《宋澤萊新著《天路拾穗》TOJ/台灣字版》

 | | | 轉寄

Tē it pō͘ Chhenggī titkiù Chútê 5：Ēng "Sùtô͘ Sìnkeng" kiànli̍p lāu pō͘tiāⁿ ê sìngióng kinki

作者 Sòng Te̍klâi 2026.02.01

Tē it pō͘ Chhenggī titkiù
Chútê 5： Ēng "Sùtô͘ Sìnkeng" kiànli̍p lāu pō͘tiāⁿ ê sìngióng kinki

Lán óngóng hông mn̄g to̍h "ánchóaⁿ sìn?" ánne ê būntê, ūsî lán to̍h hông mn̄g kah bē hiáu hôetap, chi̍t sîkan kèngjiân m̄chai tio̍h ánchóaⁿ hôetap.

Chin chē ūmiâ ê thoântō lâng tōatosò͘ tùi "sìn" chit hāng tāichì lóng chháṳōng būbū bô bêng ê thāitō͘, bē giàn bêngkhak piáusī. Inūi sìntô͘ ū khólêng sī inūi hò͘ⁿkî sim ê chhuipek chiah lâi sìn Kitokkàu; á sī inūi siū tio̍h hutjiânkan ê lêngkng siámsih lâi sìn Kitokkàu; á sī chhinba̍k khòaⁿ tio̍h pa̍tlâng ê sînjiah lâi sìn Kitokkàu; á sī inūi kakī ê pēⁿchèng hutjiân hō͘ Iésu i hó lâi sìn Kitokkàu …… téngténg, chóng kóng chi̍t kù to̍h sī gō͘hoecha̍psek. Tī chitê chōnghóng hā, nāsī hō͘ chho͘sìn chiá chi̍tê ngēsèng kuitēng, ánne to̍h kiámchhái ē kā hit ūi sìntô͘ heⁿh kiaⁿ tio̍h, soah bô ta̍t tio̍h lâu tiâu sìntô͘ ê bo̍ktek à.

Chiū ánne ū lâng to̍h kóng, "Sìn to̍h sī sìn SiōngChú." Á sī kóng, "Sìn to̍h sī sìn ‘sèngkeng’ " liáuāu to̍h kóng kah chin kónghoàn, huisiông būbū bô bêng. Chóng kóng chi̍t kù, kahná sī "sèngkeng" lāibīn kìlo̍k ê óngsū á sī sinlūn ê bûnjī lóng sio̍k tī "sìn" ê hoānûi. Chiū ánne, chi̍tsut'á to bôpiⁿ bô kîⁿ, chiū ánne hō͘ sìngióng ê lâng oânchoân thoatsòaⁿ khì à. Kîsi̍t, "sèngkeng" lāibīn ê bûnjī ū chi̍t tōapō͘hūn sī sio̍k tī "bāng" ê hoānûi; ū chi̍t tōapō͘hūn sī sio̍k tī "ài/thiàⁿ" ê hoānûi, bô ittēng to sio̍k tī "sìn" chit hāng tāichì. Bó͘ chi̍tkóa iáu bô ittēng sī sio̍k tī "Sìn Bōng Ài" chit saⁿê hoānûi, chísī ōesian jîí; sīmchì ū kóa sī Mô͘kúi ê o͘pe̍hkóng, nāsī bô piān sīhui, lóngchóng lóng sìn, he to̍h chhám loh. M̄koh, chi̍tê hūchek ê thoântōchiá bô engkai sìkè ēng phô͘tháⁿ sìntô͘ chò khóliōng; inūi chi̍t chióng bô kàu kiantēng tiāⁿtauh ê sìngióng, tī téchiām kîkan kiámchhái tùi Kitoktô énghióng bô tōa; m̄koh tn̂g sîkan íāu, kiámchhái ē tìsú i tī lêngmiā siōng bô hoattō͘ kengsin, kiámchhái sìn liáu cha̍p nî, jīcha̍p nî, iûgoân kah chho͘sìnchiá kângkhoán, chi̍tsut'á to bô sêngtióng.

