《宋澤萊新著《天路拾穗》TOJ/台灣字版》

 | | | 轉寄

Chútê 33：Sènglêng lāichū sī ánchóaⁿ ētàng chiàniâⁿ siâchêng suio̍k?

作者 Sòng Te̍klâi 2026.10.18

Chútê 33：Sènglêng lāichū sī ánchóaⁿ ētàng chiàniâⁿ siâchêng suio̍k?

Tng Sènglêng ētàng kútn̂g tiāⁿtiāⁿ lāichū tī lán ê hengpak liáuāu, lán chiah ētàng koh khah chhengchhó théhōe tio̍h lán ê lōechāi tekkhak sī chi̍tê bē sè ê thiusiōng khongkan.

Lí thang kā chitê lōechāi ê khongkan phìjū chò chi̍tê khangsim ê iôngkhì. Kinkì sèngkeng ê kónghoat, chitê iôngkhì tī lâng tú seⁿ lo̍h lâi ê sî, to̍h m̄sī oânchoân khangkhang ê. Inūi, i hông pàng lo̍hkhì "lâng pōege̍k SiōngChú" ê chitê siâchêng suio̍k, kinkì sèngkeng kóng, che sī lâichū Atám ê ûithoân, he sī itchhè chōeok ê iûlâi. Só͘í kóng, Kitokkàu pēng m̄sī chútiuⁿ lâng kah chi̍t tiuⁿ pe̍h chóa kângkhoán lâi kàu sèkài, tī bōe chhut búthai ê sî, lán si̍tchāi íkeng ū chōe ā!

Íāu, lán ūitio̍h jio̍kthé chêngio̍k ê suiàu, ūitio̍h sengchûn chengtàu ê suiàu, koh khah chē ê siâchêng suio̍k chìnji̍p chitê lōechāi ê iôngkhì, inchhú, kanîm, lâsâm, siâok, pài ngó͘siōng, siâsu̍t, siûhūn, cheng kēng, kīhūn, keksim, kiattóng, huncheng, ītoan, chi̍ttò͘, hiongsat, chōe chiú, tîmlûn ê iànse̍k ……chiahê sǹg bē chīn ê siâchêng suio̍k lóng hunhun chìnji̍p chitê iôngkhì lâi à. Tng chiahê siâchêng suio̍k tú chìnji̍p lōechāi khongkan liáuāu, ē tī lâng ê lōechāi giâ khí phobûn, sīmchì piànsêng tōa chúiéng. Khah bô pānhoat ê lâng, to̍h hō͘ in piànsêng chi̍t chióng hêngûi, tī hêngûi tiong tittio̍h siâchêng suio̍k ê chhutkháu, chiū ánne hō͘ lōechāi khongkan ētàng pêngchēng lo̍h lâi, thò͘ chi̍t kháu khùi, tìsú tī siophah kah satjîn liáuāu, kèngjiân kóng, "Góa chiongkîbóe tittio̍h káithoat à!" Só͘í bô pānhoat ê lâng itseng to̍h chhiongmóa hoānchōe ê kítōng, kiâⁿ tī khâmkhia̍t, chōeok ê lō͘ ni̍h. Píkàu khah ū pānhoat ê lâng, kiámchhái to̍h ētàng ēng chúnchat, choánî, senghôa ê chióngchióng pānhoat, kā in apchè, so͘thong, siautû, hō͘ in tī sinchiūⁿ bô sánseng phòhoāi sèng ê hêngûi, pībián sánseng sengkhu á sī sèⁿmiā ê gûihāi, chiahê lâng thongsiông ē hông chhengchò sèngjîn, hiân chiá, tāitiōnghu, ìsù sī kóng, i m̄sī phó͘thong lâng. Kitoktô píkàu siōng kah chit nn̄g chióng lâng bôkâng, tāiseng, i chaiiáⁿ khò i kakī sī éngoán bô hoattō͘ phiahkhui chiahê siâchêng suio̍k. Inūi lán ê lōechāi éngoán sī chi̍tê iôngkhì, i bô hông khǹg ji̍pkhì chitê siâchêng suio̍k, to̍h khǹg ji̍pkhì hitê; lán ē ohtit tôsiám chhianbān ê siâchêng suio̍k ê chìnchū. Kîchhù, tī siâchêng suio̍k chìnchū liáuāu, pîn nńgchiáⁿ ê kakī, éngoán ohtit chúnchat siâchêng suio̍k ê kó͘tōng kah íniú, in chiongkîbóe ē tòaniá góa chìnji̍p hitê síbông ê sèkài! M̄koh hókachài, SiōngChú ūi Kitoktô lâu chi̍tê honghoat, ētàng siámpī siâchêng suio̍k ê kongkek; he to̍h sī hō͘ Sènglêng ētàng éngchū sengkhu ê honghoat, hō͘ Kitoktô tôpī chitê éngoán ê hênghoa̍t!

