《宋澤萊新著《天路拾穗》台譯版》

 | | | 轉寄

第二部：聖靈灌AK_26【題目】上主kám有管總統一家人ê tāichì？

作者 宋澤萊 2026.08.30






26【題目】上主kám有管總統一家人ê tāichì？


聖靈帶來ê異夢是不可思議ê。Tī所有我ê異夢中，chit pái又koh是不可思議中ê一pái。

異夢發生tī 2004年底立法委員選舉ê 時。

當時，王世勛兄、陳仁宗牧師kah成德夫婦猶原tiāⁿtiāⁿ來阮tau聚會。M̄koh，因為世勛兄參選台中ê立委選舉，hō͘阮ê聚會koh khah常常講tio̍h政治問題，我想異夢to̍h是ánne發生。

我夢見總統夫人吳淑珍ê墓á埔。

夢中，我無看tio̍h大地á是天裡ê背景，kantaⁿ看tio̍h一座美麗ê銀製墓á埔。

Hitê墓á埔是傳統ê台灣墓á埔，m̄是真闊ê巨家豪族廣大ê墓á埔，只是中型ê；雖然講是中型ê，m̄koh世間koh khah án怎都無hiahni̍h美麗ê墓á埔à。

我kahná是tī略á koân ê空中看落去。Kui个墓á埔差不多有一个人ê koân度，除了khah koân ê主墓牌以外，兩pêng iáu有小護龍，iáu有bē細ê墓埕。

我看bē tio̍h墓頂面有青草á是花木之類ê物件，kui个墓á埔非常豪貴，雕飾玲瓏，全部lóng是白銀phah做，銀光閃sih。Tī相當光iàⁿiàⁿ ê日頭光﹝kiámchhái m̄是日頭光﹞下kha， hiáⁿ目光輝。

我看tio̍h一个人ê kha脊phiaⁿ，m̄koh看bē出伊是啥人，kahná是piàⁿ掃墓埕ê人，伊真緊to̍h行離開墓埕。Chit時，墓á埔kah墓埕lóng清氣tamtam，無沙無圾，thang看tio̍h整齊ê白銀刻花當teh閃閃發光。我kahná看了真久。

Siōng尾，我往主墓碑頂面看去，to̍h看見「吳淑珍」chit三个字。我chhoah一tiô，心內想講：「Aih，án怎ē ánne！無聽講吳淑珍已經過身a。」to̍h醒起來！

Chitê夢帶來我ê負擔，因為我無gōa理解聖靈是m̄是有暗示我需要kā chitê警告傳達出去。

Tī家庭聚會ê時，我to̍h提出來kah大家參詳。

我to̍h講，這m̄是一个好夢，上主當teh譴責總統夫人à。Hit座墓á埔tú teh表示：總統夫人只是一座美麗ê墓á埔，表面豪貴，m̄koh內在已經親像àu柴à。我koh khah嚴重講：「她是金銀ê外表，m̄koh內中已經敗壞ā！」

Chit時成德兄為tio̍h kā我安tah，提出另外一个解說，伊認為這是一个好夢，因為「銀」chitê物件tī基督教來講有時是teh指好ê tāichì，比論講「銀色ê聖誕」to̍h是好ê，應該是好消息。

M̄koh，成德兄ê講辭無法度hō͘ 我相信，因為假使是好事，一定ē顯示銀製ê寶座á是銀色ê冕旒之類ê物件，無可能是墓á埔。

當時，阿扁tú連任半年，政績jú來jú好，做chitê夢是真奇怪ê。M̄koh，報紙一再暴露吳淑珍kah意sńg股票，甚至kah一批官夫人去拚命買物件ê tāichì，to̍h hō͘ 我感覺iáu有比chitê koh khah嚴重ê tāichì teh beh發生。我認為，吳淑珍ê一kóa行為是無智慧ê，m̄是身為總統夫人應該做ê，上主一定已經teh譴責她à。

經過幾nā pái參詳，阮決定siōng好ētàng kā信息傳到總統hia。He究竟該án怎做leh？

第一个想tio̍h ê當然是總統身邊ê國策顧問，koh是基督徒，kantaⁿin比較khah 有機會勸總統，mā知影異夢是啥物。

經過一番ê詢問，我終其尾khà電話hō͘ 我無熟悉ê高俊明牧師。Ē記得來聽電話ê人是高俊明ê夫人。我kā她講：我是基督徒，做一个異夢，有關吳淑珍ê。我詳細kā她講chitê異夢ê內容，了後請高牧師向總統轉達，凡若吳淑珍ê股票lóng應該賣掉，就ánne m̄thang koh再bak tio̍h任何有關金錢ê tāichì，任何牽涉tio̍h金錢ê行為siōng好lóng終止，而且siōng好來信基督教，因為上主當teh譴責她。高牧師夫人聽了，沉吟一chūn’á，表示為難，她講chit項tāichì真無好講，m̄koh她ē轉達hō͘高牧師知影。

