《宋澤萊新著《天路拾穗》台譯版》

 | | | 轉寄

第二部：聖靈灌AK_主題17：談講方言（靈語）時ê兩種狀況

作者 宋澤萊 2026.06.28




第二部 聖靈ê灌ak

主題17：談講方言（靈語）時ê兩種狀況

Hit工去到教會，有朋友問我講方言hit當時身心是m̄是ētàng kakī控制ê問題，我ê回答tī下面：

講方言kah普通ê語言無仝ê所在是：嘴舌捲動，tī嘴舌非常快速ê運動中tùi嚨喉kah嘴腔所講出來ê一種語言。咱一般所講ê語言，嘴舌bē有chiahni̍h快速ê運動。

講tio̍h咱講方言ê自我控制狀況大概thang分做兩種：

一種是咱平常時講方言ê狀況：也to̍h是tī咱ê意願下kha所做ê方言祈禱。比論講chitmá我想beh講方言，我to̍h ētàng自主kā方言講出來，我mā ētàng自主停止講方言；也to̍h是講有beh講方言，我lóng ētàng照kakī ê意思，收放自由自在。Chitê意思ná親像是講我願意暫時kā嘴舌借hō͘聖靈，hō͘聖靈使用，過時間了後，我to̍h收tńg來。Chit種方言祈禱是真平常ê，ná親像咱日常生活ê講話。

另外一个種是真自然自主ê狀況：也to̍h是講nā聖靈忽然降臨，kā你ânân包裹tī聖靈裡，chit時你ê嘴舌、嚨喉、嘴腔失去自主性，你kantaⁿ ētàng一直講方言，直到聖靈停止作用，你chiah ētàng停止講方言。Chit種狀況ná親像你ê嘴舌、嚨喉、嘴腔lóng被聖靈徵收，開始講方言á是停止講方言lóng tio̍h看聖靈ê意思。Chit種狀況比較khah少發生，m̄koh bētàng講bē發生！

講方言（靈語）是聖靈tī咱ê靈裡所發動ê一種語言動作，祂激動咱ê靈，hō͘ 咱講出方言，了後kā語言chhōa到上主ê面前（註1），直接對上主說明，語言內面有各種奧祕；mā是聖靈beh理解真實ê你ê需要，對上主盡量講出ê種種祈禱，講tio̍h是啥物內容，除非有翻譯方言ê恩賜ê人，咱本身是無法度理解ê，也to̍h是講咱ê悟性（理解力）是無能為力ê，he純粹是聖靈ê意思，所以講內面lóng是奧祕。（註2）

當咱講方言ê時，m̄管是借嘴舌hō͘聖靈á是hō͘聖靈強徵嘴舌，因為背後lóng有聖靈ê活動，所以是咱kah聖靈tàu陣做伙（同在）ê機會，應該好好á把握，因為無講方言ê時，聖靈to̍h離開咱à。

我往往看tio̍h真chē已經ē曉講方言ê人，卻無koh繼續講方言，in寧可去聽聖歌á是唱聖歌，掠準kantaⁿ有聽聖歌á是唱聖歌ê時á是大聲hoah ê時，聖靈to̍h ē kah伊同在；卻m̄知她á是伊本人講方言ê時，聖靈chiah koh khah真實kah伊同在，實在是非常可惜！

所以講：hō͘ 咱講方言lah！它ētàng hō͘你ê信心大大增加，靈魂giám硬，產生靈知，發生種種ê神跡，hō͘咱快樂ê tāichì ná ē boāi做leh？

註1：〈羅馬書〉8：26~27：「何況咱ê軟chiáⁿ有聖靈幫贊，咱本來m̄知tio̍h怎樣祈禱，只是聖靈親身用講bē出來ê吐氣替咱祈禱。鑒察人ê心，知影聖靈ê意思，因為聖靈是照上主ê旨意替聖徒祈求。」

註2：〈哥林多前書〉14：14：「我若用方言祈禱，是我ê靈teh祈禱，m̄koh我ê悟性無效果。」；〈哥林多前書〉14：2：「He講方言ê，原來m̄是對人講，是對上主講，因為無人聽ē出來。M̄koh，tī伊ê心靈裡卻是teh講各種ê奧秘。」

──2023、1、16 tī鹿港