《CTT出頭天園地》

 | | | 轉寄

Isap 寓言 40

作者 TLH 2007.11.18

40. Chúike kap Gûkáng

Chi̍tchiah lāu chúike chē tī chúikhut'ápiⁿ teh tuhku. Sèkiáⁿ tōakiaⁿ siókoài cháukòelâi kā tâu kóng, “Góa khòaⁿ tio̍h chi̍tchiah chiok khóphà ê tōngbu̍t, chiok tōa chiah, chhinchhiūⁿ chi̍tla̍p soaⁿ hiahni̍h tōa. Thâukhakténg hoat nn̄gki kak. Ū chi̍tki tn̂g bóeliu, khatê'á punchò nn̄gtè.”

“Gōng gín'á, góa kóng hō͘ lí thiaⁿ. He sī Ôngsianseⁿ ê gûkáng. I mā bô chhiūⁿ lí kóng ê hiahni̍h tōa, kanta pí góa khah tōa siókhóa'á nātiāⁿ. Chin kántan, góa mā ū hoattō͘ piàn hiah tōa hō͘ lí khòaⁿ.”

Kóngliáu, i chiū khaisí kā paktó͘ kek hō͘ phòngkhílâi, mn̄g in kiáⁿ kóng, “I kiám ū chhiūⁿ góa ê paktó͘ chiahni̍h tōa?” “Ū no͘h! Pí lí tōa chiok chē leh!” Hit chiah lāu chúike koh chài kek, ná kek ná mn̄g, “Ánne ū kàu tōabô?” “Koh khah tōa leh! Koh khah tōa leh!” Lāu chúike chiū suh chi̍tē tōakhùi, koh kek, kohchài kek, itti̍t kek. I ê sinkhu mā ti̍tti̍t phòngtōa, phòngtōa, koh phòngtōa.

“Góa káⁿ khaktēng gûkáng choa̍ttùi bô chhiūⁿ góa chitmá chiahtōa.” Ōe tú kóng soah, lāu chúike ê paktó͘ sûi piakphòa lah.

Phònghong chúike thâi bô bah. Chūkhoa chūtōa ê lâng kanta ē hāisí kakī.