當時，tùi高牧師夫人ê口氣中，我直覺感覺，高牧師傳達chitê信息ê可能性無大。

我隨時koh chhōe好朋友作家李喬先生，伊mā是基督徒，同時mā是國策顧問中ê一个。

李喬先生ê態度比較khah積極，伊隨時kah一kóa教友講起chit項tāichì。伊講tī基督徒中，有真chē人lóng teh煩惱chit項tāichì，可能有chit種異夢ê人mā bē kantaⁿ有我一个，的確是真chē人已經發出警訊à。M̄koh伊講，伊只是一个國策顧問，有關總統ê家務事，伊無確定kám ētàng當面kah總統談，伊mā表示為難。

Tùi伊ê講話內底，我mā感覺真oh透過伊來傳達chit項tāichì。

Siōng尾ê ǹg望是世勛兄，ǹg望伊有機會向阿扁談chit項tāichì。後來，tī激烈ê競選中，阿扁總統來探望世勛兄ê選情，世勛兄hō͘阿扁一本《聖經》，m̄koh mā無法度傳達chit件有關吳淑珍ê tāichì。

Chitê信息ê傳達siōng尾以準soah去á來收場。

2006年底，紅衫軍之禍爆發，阿扁受tio̍h嚴重ê攻擊；任期結束了後，金錢ê tāichì完全現光，扁家聲望跋落深坑，kui个總統家族差不多lóng tio̍h破碎à，綠營差不多陷落到地獄ê邊緣！

Tùi chit个異夢，阮to̍h知影，上主kám知影總統kah總統一家人ê tāichì？答案是：完全知影！而且知影kah真徹底！上主kám ē管總統kah總統一家人ê tāichì？答案是：ē管！而且是管kah真ân！

M̄koh，爲啥物上主放縱chit款tāichìê發生？爲啥物m̄親身制止吳淑珍ê行為？

這是因為她m̄是基督徒，制止她mā無一定ē聽。同時，上主許可一kóa人ê犯罪有祂掩蓋ê目的，chitê目的是暫時掩蓋，m̄koh總有一工ē完全顯明！

我tiāⁿtiāⁿ欣羨一kóa ētàng kah上主當面講話ê人，in ētàng用聽覺tiāⁿtiāⁿ聽tio̍h上主指示ê話語，終其尾變成基督教ê先知。我to̍h bētàng，kantaⁿ ētàng偶然有一个異夢，而且kā它珍惜，感覺無比ê驚疑。

我chitmá iáu是經常懷疑《舊約》內底hit kóa傳達上主旨意hō͘以色列諸王ê先知，ná親像以利亞hit kóa人，感覺in是虛構ê人物，因為in太神祕，竟然ētàng靠tio̍h上主ê指示，tiāⁿtiāⁿ看破諸王iapthiap ê tāichì，而且提出警告。我感覺hit kóa kiámchhái是《舊約》作者所編造ê故事，只是一款後知之明ê烏白書寫而已。

M̄koh，對照我唯一ê一兩个異夢來看，koh無gōa敢確定講《舊約》先知ê本領是虛構ê！

──2010、07、10貼tī《基督教通訊》

附錄：〈2023、07、20王世勛立委tī面冊對chit項tāichì所寫ê回憶〉

今á日早起tī市川車頭ê樓梯間寫kóa關係台灣文學家宋澤萊老師ê預言故事，因為當時腹肚無gōa爽快，寫ê內容m̄是真理想，有幾分趕工ê感覺，m̄koh因為tio̍h處理腹肚無爽快ê感覺，就chhìnchhìnchháichhái：

Tńg來chabó͘ kiáⁿ須和田ê厝裡，睏一睏起來，雄雄想tio̍h 2004年底，宋澤萊老師kā我講tio̍h伊夢見阿扁總統ê夫人ê一个異夢（基督徒看tio̍h上主講話ê景象），to̍h感覺振奮（大tio̍h驚kah神經不安ê感覺）無停！

2004年間，阿扁總統已經順利連任，我mā因為阿扁總統大力助選koh tńg來立法院。競選期間，宋澤萊老師kā我講，伊看tio̍h上主ê異夢，是總統夫人吳淑珍，ē因為為金錢ê問題，招來災難（異夢內面是一个大銀鑄有刻夫人姓名ê閃閃發光ê墓á埔，親像《聖經》內面講ê，基督徒kakī ētàng隨時真清楚解讀異夢ê意涵（上主tī異夢內底隱藏ê旨意）！

宋澤萊老師因為ánne透過各種各樣 ê管道，希望ētàng阻止chit場總統夫人關係錢財ê災難發生，m̄koh sa無寮á門，siōng尾我只好勉強kā阿扁總統傳達「悔改信主避災」ê信息，可能是因為我吞吞吐吐講bē清楚，阿扁總統kah夫人，並無因為ánne有受洗歸主來免災厄ê影跡！

三年gōa以後，銀色風暴打擊了已經卸任ê阿扁總統kah夫人一家人，民進黨mā陷落去到taⁿ無人有ê風暴中，若是無蔡英文ê出現，民進黨可能to̍h ē因為ánne行入歷史ê火灰中！