沃水，掖肥料（尿素kah過石仔..），péng 6，7遍，才用篾仔籃té去舖松茸棚；篩田土ê 工課，我mā 做有著，坐tī 篩仔ê邊仔kā田土篩hō͘細粒koh掖石灰殺菌，才用糞箕té去崁松茸棚.

松茸大欉，半暝著起床，切松茸，賣松茸腳（會當賣錢做四秀仔），早起就有生理人載碗粿kah包仔饅頭來賣，人he碗粿khiūtehteh ，頂面有摻菜脯若chham蒜頭豆油，食起來有夠好滋味；包仔chham饅頭，若chham hiam豆油，mā是有夠讚，hit陣厝內桌頂个菜，四常攏是松茸料理，毋是松茸牽羹，無著是松茸炒荷蘭豆，薑絲麻油炒松茸.

閣來就是小工當chē个時，In 4，5 點去無閒田个工課，轉來食chái起，食soah，koh趕去做小工；做小工nā 較早轉來，著koh去田裡，無閒kah暗眠摸，chiah甘轉來厝.

伊kah阮母仔無暝無日為這个家teh phah拚累積，chiah tī我高中个時，kā 阮兜个塗壁厝翻起樓仔厝，koh 有hak幾若tè田

較早个伊，除了薰嗽以外，瘦罔瘦，m̄ koh 猶若牛hiahnih 勇，10幾年前彼pái个手術，chiah 發覺伊个身體已經拍折，改薰khiūⁿ喙無閣食檳榔，維士比，保牢性命，這幾年受著COPD肺部个折磨，予伊閣較瘦，看佇序細个阮，實在真m̄甘，m̄ koh最近看伊身體漸漸勇健，真替伊歡喜.

感謝伊kah阮母仔，晟養玩大漢，予阮學著勤儉拍拚，跤踏實地，免驚bōe出頭天.