"Sìn" chit hāng tāichì chiongkîbóe lóng sī teh kóng sī ētàng ōetēng chi̍tê hoānûi, sīmchì chòchiâⁿ chi̍t phiⁿ bûnchiuⁿ, inūi ánne Calvin chiah te̍kpia̍t kā sìnsim chhengchò tìsek. Phìjū kóng "thiàⁿ" chit hāng tāichì píkàu khah sio̍k tī lûnlí si̍tchiān ê hoānûi sī kângkhoán.

Goânlâi lán ê sìn sī ū ittēng lōeiông, m̄ sī chi̍tsut'á to bô tíchí ê sìn; mā m̄ sī lán siūⁿ beh sìn siáⁿmi̍h to̍h khì sìn, m̄ sìn siáⁿmi̍h to̍h m̄ sìn.

"Sìn" náisī chí ài lán itchài chimchiok, itchài jīntông, itchài khaktēng ê ìsù; iā to̍h sī kóng, lán tio̍h tī sìn ê lōeiông ta̍k kang tuimn̄g, ta̍k kang chhōekiû, ta̍k kang khaktēng. Ánne chiah ē ta̍k kang lóng ū chìnpō͘, goe̍hgoe̍h lóng ū chìnpō͘, nînî lóng ū chìnpō͘, chiongkîbóe ta̍tkàu bô giâugî ê tēpō͘, chit chióng sìn chiah sī chin sìn!

Ánne, kiùkèng chitê "sìn ê tìsek lōeiông" sī siáⁿmi̍h leh? Kántan lâi kóng, siōng tiōngiàu to̍h sī "Sùtô͘ Sìnkeng" lāité iúkoan Iésu hit pō͘hūn ê bûnjī, chitmá góa kā i chhausiá tī ēkha,

"Góa sìn Iésu Kitok, SiōngChú ê to̍kseⁿkiáⁿ, lán ê Chú; inūi Sènglêng tâuthai, tùi chāiseklí Mâlíah chhutsì; tī Púntiu Pília̍pto jīm lāi chogū chailān, pī tèng tī si̍pjīkè téng, síkhì, bâichòng; lo̍h imhú; tē saⁿ kang tùi sílâng tiong kohoa̍h; liáuāu chiūⁿthiⁿ, chē tī bûsó͘putlêng ê Pē SiōngChú ê chiàⁿpêng; chionglâi beh tùi hia kànglîm, símphòaⁿ oa̍hlâng kah sílâng."

Kā chit chi̍tkóa bûnjī khoktōa khuithiah, to̍h sī〈Sù Hokim Su〉ni̍h só͘ū Iésu ê kániàu kìlo̍k, náisī "sèngkeng" ê siōng he̍ksim pō͘hūn. Tī "Sìngī Chong sìntô͘ chhiú chheh" lāité kóng tio̍h, Sìngī Chong ū gō͘ hūn siōng tiōngiàu ê káikekka bûnhiàn, tiongkan chi̍t hūn to̍h sī〈Martin Luthur Sió Būntap〉,〈Sió Būntap〉ni̍h to̍h paukoat ū "Sùtô͘ Sìnkeng" ê káisoeh.（chù_1）Khókiàn Martin Luthur tùi "Sùtô͘ Sìnkeng" ê tiōngsī. Calvin siáchok i ê "Kitokkàu Iàugī " ê kèōe oânchoân hóngchiàu " Sùtô͘ Sìnkeng " ê kiatkò͘. "Sìnkeng" kìjiân pauhâm sì pō͘, to̍h sī, tē it lūn Pē SiōngChú; tē jī lūn sèng Kiáⁿ; tē saⁿ lūn Sènglêng; tē sì lūn kàuhōe, só͘í Calvin mā kā "Kitokkàu Iàugī " choânpō͘ hunchò sì koàn, thang hó kah "Sùtô͘ Sìnkeng" sio ho͘èng, khókiàn "Sùtô͘ Sìnkeng" tī Káikek Chong ê tiōngiàu sèng m̄ sī siókhóa.

