《台灣另類牧師．醫師─謝緯》

 | | | 轉寄

804 北門行腳 來去匆匆

作者 陳金興 2012.01.22

免費診所正式開辦了後，謝緯固定安排tī每禮拜四下晡替患者開刀，其他ê 時間若有病患需要進行截肢手術，無論是thàu風落雨，伊mā是隨時前往義診。6月18日伊為烏腳病患王品開刀，這是此間免費診所第一pái替病人手術。

50冬前，免費診所ê醫療器材無齊全，手術房無冷、暖氣，其他設備mā真簡單。起初王金河用一片材床當做手術台，過chitchām了後，chiah由一位美國外科醫師照伊ê遺願，捐贈一座正式ê手術台。

因為金河診所只有一、二位護士，腳手不足，所以當謝緯替病人開刀ê hit一工，伊會家己tùi南投帶護士、助理以及手術用ê器材、消毒過ê藥紗布同齊前往北門。包括謝綸kap助手劉敬成等醫護人員，早起10點 goā kap謝緯同齊坐計程車tùi南投鎮出發，路中tī嘉義市歇睏食中晝。接近下晡2點chiah來到距離南投鎮約150公里ê北門鄉，開始謝緯接續落來ê診療工作。

謝緯到免費診所了後，lóng會代先巡視 toà院kap teh等門診ê患者，親切kap in請安、安慰。了後lim一杯茶，就行入克難式ê開刀房，khiāteh工作五、六點鐘。往往開刀到三更半暝，tńg來到南投ê時，已經是隔tńg工一、二點。謝緯除了為烏腳病患截肢以外，iáu替列做貧戶ê盲腸炎、脫腸、痔瘡……等病人開刀。患者每禮拜平均差不多五名，有時達到十二ê人。


對tī烏腳病患因為當時醫療技術ê限制，必須截肢，感覺真無奈而且憐憫ê謝緯，tī 1964年1月初4 ê日記中，表露出伊ê痛心： 「今仔日beh去北門，連續三日lóng無tī厝，感覺真thiám。但是，北門有三個烏腳病ê病人tio̍h截肢，最近感覺ánne做kahná是teh破壞身軀，真無願意ánne做，但是koh無新ê治療法。這是一件對患者好ê tāichì，但是我ê內心感覺真失禮，我ê行為kap我ê內心有爭戰，切斷腳koh bē koh生出來。若是二隻腳lóng切掉，感覺非常悲慘，所以我一直teh想，kám無其他新ê治療法。七點工作結束，koh tīhia同齊食晚頓，tńg來到南投，已經10點40分。」

1月30日，又koh到了謝緯前往免費診所ê日子，hit工早起beh出門chìn前，發現家己ê大便是黑色ê。原本想歇睏一工，但是伊想tio̍h有病人等伊去手術，所以伊iáu是去北門。隔工ê排便猶原是黑色ê，謝緯家己診斷，應該是十二指腸潰瘍。