《宋澤萊新著《天路拾穗》TOJ/台灣字版》

 | | | 轉寄

Chútê 36：Ē līkhui sengkhu ê to̍h m̄sī chinchiàⁿ "Sènglêng lāichū"!

作者 Sòng Te̍klâi 2026.11.08

Chútê 36：Ē līkhui sengkhu ê to̍h m̄sī chinchiàⁿ "Sènglêng lāichū"!

Sènglêng lāichū to̍h sī titkiù ê khaksi̍t chèngkì. I sī SiōngChú kā Sènglêng sù hō͘ lâng, tòngchò chi̍t chióng sìntô͘ chionglâi tiāⁿtio̍h ē titkiù ê chèngkì, mā sī SiōngChú hō͘ lâng titkiù ê ìnkì. Chionglâi boa̍tji̍t símphòaⁿ lâilîm ê sî, Iésu ài lí the̍h chhut chitê chèngkì hō͘ I khòaⁿ, chiah ētàng chìnji̍p sinthiⁿsintē. Nā kóng iáu ē līkhui, he to̍h giâmtiōng ā. Pílūn kóng bānit tī boa̍tji̍t símphòaⁿ ê sî, Sènglêng túhó līkhui, he kám m̄sī lo̍h ji̍p hóeô͘ tēga̍k? Nāsī ánne, Sènglêng chū pún to̍h bētàng kóng sī titkiù ê "khaksi̍t chèngkì" ā, kám m̄sī? M̄koh Páulô tī i ê Êhusoh Su 1：14 kóng, "Sènglêng sī tit kigia̍p（titkiù）ê pînkì!"

Che to̍h sī kóng, ū chi̍t chióng chōnghóng, Sènglêng sī bē līkhui lâng ê sengkhu, Sènglêng hō͘ lâng ê sengkhu éngoán piànsêng Sènglêng ê tiān, che kiòchò "Sènglêng éngchū", itpoaⁿ lâng lóng kóng sī "Sènglêng lāichū". Tio̍hsǹg hoānchōe, I mā bē līkhui, Sènglêng ē tī lí ê lōechāi appek lí oânchoân jīnchōe hóekái chiah thêngchí.

Lēnggōa, Sènglêng ê éngchū sī Sènglêng beh hō͘ sìntô͘ tittio̍h éngoán ê sèⁿmiā sī só͘ chò īpī ê kichhó͘ kangchok, m̄bián tán kàu sí liáuāu, chāiseⁿ ê sî Sènglêng to̍h ētàng sù hō͘ lí éngoán sèⁿmiā, só͘í kóng, Sènglêng á sī Iésu sī "sù sèⁿmiā ê lêng". Chitê éngoán ê sèⁿmiā to̍h sī Sènglêng ê si̍tchit, iā to̍h sī "Góa sī Alpha, Góa sī Omega" ê sînsèng sèⁿmiā. Nāsī Sènglêng ē līkhui sengkhu, bô hoattō͘ éngchū, ánne chionglâi éngoán ê sèⁿmiā mā ē līkhui sengkhu, bô hoattō͘ éngchū, he to̍h chhám loh! Hitūi sìntô͘ kám m̄sī to̍h ē chiâⁿchò ūsî ū éngoán ê sèⁿmiā, ūsî bô éngoán ê sèⁿmiā? He to̍h chin kankhó͘ sim loh!

Só͘í kóng, kású sìntô͘ ētàng pī Sènglêng éngchū, piànsêng Sènglêng ê tiān, Sènglêng sī bē līkhui hitūi sìntô͘. Iā to̍h sī kóng, Sènglêng kású beh chínkiù chi̍tê lâng kàu té, I to̍h ē éngchū. Sènglêng ētàng chaiiáⁿ sìntô͘ ê kòekhì kah bīlâi, I bē sûisûipiānpiān éngchū tī lâng ê sengkhu, tûhui chitê lâng sī I ītēng ittēng titkiù ê lâng! Kású lí chinchiàⁿ sī ittēng titkiù ê lâng, lí hoān tāngchōe, I to bē līkhui lí ê sengkhu!

Koh lâi engkai tio̍h chaiiáⁿ, Sènglêng éngchū bô ittēng ē hō͘ lâng ū kóng honggiân hitlūi ê sio̍klêng insù, he kah ētàng kóng honggiân, ipēⁿ, kóaⁿ kúi chiahê insù bô koanhē, I ê lâi kàu huisiông unhô, bē kiò lí choânsin tíntāng. I ē seng hō͘ lí ê chio̍h sim piànsêng bah sim, kiò lí ê sim nńghòa lo̍h lâi, ētàng chù’ì thiaⁿ I ê chíkàu. I seng hō͘ lí kiat Sènglêng ê kóechí, koh lâi to̍h sī chi̍t hēlia̍t ê koánkà, paukoat jīnchōe hóekái, koh lâi to̍h sī hō͘ lí éngoán ê sèⁿmiā. Che sī Sènglêng lāichū ê sînsèng sūkang!

