《CTT出頭天園地》

 | | | 轉寄

Isap 寓言 43

作者 TLH 2007.12.09

43. Kanglâng kap Iāeng

Joa̍hthiⁿ ê àmmî, ū chi̍tê kanglâng tótī chhiū'ákha teh thiaⁿ iāeng chhiùⁿkoa, siaumô͘ sîkan. Iāeng bíbiāu ê koasiaⁿ hō͘ i thiaⁿkàu hīⁿ'á phakphak. Kehtńgkang, i chiū siat chi̍tê hāmchéⁿ kā iāeng lia̍hkhílâi.

I tōasiaⁿ kā iāeng kóng, “Taⁿ lí hō͘ góa lia̍h tio̍h lah! Lí ài ta̍kkang chhiùⁿ hóthiaⁿ ê koa hō͘ góa thiaⁿ.” Iāeng ìn kóng, “Goán iāeng tī chiáuláng'á lāi chhiùⁿ bē chhut hóthiaⁿ ê koa.”

“Nā ánne, góa beh kā lí thiahchia̍h lo̍hpak. Góa bat thiaⁿ lâng kóng iāeng hang chò chiáu'ápa khìbī chinchán.”

“Pàithok leh lah, chhiáⁿ lí pàng góa cháu, m̄ thang thâigóa. Lí nā pàng góa cháu, góa chiū kóng saⁿhāng pí góa ê sèⁿmiā kohkhah kèta̍t ê pìbi̍t.”

Chitê kanglâng thiaⁿliáu, chiū kā iāeng pangchhutlâi. Iāeng sûi poechiūⁿ koânkoân ê chhiū'áténg, kā kóng, “ Chhiáⁿ lí chimchiok thiaⁿ. Tē it, choa̍ttùi m̄ thang siongsìn sitkhì chūiû ê lâng kóng ê ōe. Tē jī, sinkhó͘ tit tio̍h ê mi̍hkiāⁿ ài hóhó'á pósioh. Tē saⁿ, mi̍hkiāⁿ nā phah bôkhì, m̄ thang siongsim.”

Kóngsoah, iāeng chiū poe cháu lah.