《CTT出頭天園地》

 | | | 轉寄

Isap 寓言 28

作者 TLH 2007.08.26

28. Bé'á kap Lî'á

Bé'á kap Lî'á tângchê tòe chúlâng chhutmn̂g. Bé'á chhēngchhah chin súi, iânlō͘ kiâⁿ iânlō͘ thiàulāng, simchêng chin khinsang. Lî'á phāiⁿ tāngmi̍h chin chia̍hla̍t, iânlō͘ kiâⁿ, iânlō͘ phīⁿphēⁿ chhoán, simchêng chin utchut.

Lî'á thó͘ chi̍tê tōakhùi, ánne kā Bé'á kóng, “Góa nāsī lí chiū hó lah! Kuikang chia̍hpápá, êngsiansian, koh thang chhēng kàu súitangtang.”

Tē jīkang, ū chi̍ttiûⁿ tōa chiània̍h. Siōng bóepái chhutchiàn ê sî, Bé'á tio̍h tāngsiong, tó tī lō͘piⁿ, tehbeh sí lah. Lî'á kiâⁿ tùi hia kòe, khòaⁿ tio̍h Bé'á kanta chun chi̍ttiám'á khùisi'á, kámkak i chin khóliân.

“Góa chhò lah,” Lî'á kóng, “Iáusī pênghoân khah anchoân!”