《宋澤萊新著《天路拾穗》TOJ/台灣字版》

 | | | 轉寄

Chútê 22: "lângkang ê honggiân﹝lênggí﹞m̄sī honggiân." chitkù ōe sī ánchóaⁿ sī chhògō͘ ê?

作者 Sòng Te̍klâi 2026.08.02

22 têba̍k: "lângkang ê honggiân﹝lênggí﹞m̄sī honggiân." chitkù ōe sī ánchóaⁿ sī chhògō͘ ê?

Pitchiá tiāⁿtiāⁿ tī bānglō͘ téng khòaⁿ tio̍h ū lâng kóng, "Lângkang ê honggiân ﹝lênggí﹞m̄sī honggiân." Chitkù ōe thongsiông lóng sī hit kóa hoántùi pa̍tlâng honggiân kîtó ê chi̍t chióng phiàn lâng ê kónghoat, bo̍ktek sī beh hō͘ chheⁿchhiú gō͘ sìn honggiân ohtit ha̍ksi̍p, putjû phahsiau ha̍ksi̍p ê liāmthâu; tôngsî mā ēng lâi pâithek kîtha ētàng kóng honggiân ê kàuphài, chiū ánne khoakháu kakī kàuphài ê honggiân chiah sī chinchiàⁿ honggiân ê chi̍t chióng iùtī hêngûi. Chóng kóng chi̍t kù sī inūi Mô͘kúi bô ài lâng ū chit hāng sio̍klêng ê insù, chiah ē ū chit chióng hàmkó͘ ê kónghoat. Lán kám ētàng tiòngkè!

Thongsiông, lán ha̍ksi̍p kóng honggiân siōng kántan ê honghoat sī chhéngkàu pa̍tlâng; iā to̍h sī khòaⁿ pa̍tlâng ánchóaⁿ kóng honggiân, mn̄g tùihong kóng honggiân ê phiatpō͘, liáuāu kakī khò tio̍h sìnsim kā honggiân kóng chhut lâi., to̍h chhinchhiūⁿ sèhàn gín'á ha̍ksi̍p lāubú ê chhùihêng hoatim kóngōe ánne, púnlâi to̍h sī huisiông tansûn ê ha̍ksi̍p kóngōe ê khóài kigē. M̄koh Mô͘kúi ē thiaukò͘’ì kā chit hāng tāichì kóng kah chin ho̍kcha̍p, hō͘ lâng sim seⁿ kiaⁿùi, chiū ánne hō͘ lâng phahsiau ha̍ksi̍p honggiân ê liāmthâu.

Mô͘kúi khólêng ē kékúikékoài kā chheⁿchhiú kóng, "Lí siáⁿmi̍h lóng mài chò, kású kóng Sènglêng beh hō͘ lí kóng honggiân, I chūjiân to̍h ē hō͘ lí kóng honggiân. Lí siáⁿmi̍h mā bô suiàu chò, siáⁿmi̍h mā bô suiàu siūⁿ! Ittàn lí khò tio̍h kakī ê sim’ì, tōngchok kóng chhut honggiân, he to̍h sī lângkang honggiân, khiok m̄sī chin honggiân!"

Chit chióng ōe kám tio̍h? Tongjiân m̄tio̍h! Pitchiá beh kā lí kóng, kású lí siáⁿmi̍h lóng m̄ chò（bô siūⁿ beh kakī khuichhùi kóngōe）, tio̍hsǹg Sènglêng kàng tī lí ê sengkhu téng, lí mā khólêng kóng bē chhut jīmhô ê honggiân. Tongjiân ū chi̍t chióng chênghêng sī, tng Sènglêng huisiông phongphài kàng tī lí sengkhu téng, kā lí ânân pau leh, lí ū khólêng pītōng kóng chhut honggiân, inūi Sènglêng ke̍k siūⁿ beh hō͘ lí kóng honggiân; m̄koh, góa beh kā lí kóng, chit chióng chōnghóng bô chē, lâng ê itseng kantaⁿ ētàng tú tio̍h chi̍t nn̄g pái, sīmchì oânchoân bô khólêng tú tio̍h; kású lí bô hoattō͘ tú tio̍h chitê hántit ū ê chōnghóng, kám m̄sī chiū ánne kah kóng honggiân oânchoân choa̍tiân loh? Chóng kóng chi̍t kù, kóng honggiân chit chióng insù tī pōeāu tongjiân ū Sènglêng teh thuitōng, mā sī Sènglêng thêseng lán lêngmiā ê kèōe kah chokûi, m̄koh thongsiông tī itpoaⁿ ê chōnghóng, ittēng tio̍h sī sìntô͘ seng ū ìgoān chiah ēsái, ūi tio̍h hō͘ ha̍ksi̍p ū hāulu̍t, Sènglêng ittēng ē àmtiong khóchhat lí ê ìgoān, jîchhiáⁿ pangbâng lí, kású lí bô chi̍t si'á ìgoān, Sènglêng ná tio̍h lōnghùi I ê sîkan?

