《台灣另類牧師．醫師─謝緯》

 | | | 轉寄

704 謝緯擔任埔基首任院長

作者 陳金興 2011.12.11

1955年，tī謝緯興建肺病療養院ê同時，mā同齊kap孫理蓮tī埔里鎮中山路起一間「基督教山地中心診所」(埔里基督教醫院前身)。這間診所tī仝年10月建設完成，1956年正月16舉行開幕典禮，第一位主治醫師是盧昆山，黃玉端是第一位護士，謝緯受邀請義務看診koh兼任第一任院長。


山地中心診所tùi一間tekkóng'á(竹管仔)厝開始工作，續落來koh起kúinā間tekkóng'á病房來收留患者。初期ê醫護人員真欠缺，編制上kanta有2名護士kap 1名藥局生，後來陸續有醫師潘啟揚、檢驗師陳欽耀、放射線師蔡坤輝、護士謝蜂柑、護理師徐賓諾（Bjarne Gislefoss, 1923）kap賴誼照、陳少聘等人加入服務ê行列。



該中心診所tī開始免費醫治原住民ê時，hiahê原住民行真遠ê路，翻山過嶺來看診，了後，beh tńg去厝ê路iáukú是真tiàu遠。當時ê交通無方便，真oh一工往回，所以病院m̄ nā免費醫療，而且koh提供in食住。當患者一人toà院ê時，全家攏同齊來照顧，chit時chūn，病院mā免費供應in全家ê伙食。全台灣真chē原住民tùi ánne「慕名」前來，甚至遠自苗栗、屏東kap花蓮「特別」到埔里來看病。

因為患者jú來jú chē，診所空間不夠使用，為tio̍h beh擴大醫療服務，謝緯tī 1956年8月就向愛蘭教會租土地，就 tī愛蘭台地頂面（鐵山路現址）koh起10間tekkóng'á病房kap 一間護理室。1957年世界展望會（World Vision Inc.）會長鮑伯．皮爾斯博士（Dr. Bob Pierce）來到埔里關心基督教山地醫療狀況。9月初2謝緯陪孫理蓮接待伊到愛蘭中心診所參觀。鮑伯．皮爾斯看了後，就當場簽一張金額空白ê支票，交hō͘ 孫理蓮去處理。

由世界展望會出錢贊助tī愛蘭崎頂起一間新ê「基督教山地病院」，1960年8月初1「門診部」代先起好，鎮內ê山地中心診所自按呢遷徙來chia。世界展望會大力支助山地病院ê經營，tùi 1957年到1961年，病人一切ê醫療費用以及食、穿、住 lóng免費提供，經費kap物資由展望會向國外ê基督徒kap團體募款，幫助了真chē散赤ê家庭，mā醫治了真chē病患。

1962年6月24日，「埔里基督教山地醫院」正式落成啟用了後，8月初6，芥菜種會將基督教山地中心診所ê土地kap建築物賣掉。1963年4月20日，「埔里基督教山地醫院」正式向南投縣衛生局登記做「埔里基督教醫院」。1964年正月初9「台灣世界展望會」正式接管埔基。

因為工作過頭無閒，koh考慮tio̍h健康ê因素，謝緯tī 1970年2月請辭兼任埔基院長ê職務，但是iáu照常看診。謝緯兼任院長前後總共14年久，但是義務看診到伊生命ê最後一刻。