《哈佛台語筆記》

 | | | 轉寄

包容差異 kap 族群和諧

作者 李勤岸 2008.07.20

br>
前幾工參加「多元族群與文化發展會議」。整體來講，這是相當成功 ê 一次國家會議。政府誠意十足，承辦單位認真，與會者發言熱烈，建言有建設性。咱 ài hō͘ 這次會議肯定 ê 掌聲！行政院長游錫 tī 閉幕式 ê 時已經宣示，以後 ta̍k 年攏 beh 舉辦，因此這次會議應當是「第一屆國家族群與文化會議」。
這個會議原先是因應總統大選後引起 ê 族群緊張，陳水扁總統真重視，因此 chiah 指示行政院舉辦族群文化會議。M̄ koh，總統大選後最強力發表族群意見 ê「族群平等聯盟」並無與會，這 bē tàng 無講是這次會議美中不足 ê 所在。M̄ 知是無受著邀請抑是拒絕出席？若是無受邀，就是承辦單位 ê 疏忽；抑是刻意迴避。若是疏忽，猶會使原諒，假使若是刻意迴避，就真不智。既是對族群平等有強烈意見，kiám m̄ 是族群會議最需要出席面對面溝通 ê 對象？既然大會會 tàng 邀請「愛國同心會」會長周慶峻來參與，因何漏掉「族盟」代表？周先生所帶領 ê 團體雖然平時示威抗議常有無守法 ê 暴力行為，但是這次來參加，表現卻相當理性溫和，平心靜氣 kap 無仝意見 ê 人對話，甚至最後 mā 同意講若是台灣公投獨立，伊也 bē 反對，會後也會 tàng 謙和禮讓、互相寒暄。民主社會 kiám m̄ 是 ài 親像按呢？Kiám m̄ 就是 ài thang 提供公開場域 hō͘ 無仝意見 ê 人放棄暴力，進行理性辯論？
綜合討論由行政院副院長葉菊蘭主持。主題是「追求包容差異、族群和諧 ê 多元文化社會」。其實，咱 beh 追求 ê m̄ tan 是包容差異，咱 beh 追求是欣賞差異。包容只是退而求其次 ê 忍耐。比如講，tī 強調多元文化 ê 這個會議 soah 無法度 hō͘ 各族群代表 ê 語言呈現多元，顛倒為著包容，使用單一 ê 聲音發言。強調差異 chiah 有法度呈現多元文化，就親像文建會主委陳其南所講：「只有差異才是文化」。若是強調包容就可能是大熔爐式 ê 融合，結果就是弱勢文化被強勢文化同化，這是老舊落伍 ê 文化觀，新 koh 進步 ê 文化觀是馬賽克式 ê 大拼盤文化，多音交響 koh 和諧無比，宛如原住民 ê 八部合音，咱應當時常強調差異，hō͘ 差異時常 hō͘ 人看著、聽著，年久月深就慣勢 ah，慣勢就會曉包容，會得 thang 互相了解、互相欣賞，這 chiah 是咱真正 beh 追求 ê 一個有多元文化資產 ê 國家。咱非常歡喜主席葉菊蘭副院長欣然接納建言，答應後擺會議一定 beh 準備同步翻譯，hō͘ 與會者會 tàng 用母語充分表達，講出 in 所想 beh 講 ê，表現咱國家豐富 ê 多語多文化 ê 特色。