Tng Sènglêng chìnchū lōechāi khongkan íāu, tāiseng to̍h kahná hông chù chi̍t chiam éngoán ê khinsang che, ē sûisî kàngkē lí hitê kò͘chi̍p ná chhinchhiūⁿ chio̍hthâu ê púnsèng, kuiê lâng lóng pàngsang lo̍h lâi, chiū ánne ētàng chiapsiū pa̍tlâng ê phoephêng kah chíkàu; jîchhiáⁿ ētàng kámkek chiahê phoephêng kah chíkàu. Lí ētàng khòaⁿphòa pa̍tlâng ê hóì, jîchhiáⁿ khaisí ētàng lísèng khòaⁿthāi kakī. Púnlâi ê chio̍h sim to̍h choán chiâⁿ bah sim, sèngchêng ē ū tōa choánpiàn.

Sòachiap ê sī, lí sûisî ētàng chaiiáⁿ chōe sī siáⁿmi̍h, íki̍p i ê hoānûi tāikhài ū gōa tōa, che sī lán ê lâsâm púnsèng tī Sènglêng ê sèngkiat púnsèng tùichiàu chi hā, sûisî to̍h ē hiánlō͘ chhut lâi ê. Lí m̄bián chia̍hla̍t, sûisî to̍h ētàng simlāi chaichai, liáukái kakī to̍h sī chōejîn. Ná chhinchhiūⁿ chi̍t tiuⁿ o͘ chóa, púnlâi m̄chai kakī ū gōa o͘; chitmá lâi chi̍t tiuⁿ pe̍h chóa, jîchhiáⁿ pâi chòhóe, o͘sek ê chóa ê o͘sek to̍h hông kiônglia̍t chhòngkéng chhut lâi, koh khah ánchóaⁿ to bô hoattō͘ thesî, bô hoattō͘ amkhàm. Tûliáu tiāmtiām'á sêngjīn ígōa, bô siáⁿmi̍h hó piānpok!

Koh chài sòachiap, Sènglêng ē ēng pêngan kah hílo̍k thiⁿ móa lí simheng ê thiusiōng khongkan, ūi lán ê lōechāi khíchō chi̍tê sûnchhùi pêngan kah hílo̍k ê kahn̂g, hō͘ lí pêngan tòa tī hia. Hit chióng pêngan kah hílo̍k ētàng kóaⁿ cháu chin chē lí ithiòng si̍pkoàn siūⁿ beh ê chhìkek, hò͘ⁿio̍k, kônghoan, koh khah ánchóaⁿ to bô suiàu jīmhô ê siâchêng suio̍k; mā bô jīmhô ê khongkan thang hō͘ siâchêng suio̍k chìnji̍p siuⁿ kú, tio̍hsǹg siâchêng suio̍k biánkióng beh ji̍plâi tòa koh khah kú, mā chin kín hông siaubia̍t. Tī Iôhaneh Hokim 14：17, Iésu bat kóng, "Góa lâu lo̍hlâi pêngan hō͘ lín, Góa kā Góa ê pêngan sù hō͘ lín, Góa só͘ sù ê, bô chhinchhiūⁿ sèkan lâng só͘ sù ê." Iésu ê ìsù sī kóng, SiōngChú ê pêngan m̄sī itpoaⁿ sèkan lâng ētàng hō͘ lí ê hit chióng pêngan, he sī Sènglêng chiah ētàng hō͘ lí huihoân ê pêngan. Pêngan kìjiân sī ánne, hílo̍k mā kângkhoán.

