《哈佛台語筆記》

 | | | 轉寄

弱勢ê多數語族：Holo語族

作者 李勤岸 2008.07.13

「多元族群與文化發展會議」第一工 ê 會議中，客委會報告書及某引言人講：若用「台語」這個詞來替代「國語」就是「以暴易暴」，應該使用「閩南語」或者「福台語」，若 beh 制訂共通語應當使用「最大公約數」ê 華語。雖然與會者大部分攏 kā 反對，並無共識，m̄ koh 媒體大肆渲染，講這是「多元族群與文化發展會議」ê 建議。
就語言學來講，一個語言 ê 名稱有伊一定 ê 學術依據，或者是歷史因素自然形成；退一萬步來講，若不得不更改一個語言 ê 名稱不可，猶是 ài 尊重 hit 個語族 ê 命名自主權，這是最最起碼 ê 現代人權觀念。
一定 ài 強迫別人更名換姓敢講 m̄ 是「壓霸」ê 做法？m̄ 是「以暴易暴」？假使 khiā tī 語言平等原則 tī 承認國內主要 ê 十 gōa 種語言（包括華語），攏是國家語言了後，又 koh 制訂華語做共通語，這個共通語必然又 koh 成做位階獨尊 ê「國語」，若按呢就完全失去制訂語言發展法 ê 平等精神。咱真歡喜親耳聽著游院長講：「共通語在無全民共識進前，bē 用法律強制制訂」，若無，現行華語獨尊 ê 語言政策以前並無法源 ê 依據，如今咱顛倒將伊合法化，kiám m̄ 是 koh khah 慘？Kiám m̄ 是行翻頭路，害台灣倒退數十年？
最後一工整理出來 ê 文建會報告書裡，講福佬語族是優勢文化，不宜倡議 Holo 學院、Holo 語言事務委員會。這是極普遍 ti̍k ê 一個錯誤刻板印象。人口濟少及語言文化是 m̄ 是優勢，並無必然成正比。愛爾蘭百分之九十以上講蓋爾語，但是因為長久被英國殖民，蓋爾語 soah 成做弱勢語言，tú 獨立 ê 時全國無到百分之三是蓋爾語 ê 母語人口，因此愛爾蘭政府特別成立部會級 ê「國家語言事務委員會」來從事蓋爾語 ê 復振工作，現今全國已經有三分之一 ê 人會曉講蓋爾語。
Holo 語族就人口來講，雖是多數語族，卻是多數 ê 弱勢語族。到底有偌弱勢，因為咱國家連最起碼 ê 全國性語言人口普查 to 無做過（愛爾蘭 to̍h 定期舉行），咱其實並無十分清楚，只好引述葉菊蘭 ê 名言講：「Holo 話已經 teh 掛號看病 ah。」假使是強勢，哪著需要去掛號看病？而且，掛號了後檢查結果如果出來，無定著已經得著絕症 neh。Tī 原住民學院、原民會及客家學院、客委會成立以後，原住民語及客語 ê 復振明顯改善。咱若無 beh 設立專責機構來救存 Holo 話，反倒轉一再以無實在 ê 刻板印象去 kā 忽視，咱 théng 好預期伊真緊就會變成台灣上緊消失 ê 語言。假使政府 ê 政策若是傾向 beh 裁併部會，按呢，就學習愛爾蘭，成立一個「國家語言事務委員會」，將原民會、客委會併入來，趕緊來做這個救亡圖存、起死回生 ê 大工程！
─ 2004.10.27 自由廣場