《CTT出頭天園地》

 | | | 轉寄

Isap 寓言 38

作者 TLH 2007.11.04

38. Iāpô

Chiáulūi kap Siùlūi ū chi̍ttiûⁿ chiok tōa ê chhiongtu̍t teh beh po̍khoat. Nn̄gpêng ê kuntūi teh chi̍pha̍p, chúnpī beh siochiàn ê sî, Iāpô samsim lióngì m̄ chai beh kaji̍p tó chi̍tpêng.

Chi̍ttīn Chiáulūi poekàu i hioh ê chhiū'áténg, kā kóng, “Kap goán tângchê lâikhì.” I ìn kóng, “ Góa sī Siùlūi.”

Kòe bô jōakú, chi̍tkóa Siùlūi kiâⁿkàu i hioh ê chhiū'ákha, giâthâu kā kóng, “Kap goán tângchê lâikhì.” M̄ kú i kóng, “Góa sī Chiáulūi.”

Hókachài, āulâi nn̄gpēng bô siochiàn, chhiongtu̍t tit tio̍h hôpêng káikoat. Tāike lóng chin hoaⁿhí chòtīn teh khèngchiok. Iāpô chiū cháu khì Chiáulūi hia, siūⁿ beh chhapchi̍tkha. M̄ kú, in bô hoangêng i. I hoanthâu koh cháu khì Siùlūi hia, sòa hō͘ Siùlūi phah, hiámhiám'á hō͘ in oa̍hoa̍h phahsí.

Iāpô cháukàu chin liôngpōe, bôbīn thang kìⁿlâng, kóng, “ Góa chi̍tmá chaiiáⁿ lah! Siangkha ta̍h siangchûn, siangthâu bô chi̍tngauh. Taⁿ, góa íkeng bô pòaⁿê pêng iú lah!”