《台灣諺語鹹酸甜》

 | | | 轉寄

三兄弟股一條瓊麻索。

作者 蕭平治 2006.05.14

瓊麻就是龍舌蘭，俗稱樹絲，因為伊樹葉ê 纖維，韌koh m̄ 驚水浸，提來股索仔，堅固耐用，是討海人ê 重要工具，南部出產kài 濟。

用瓊麻股索á是m̄ bat 看過，用黃麻絞索仔，m̄但bat khoàiⁿ，gín'á時代mā bat kap 大人絞過，不過絞 ê是兩股ê 索仔，絞三股ê 就無hit款功夫。

過去生活tī 庄腳ê 作穡人，擔擔（taⁿtàⁿ）ê 畚箕、米lôa ài 縛索仔，載貨、縛柴ài 用索仔liāu ，牽牛、駕kha 車、駛田、捆豬、拖車…步步lóng tio̍h用索仔，索仔tī 田庄所在是生活必須品。細條索仔用雙手撚，抑是tiàm 腳頭 u 搓就會使chit ，大條索若無用家私頭仔來股，是無可能ê 代誌，過去作田人若有閒工，就三、五個招leh ，互相tàu 相仝，phah幾條á索á khǹgleh thang 用。

股索仔ài 用絞索仔機，he 是一套用木材做ê 工具，前車是四角型ê 框架，kah 黏tī 椅條頂，有三kâi 孔，穿三支ㄣ字形ê 鉸仔，前面會tàng結索仔，後面用一塊竹phòe 鑽三kâi 孔，拄好loptī 三支絞á，thiòng'á 三支同齊股tín 動；後車kannā 一支柴柱，半人koân ê 所在鑿（chha̍k）一孔，共款穿一支ㄣ字形ê 絞仔；另外有一粒羊仔頭形ê tēng 柴，刻三條溝，beh hō͘ 三股ê 黃麻khòa tī 溝內，chiah 會tàng平平順順、pêⁿpêⁿ 正正股成一條索仔。

股索仔tio̍hài 三個人，一個hōaⁿ 前車，顧hit 三支絞仔ê 運轉，絞正絞，一個固定後車，用倒手挽hit 支柴柱hō͘ 固定，koh著用正手股絞仔，而且ài 倒絞，另外一個hōaⁿ 羊仔頭，hōaⁿ 羊仔頭chiah 是師傅，索仔絞會súi lóng著靠伊ê 功夫kap 指揮。

Chitmái 開始beh 絞索仔lò͘：前車先絞一支絞仔，師傅提黃麻皮套tiàm 絞仔頭，然後一皮一皮紡，紡一條五丈長ê 無股ê 索仔，chiah koh紡一條兩丈半ê，五丈 ê拗做兩koe̍h，套tī 後車，尾節套tī 前車，chitmá 前車三支絞仔縛三條索，後車一支絞仔mā縛三條索，師傅掠羊仔頭ùi 前車hit 旁套好勢，然後一聲開始，前後車股無停，師傅hōaⁿ羊仔頭順索á股一直倒退lu ，後車一直股一直hō͘ 索仔khiú晉前，手挽腳kēng，驚做索仔siuⁿ lēng ，索á若siuⁿ lēng ，絞khit 來ê 索仔一定phàⁿphàⁿ，bē 堅固耐用。

後車ná會行晉前neh？因為索仔愈絞愈ân soah愈絞愈短，本來是兩丈半，絞好可能chhun 兩丈兩尺，kiu 三尺算真正常。一條絞好chiahkoh絞一條，beh 大beh 細，由在師傅斟酌soah 黃麻，黃麻若soah濟，索á自然大條，黃麻若soah少，索á當然細條，若是絞兩股ê 索á就khah簡單，可惜bē勇mā khah pháiⁿ看頭，he 是師á工學絞，絞chhitthô ê。

「三兄弟股一條瓊麻索」，若有和協會齊，he 是真簡單，團結就是力量，看田庄人絞索á就是上好ê 證明，早當時阮田庄兄弟leh 絞索仔，無一定是親兄弟，卻是合作團結ê 力量是無teh 比，因為庄內ê 厝邊隔壁lóng若親兄弟，過去ê 庄腳人，m̄ 免去強調啥物『敦親睦鄰，守望相助』，庄頭ê 安全就顧kah 好勢好勢，時代leh 變，社會一直變遷，古早味，古早ê 人情味，使人懷念。

「三兄弟絞一條黃麻索」ê 『團結力量』，會tàng hō͘ 有心愛台灣ê 鄉親兄弟做參考，「團結」ê 台灣，chiah 是有向望 ê。

【註解】： 1.瓊麻：khêngmôa。2.纖維：chhiamûi。3.韌：jūn。4.股：kó͘。絞。5.索仔：[繩子]。6.kài 濟：真濟。7.擔擔：taⁿtàⁿ。8.米lôa ：米籮。9.liāu ：[纏繞著綁物]。10.kha 車：駕牛ê 器具。11.步步：ta̍k項。12.撚：lián 。13.腳頭 u ：[膝蓋]。14.搓：so。15.家私頭仔：工具。16.khǹgleh thang 用：[放著備用]。17.kah 黏tī 椅條頂：[架在長板凳上]。18.三kâi 孔：三個洞。19.竹phòe ：[竹片]。20.lop tī ：[套進在…]。21.thiòng'á ：thènghó(聽好），可以。22.戳：chha̍k ，鑿。23.tēng 柴：[硬木頭]。24.khòa tī ：[擱置在…]。25.hōaⁿ 前車：操作機器叫hōaⁿ。26.絞正絞：[右旋轉]。27.挽：bán，[用力挽住]。28.正手：[右手]。29.倒絞：[反轉]。30.無股ê 索仔：親像大條紗仔。31.拗做兩koe̍h ：[折成兩節]。32.倒退lu ：[倒退走]。33.khiú：giú 、[拉]。34.手挽腳kēng ：[手腳並用、穩住木柱]。35.傷lēng ：[太鬆了]。36.phàⁿphàⁿ ：[鬆鬆的，不夠堅固]。37.ân ：[緊]。38.kiu：[縮]。39.soah 黃麻：[一片一片加黃麻下去]。40.bē 勇：[不堅固耐用]。41.和協會齊：[同心協力]。