Iûkî sī lāibīn ê Iésu pō͘hūn, koh khah sī lán ài te̍kpia̍t chù’ì ê, i náisī hō͘ lán ta̍k kang tuimn̄g, ta̍k kang sukhó, ta̍k kang khaksìn ê bûnjī, bētàng chi̍t kang oánlī i. Lí ittēng tio̍h chi̍t jī chi̍t kù khì khaksìn i, chúnkóng ū hoâigî, he to̍h bēsái.

Itpoaⁿ lâi kóng, tú sìnkàu ê lâng beh khaksìn chiahê bûnjī sī ū khùnlân, m̄koh tán kàu lí ū tu̍tphòa hit tiongkan ê bó͘ chi̍tkóa bô hoattō͘ khaksìn ê bûnkù, kiámchhái to̍h choânpō͘ thongta̍t à. Chêng chóngthóng Lí Tenghui bat kóng tio̍h i tú sìn Kitokkàu ê sî, to̍h bô hoattō͘ tu̍tphòa "inūi Sènglêng hoâithai, tùi chāiseklí Mâlíah chhutsì" chitê koankháu, soah thêng pō͘ put chêng, inūi beh sìn he si̍tchāi chin oh, m̄koh kàu siōng bóe, i chiongkîbóe ētàng sìn à, to̍h koànthong kuiê Kitokkàu tiōngiàu ê tōlí. Góa siongsìn "tē saⁿ kang tùi sílâng tiong kohoa̍h" chit kù ōe mā kângkhoán chin oh sìn, m̄koh ittàn siūⁿ thong, to̍h ē tòa lâi kiaⁿlâng ê sêngkó. Khókiàn chiahê bûnkù túhó sī Kitokkàu ê ji̍pmn̂g hō͘tēng; sìn liáu, to̍h chìnji̍p Kitokkàu; m̄ sìn, to̍h iáu sī Kitokkàu ê mn̂ggōahàn.

Só͘í tng chi̍tê lâng kóng i sìn Kitokkàu ê sî, lí chhianbān tio̍h chù’ì I "sìn siáⁿmi̍h", nāsī i kantaⁿ sìn Iésu ē hō͘ i chi̍t chhengbān kho͘ ê Sin Tâipè, lí chhianbān m̄thang tòngchò i sī chin sìn. Lí chóng sī ài the̍h "Sùtô͘ Sìnkeng" ni̍h ê chiahê bûnjī lâi khó i, nāsī i chiônglâi lóng bē bêngpe̍k chiahê lōeiông, ánne lí to̍h kā i kóng i lī sìn Kitokkàu iáu hn̄g leh, ittēng tio̍h tùi "Sùtô͘ Sìnkeng" khaisí sìn chiah tio̍h. Chhianbān m̄thang inūi beh kho͘ i óa lâi, kā i phô͘tháⁿ kóng i íkeng chinchiàⁿ sìn Iésu. Kású ánne thoatsòaⁿ khì bú, lí ittēng bô hoattō͘ chinchiàⁿ chínkiù chi̍t tiâu lênghûn, lí tiantò sī teh hāmhāi i oánlī thiantông chhianlí, chiongkîbóe bô hoattō͘ titkiù lah.

"Sùtô͘ Sìnkeng" kìjiân sī lán sìn ê khaitoan, mā sī sìn ê chiongkiat, lí bētàng kā i khinsī!

Chù 1：Kìⁿ "Sìngī Chong Sìntô͘ Chhiúchheh"（ Tâipak, Tōsiaⁿ Chhutpánsiā, 2006） ia̍h 52~53.

──2010, 08, 02 tah tī "Kitokkàu Thongsìn"