《宋澤萊新著《天路拾穗》TOJ/台灣字版》 |
 |
 |
|
 轉寄 |
Chútê 17：Tâm kóng honggiân（lênggí）sî ê nn̄g chióng chōnghóng
作者 Sòng Te̍klâi 2026.06.28
Tējī pō͘ Sènglêng ê Koànak
Chútê 17：Tâm kóng honggiân（lênggí）sî ê nn̄g chióng chōnghóng
Hit kang khì kàu kàuhōe, ū pêngiú mn̄g góa kóng honggiân hit tongsî sinsim sī m̄sī ētàng kakī khòngchè ê būntê, góa ê hôetap tī ēbīn：
Kóng honggiân kah phó͘thong ê gígiân bôkâng ê só͘chāi sī, chhùichi̍h kńgtāng, tī chhùichi̍h huisiông khoàisok ê ūntōng tiong tùi nââu kah chhùikhang só͘ kóng chhut lâi ê chi̍t chióng gígiân. Lán itpoaⁿ só͘ kóng ê gígiân, chhùichi̍h bē ū chiahni̍h khoàisok ê ūntōng.
Kóng tio̍h lán kóng honggiân ê chūngó͘ khòngchè chōnghóng tāikhài thang hunchò nn̄g chióng：
Chi̍t chióng sī lán pêngsiông sî kóng honggiân ê chōnghóng, iā to̍h sī tī lán ê ìgoān ēkha só͘ chò ê honggiân kîtó. Pílūn kóng chitmá góa siūⁿ beh kóng honggiân, góa to̍h ētàng chūchú kā honggiân kóng chhut lâi, góa mā ētàng chūchú thêngchí kóng honggiân; iā to̍h sī kóng ū beh kóng honggiân, góa lóng ētàng chiàu kakī ê ìsù, siu pàng chūiûchūchāi. Chit ê ìsù ná chhinchhiūⁿ sī kóng góa goān’ì chiāmsî kā chhùichi̍h chioh hō͘ Sènglêng, hō͘ Sènglêng sú'iōng, kòe sîkan liáuāu, góa to̍h siu tńg lâi. Chit chióng honggiân kîtó sī chin pêngsiông ê, ná chhinchhiūⁿ lán ji̍tsiông sengoa̍h ê kóngōe.
Lēnggōa chi̍t chióng sī chin chūjiân chūchú ê chōnghóng, iā to̍h sī kóng nā Sènglêng hutjiân kànglîm, kā lí ânân paukó tī Sènglêng ni̍h, chit sî lí ê chhùichi̍h, nââu, chhùikhang sitkhì chūchú sèng, lí kantaⁿ ētàng itti̍t kóng honggiân, ti̍tkàu Sènglêng thêngchí chokiōng, lí chiah ētàng thêngchí kóng honggiân. Chit chióng chōnghóng ná chhinchhiūⁿ lí ê chhùichi̍h, nââu, chhùikhang lóng pī Sènglêng tengsiu, khaisí kóng honggiân á sī thêngchí kóng honggiân lóng tio̍h khòaⁿ Sènglêng ê ìsù. Chit chióng chōnghóng píkàu khah chió hoatseng, m̄koh bētàng kóng bē hoatseng!
Kóng honggiân（lênggí）sī Sènglêng tī lán ê lêng ni̍h só͘ hoattōng ê chi̍t chióng gígiân tōngchok, I kektōng lán ê lêng, hō͘ lán kóng chhut honggiân, liáuāu kā gígiân chhōa kàu SiōngChú ê bīnchêng（chù 1）, ti̍tchiap tùi SiōngChú soatbêng, gígiân lāibīn ū kok chióng òpì; mā sī Sènglêng beh líkái chinsi̍t ê lí ê suiàu, tùi SiōngChú chīnliōng kóng chhut ê chióngchióng kîtó, kóng tio̍h sī siáⁿmi̍h lōeiông, tûhui ū hoane̍k honggiân ê insù ê lâng, lán púnsin sī bô hoattō͘ líkái ê, iā to̍h sī kóng lán ê ngó͘sèng（líkái le̍k）sī bûlêngûile̍k ê, he sûnchhùi sī Sènglêng ê ìsù, só͘í kóng lāibīn lóng sī òpì.（chù 2）
Tng lán kóng honggiân ê sî, m̄ koán sī chioh chhùichi̍h hō͘ Sènglêng á sī hō͘ Sènglêng kiôngpek ēng chhùichi̍h, inūi pōeāu lóng ū Sènglêng ê oa̍htāng, só͘í sī lán kah Sènglêng tàutīn chòhóe（tôngchāi）ê kihōe, engkai hóhó’á páak, inūi bô kóng honggiân ê sî, Sènglêng to̍h līkhui lán à. Góa óngóng khòaⁿ tio̍h chin chē íkeng ēhiáu kóng honggiân ê lâng, khiok bô koh kèsio̍k kóng honggiân, in lêngkhó khì thiaⁿ sèng koa á sī chhiùⁿ sèng koa, lia̍hchún kantaⁿ ū thiaⁿ sèng koa á sī chhiùⁿ sèng koa ê sî á sī tōasiaⁿ hoah ê sî, Sènglêng to̍h ē kah i tôngchāi; khiok m̄chai i á sī i púnlâng kóng honggiân ê sî, Sènglêng chiah koh khah chinsi̍t kah i tôngchāi, si̍tchāi sī huisiông khósioh!
Só͘í kóng, lán lâi kóng honggiân lah! I ētàng hō͘ lí ê sìnsim tōatōa chengka, lênghûn giámngē, sán seng Sènglêng tikak, hoatseng chióngchióng ê sînjiah, hō͘ lán khoàilo̍k ê tāichì ná ē boāi chò leh?
Chù 1："Lômá su" 8：26~27, "hôhòng lán ê nńgchiáⁿ ū Sènglêng pangchān, lán púnlâi m̄chai tio̍h cháiⁿiūⁿ kîtó, chísī Sènglêng chhinsin ēng kóng bē chhut lâi ê thó͘khùi thè lán kîtó. Kàmchhat lâng ê sim, chaiiáⁿ Sènglêng ê ìsù, inūi Sènglêng sī chiàu SiōngChú ê chí'ì thè sèngtô͘ kîkiû."
Chù 2： “Kolîmto chiânsu” 14, 14, "Góa nā ēng honggiân kîtó, sī góa ê lêng teh kîtó, m̄koh góa ê ngó͘sèng bô hāukó." “Kolîmto chiânsu” 14：2, "He kóng honggiân ê, goânlâi m̄sī tùi lâng kóng, sī tùi SiōngChú kóng, inūi bô lâng thiaⁿ ē chhut lâi. M̄koh, tī i ê simlêng ni̍h khiok sī teh kóng kok chióng ê òpì."
──2023, 1, 16 tī Lo̍kkáng
