《台灣另類牧師．醫師─謝緯》

 | | | 轉寄

803 打開「憐憫之門」

作者 陳金興 2012.01.15

孫理蓮chit段期間除了時常去北門探訪患者以外，有一回iáu特別chhoē謝緯同齊前往鹽鄉。當謝緯來到台南海邊一koá莊頭ê時，禁bē tiâu大tio̍h驚。Hiahê患者痛苦萬分，in向謝緯哀叫，koh要求鋸掉in ê肢體，來解除痛苦。

謝緯看tio̍h chit種情形，心內真m̄ kam，隨時就答應孫理蓮ê邀請，決定beh到當地義診。孫理蓮同時mā對王金河講，她感覺當地ê人真sànchhiah，無力就醫，想beh代先tī hitpêng設一个簡單ê診所，免費替in看病，來 kā chiahê人ê病治好。王金河是在地ê基督徒醫生，孫理蓮就邀請王金河kap謝緯作伙加入烏腳病ê醫治團隊。1960年5月23日正式成立「北門憐憫之門免費診所」（Pakmn̂g Mercy’s Door Free Clinic），簡稱做「免費診所」(俗稱「烏腳病院」)，開始進行包括烏腳病以及沙眼等ê醫療服務。

Tī院務ê安排方面，孫理蓮出資經營（包括經費、診所擴充、設備、計程車費）；王金河出任該免費診所「門診部」kap「住院部」ê主治醫師；謝緯擔任「手術部」ê外科醫師，義務為患者開刀，koh捐贈醫療材料。因為beh興建診所需要一koá時間，所以大tú'á 開始ê時，先借「金河診所」ê部份候診室使用。王金河早起看家己ê門診，下晡看免費診所ê病人。


免費診所開辦了後，來到免費診所看病ê患者，除了免收掛號費以外，包括診療、the̍h藥仔、開刀，甚至toà院，lóng完全免費。因為當時並無起病房，患者卻jú來jú多，致使原來設tī金河診所內底ê空間無夠使用，才計畫籌建病房。1963年1月tī北門嶼教會邊仔ê「憐憫之門免費診所」才起好，hit工落成啟用。



Tùi'ánni了後，免費診所擁有獨立ê看診空間，koh有新ê手術房以及二間病房。因為經費真有限，先起一樓，三年後1966年chiah koh再完成增建二樓以及其他病房。為tio̍h免費診所ē tàng繼續經營，孫理蓮一直負責募款ê工作，尤其是她逐個月寄出幾nā千張ê募款信函去hō͘ 美國kap加拿大ê朋友、機關團體。得到國外來ê捐款，才有辦法提供免費診所病患ê醫藥kap食、住等ê需要。

免費診所ê業務漸漸穩定了後，為tio̍h hō͘ 病患tī醫好了後ē tàng有謀生ê能力，自力更生，由省農復會、台南縣政府、省立手工藝推廣中心kap北門嶼基督長老教會共同推動設立「烏腳病患手工藝訓練班」。該訓練班tī 1963年成立了後，委託由王金河夫人毛碧梅女士一手負責經營，並附設生產中心。1983年孫理蓮因為破病來過身了後，1984年「基督教芥菜種會北門免費診所」就停辦。2006年王金河將「金河診所」捐hō͘ 政府，2007年9月成立「台灣烏腳病醫療紀念館」。