Góa chaiiáⁿ, he m̄sī góa ētàng chò kàu ê, khiok sī Sènglêng chò ê, oânchoân sī Sènglêng ê konglô, góa m̄ káⁿ kóng hit lāibīn ū góa phahpiàⁿ ê kiatkó, he sûnchhùi sī SiōngChú só͘ sù ê intián!

Itjîchàichàijîsam, tng lán teh beh hoān ke̍k tōa ê chhògō͘, tú tī bûti ê chōngthài ê tiongkan, tio̍hsǹg kohchài tōa ê liôngsim mā bô hoattō͘ kóaⁿ cháu lán ê siâchêng suio̍k ê sî, lāichū ê Sènglêng to̍h ē sûisî chhapchhiú lâi koánlí lán. I ēng chi̍t chióng uihia̍p á sī chhúhoa̍t, lâi kiôngpek lí káichèng, hō͘ lán pībián sánseng puthēng ê hiōkó, che koh khah sī Sènglêng ê konglô, choa̍ttùi m̄sī lán ê lêngle̍k ētàng chò kàu ê. Kílē lâi kóng, lán kah pēbú, hiaⁿtī, pêngiú, khanchhiú, kiáⁿjî lóng ū unoàn; puthēng ê lâng, ē inūi ánne soah niásiū ke̍k tōa ê súnsit. Ūtangsî'á, lán to̍h ē sitkhì lísèng, á sī siūⁿ beh pòho̍k tùihong, sīmchì kahāi tùihong. Chiahê ke̍ktoan ê hêngûi, ē ūi lán tòa lâi bô hoattō͘ mîpó͘ ê sionghāi. Tī iàukín ê koanthâu, lāichū ê Sènglêng bē khiā koân soaⁿ khòaⁿ bé sio that, I ē hiòng lí sika aple̍k, á sī kéngkò, á sī khiónghat, hō͘ lí khòaⁿ tio̍h kakī ê bûti kah putgī, siōng bóe pek kah lán hòngkhì siâchêng suio̍k, hôeho̍k chèngsiông. Hoân sī chiahê, lóng m̄sī lán ê konglô, náisī Sènglêng ê sêngchiū.

Lán sī pînkhò Sènglêng ji̍plâi sengkhu tòa liáuāu, hō͘ siâchêng suio̍k bô koh tī lán ê sengkhu lāité hoatseng phòhoāi sèng ê kongiōng, lán chiū ánne pī kengsin, tiôngsin sokchō. Só͘í Kitoktô mā ētàng kah bô sìngióng ê lâng á sī īⁿkàutô͘ kângkhoán, oló kakī ētàng piànsêng sī sèngjîn, hiânchiá, tāitiōnghu; chísī Kitoktô thongsiông koh khah ētàng bêngpe̍k lōechāi ê si̍tchêng, chaiiáⁿ chitê sèngjîn, hiânchiá, tāitiōnghu m̄sī lán kakī ētàng chò chhut lâi ê, khiok sī Sènglêng thè lán chò chhut lâi ê, liáuāu sêngchiū tī lán chiahê putphòe tittio̍h ê chōejîn ê sengkhu téng!

──2014, 07, 06 tah tī "Kitokkàu Thongsìn"
──2017, 09, 22 lio̍k siukái tī Lo̍kkáng