Koh chài kóng, lán itpoaⁿ lâng chíiàu khaisí ēhiáu honggiân, liáuāu tāikhài to̍h éngoán lóng ēhiáu honggiân ā. To̍h kahná kah siûchúi kângkhoán, chíiàu o̍h ēhiáu siûchúi, tāikhài itseng lóng ēhiáu siûchúi. Kiámchhái thâu chi̍tpái sī Sènglêng hō͘ lí ētàng kóng honggiân, m̄koh íāu lí kám beh kóng honggiân lóng sī lí kakī ê koattēng. Phìjū kóng lí chitmá siūⁿ beh kóng honggiân, lí to̍h ittēng tio̍h kakī khuichhùi kóng honggiân; lí siūⁿ beh thêngchí kóng honggiân, mā sī iû lí koattēng, Sènglêng kinpún bô koh koán lí. Lí bētàng kóng Sènglêng thâu chi̍tpái kiò lí kóng honggiân chiah sī honggiân, āu lâi iû kakī khuichhùi kóng chhut lâi ê honggiân（to̍h sī só͘ūi ê lângkang honggiân）m̄sī honggiân! Kîsi̍t, lán itseng tiong só͘ kóng ê honggiân, chhaputto lóng sī lângkang ê honggiân（kakī khuichhùi kóng ê）, chin chió kóng sī Sènglêng appek lán kóng chhut lâi ê. Kîsi̍t jīmhô hongbīn, Sènglêng lóng bē appek lán khì chò siáⁿmi̍h, tûhui sī lán hoān tio̍h tiōngtāi ê tāichì（pílūn kóng lán hoān tio̍h únsí ê chōe）. Só͘í kású kóng lângkang ê honggiân m̄sī honggiân, ánne chhaputto só͘ū ê honggiân lóng m̄sī honggiân ā.

Lán engkai chaiiáⁿ, honggiân púnsin to̍h sī chi̍t chióng gígiân, kah lán itpoaⁿ lâng ēng Enggí á sī Tâigí kîtó kângkhoán lóng sī gígiân; tng lán khuichhùi kóngōe ê sî, to̍h sī ēng lán ê lângkang kóngōe, tûliáu ūniōng lângkang ígōa, lán chin oh kóngōe! Chit chióng chōnghóng kah lán ê ngó͘sèng kîtó（ji̍tsiông gígiân ê kîtó）oânchoân kângkhoán ê, lí ittēng tio̍h khuichhùi ēng lângkang kā lí ê kîtó sû, ēng Pakkiaⁿgí á sī Tâigí kóng chhut lâi, chiah ētàng oânsêng ngó͘sèng ê kîtó, pēng m̄sī kakī oânchoân bô jīmhô ê tōngchok! Só͘í lán ná ētàng loān kóng, "lângkang ê honggiân m̄sī honggiân!" leh?

Koh chài kóng chi̍t piàn, kóng honggiân pēng bô khùnlân, chíiàu chhéngkàu pa̍tlâng, ànchiàu pa̍tlâng ê chhùihêng á sī hoatim ê kikhiáu, phahpiàⁿ ha̍ksi̍p, kinpún bô suiàu gōa kú（chin khólêng kantaⁿ suiàu sùnkan）, Sènglêng to̍h ē hō͘ lí kóng chhut honggiân. I m̄ kiaⁿ "lângkang", kiaⁿ ê sī lí kinpún bô goān’ì khuichhùi kā i kóng chhut lâi..

Sī ánchóaⁿ ha̍ksi̍p honggiân chiahni̍h kántan leh? Mákhó Hokim 16：17~18 Iésu kóng, "Sìn ê lâng ittēng ū sînjiah tòe in, to̍h sī hōng Góa ê miâ kóaⁿ kúi; kóng sin honggiân." Chíiàu tùi SiōngChú, tùi Iésu, tùi Sènglêng ū sìnsim ê lâng, lóng ētàng pîn lí ê lângkang, kā honggiân kóng chhut lâi. Lán ná tio̍h thiaⁿchiông Mô͘kúi ê khiónghat kóng, "lângkang ê honggiân m̄sī honggiân!"

──2021, 05, 30 tī Lo̍kkáng