Ū lâng itti̍t jīnûi ū Sènglêng ê 9 chióng insù to̍h sī Sènglêng lāichū, che sī m̄tio̍h ê, he kiòchò Sènglêng koànak（á sī chheng Sènglêng chhiongmóa）, m̄sī Sènglêng lāichū. Ētàng kóng honggiân, chò ībāng, kìⁿ īsiōng, ipēⁿ, kóaⁿ kúi ê sio̍klêng insù sī chin liáuputkhí, m̄koh in kiōngtông ê hiānsiōng sī Sènglêng ē līkhui sengkhu, só͘í ū chin chē ētàng ipēⁿ ê sîn’i, ittēng tio̍h tánthāi Sènglêng kànglîm, chiah khaisí kā lâng tī pēⁿ, sī ánchóaⁿ leh? Inūi Sènglêng ūsî tī i sengkhu ni̍h, ūsî bô tī i sengkhu ni̍h. Ētàng khòaⁿ tio̍h īsiōng ê lâng mā sī kângkhoán, Sènglêng lâi to̍h khòaⁿ tio̍h īsiōng; īsiōng hiánhiān soah liáuāu, Sènglêng to̍h līkhui! Siū Sènglêng koànak á sī Sènglêng chhiongmóa ê sìntô͘, chin chē lâng kàu siōng bóe sī bē titkiù, kah chin chē ê Kolînto sìntô͘ kângkhoán. Inūi Sènglêng ē līkhui, Sènglêng to̍h bô hoattō͘ ū chi̍tê únkò͘ ê tīntē, ētàng hō͘ i puttoān tī sí sengkhu ni̍h chōe ê lu̍t, kàu siōng bóe, kású Sènglêng bô koh lâi, á sī chin chió lâi, chitūi sìntô͘ to̍h lûnlo̍h ji̍pkhì pī khìsak ê sèkài tiong!

Lán ittēng tio̍h chaiiáⁿ, "Sènglêng koànak á sī chhiongmóa" pēng m̄sī "Sènglêng lāichū", che sī nn̄g hôesū, mā sī Kitokkàu kài kongjīn ê Sènglêng ê nn̄g bīn chokiōng. Tú bat Sènglêng ê lâng tiāⁿtiāⁿ kā in chhamchhap, kā in tòngchò sī chi̍thôe sū, siōng bóe to̍h hāi liáu kakī, hō͘ kakī thêng t ī"Sènglêng koànak á sī chhiongmóa" ni̍h, pa̍kkha pa̍kchhiú bē chìnchêng, á sī kakī lia̍hchò boánchiok; kàu siōng bóe m̄chai iáu ū chi̍tê koh khah koân kéngkài ê "Sènglêng lāichū" thang tuikiû. Kantaⁿ chaiiáⁿ "Sènglêng koànak á sī chhiongmóa" á m̄bat "Sènglêng lāichū" ê lâng, ē khòaⁿ m̄bat Páulô ê Lômá Su ê tē 7 chiuⁿ kah tē 8 chiuⁿ, inūi Lômá Su tē 7, 8 niú chiuⁿ sī kóng Sènglêng lāichū ê hùnchiàn chōnghóng ê, tùi sutīn kàu phahiâⁿ, chhengchhengchhóchhó chhinchhiūⁿ chi̍t pak tô͘. Lômá Su bô hoattō͘ ēng "Sènglêng koànak á sī chhiongmóa" lâi káisoeh, te̍kpia̍t sī kóng honggiân ê hiānsiōng lâi káisoeh. Khósioh ū bó͘ chi̍tê kàuhōe ê láutōa kèngjiân ēng kóng honggiân ê kenggiām lâi káisoeh Lômá Su, i só͘ tù ê chheh to̍h m̄tio̍h chi̍t tōatui!

Góa kiàngī sìntô͘ tùi kakī sī m̄sī íkeng "Sènglêng lāi（éng）chū", tio̍h ē kínsīn phêngkó͘. Chhianbān m̄thang kā kakī phêngkó͘ kòethâu koân, ētàng ūi kakī póliû chi̍tê thang tuikiû chìnpō͘ ê khongkan, chhianbān m̄thang jīnûi ū sio̍klêng insù, to̍h kóng siáⁿmi̍h lóng bat, sīmchì kóng siáⁿmi̍h lóng ū. Pitkèng tongkim ê sèkài, Gō͘sûncheh Kàuphài tōa heng, choânkiû ētàng kóng honggiân ê lâng khióngkiaⁿ ū chheng bān ê jînsò͘ ísiōng, chiahê ētàng kóng honggiân ê lâng, ū chinchiàⁿ "Sènglêng lāichū" ê khióngkiaⁿ bē chhiaukòe kúi chheng lâng!

──2019, 04, 0 8 tah tī "Kitokkàu Thongsìn"