《台灣另類牧師．醫師─謝緯》

 | | | 轉寄

703 謝緯續建第二間肺病療養院

作者 陳金興 2011.12.04

無偌久，孫理蓮tī埔里鎮內所起ê「基督教山地中心診所」，原住民患者jú來jú chē，所在不夠使用，孫理蓮就向謝緯借用設tī鎮郊鯉魚潭畔，tú 起好ê肺病療養院，來hō͘ 原住民患者使用。為tio̍h按呢，謝緯只好tī肺病療養院無偌遠ê所在，家己另外出錢koh再買八分地來起另外一間療養院。

差不多經過四冬goā，1960年7月初3第二間肺病療養院正式落成啟用，名稱猶原叫做「埔里基督教療養院」（俗稱大湳平地療養院）。當時有潘啟揚、蔡坤飛kap陳少聘夫婦等醫護人員kap謝緯同齊工作，並邀請黃珠心醫師駐院負責醫療，伊bat tī日本ê療養院服務過一段時間，比較khah有經驗。

當時來chia就診kap住院ê患者，有一半是完全免費ê。經營ê費用，除了大部分是謝緯家己出錢(大同病院ê收入)以外，mā得tio̍h其他美國朋友，包括鮑伯‧馮雷醫師ê幫贊。其中，美國國際學生協會 (International Students Inc. ISI) ê大力支持，是平地療養院siōng重要ê經費來源。In贊助建設療養病房，並購買醫療器材，像X光機、手術台等。

講到ISI 長期tùi美國募款寄來台灣贊助肺病療養院這chân事，tī美國mā有人對ISI提出質疑講：「Lín認為是當地ê基督徒ē tàng管理hiah ê機構mah？當地ê工作人員ē tàng勝任hit項資金ê運作mah？」

ISI 就 kā in講，謝緯tī美國進修了後，tńg來到台灣透過ISI ê資金，tī 1956年1月設立了一間有100床ê肺病療養院(大湳山地)。為tio̍h beh起第二間療養院(大湳平地)，謝緯koh開始積極對外募款、興建。當療養院開始營運ê時，謝緯kap工作人員lóng定期將財務報表寄hō͘ ISI，in每chit sián錢lóng會記kàu真詳細，資金ê用途mā交代kàu清清楚楚。ISI koh講，謝緯in m̄ nā ē tàng獨立運作，而且koh做kàu真好，資金ê運用，iáu比其他接受美國援助ê國家kohkhah省。

1965年ê聖誕節，謝緯寫phe hō͘ 美國ê朋友，報告肺病療養院ê情形，mā表明希望療養院ē tàng有自立ê一工，總是因為當時ê肺癆病人iáu真chē，恐驚須要koh努力kúi nā年。了後，伊koh陸續收tio̍h美國朋友ê捐款，ē tàng tī新ê療養院起護士kap員工ê宿舍，以及禮拜堂。謝緯發現有真chē患者tī療養院聚集poa̍hkiáu，hō͘ 伊真頭痛，感覺tīhia療養ê病人應該有一个精神寄託，就聘紀明申牧師擔任「院牧」，負責病人靈性方面ê指導以及院務行政等工作。

因為醫療技術ê進步以及公共衛生ê改善，肺癆病人jú來jú少，設tī埔里ê基督教肺病療養院tī 1980年結束服務。經過謝綸長老、謝緯夫人楊瓊英醫師kap家族商議了後，tī 1982年將二ê所在lóng捐獻hō͘ 台灣基督長老教會總會。總會陸續將「大湳山地肺病療養院」kap「大湳平地肺病療養院」改做「謝緯紀念青年營地」以及「謝緯紀念松年營地」。