《耶穌言行錄》

| | | 轉寄

Tē 62chiuⁿ,Bo̍kchiá

作者 Ko Kimseng. 2009.06.14

（Iokhān 10：118）
Hoānnā chòe hó ê bo̍kchiá sī putchí sòejī chiàukò͘ iûⁿ.Kiámchhái ū iûⁿ bêlō͘ sitlo̍h，kínkín khì chhē，chhē tio̍h chiū putchí hoaⁿhí pē i tòlâi.Lán chiūsī chhinchhiūⁿ iûⁿ sitlo̍h，Iâso͘ chiūsī chhinchhiūⁿ hó ê bo̍kchiá，tùi thiⁿ kànglo̍h chhē lán tòtńg，lâi kiù lán.Sèngchheh kóng，"Jînchú tiâutî lâi kiù hit hō íkeng sitlo̍h ê lâng. "

Hó ê bo̍kchiá bô iàukín kakī ê siⁿmiā，sī chiàukò͘ i ê iûⁿ.Chāichá Tāipi̍t siàuliân ê sî，tī Peklīhêng teh kò͘ i ê lāupē ê iûⁿ.Ū chi̍t ji̍t，hutjiân ū chi̍t chiah sai lâi beh kā iûⁿ khì；Tāipi̍t chiū khì tui i，phah i sí，lâi kiù hit chiah iûⁿ.Hîm lâi kā iûⁿ，Tāipi̍t ia̍h káⁿ phah hîm sí.

Iâso͘ kamgoān ēng sìⁿmiā khì kiù I ê iûⁿ；I inūi sèkan lâng ê chōe，kamgoān kakī siūsí lâi kiù lâng thoatlī Mô͘kúi ê chhiú，chhinchhiūⁿ chhut sai ê chhùi.Sèngchheh kóng，"Mô͘kúi sī chhinchhiūⁿ háu ê sai，teh chhē khòaⁿ ū simmi̍h thang chia̍h. "

Hó ê bo̍kchiá ta̍k chákhí chhōa iûⁿ khì chhē ū chháu ê só͘chāi lâi chia̍h，kéng chhengchúi ê só͘chāi hō͘ in lim.Iâso͘ iúⁿchhī I ê ha̍kseng ê simsîn ia̍h sī ánni.Tāipi̍t ū kóng，"Iâhôhoa sī góa ê bo̍kchiá，só͘í góa bô khiàmkheh，hō͘ góa tiàm tī phangchháu ê hoehn̂g，chhōa góa kàu chhengchúi ê khoe. "

Hó ê bo̍kchiá putchí sòejī chiàukò͘ iûⁿ'ákiáⁿ，khòaⁿ i bōe kiâⁿ，chiū phō i.Iâso͘ ia̍h sī ánni；I sī putchí thiàⁿ sòekiáⁿ，chhinchhiūⁿ I tùi ha̍kseng kóng，"Iôngún sòekiáⁿ chiūkūn góa，bo̍htit kim i. "Ísàia kóng，"I chiàukò͘ pehsìⁿ chhinchhiūⁿ iûⁿ，phō iûⁿ'ákiáⁿ tī hengchêng. "

Bo̍kchiá ūsî tī iûⁿkûn ê tiongkan kéng kúi chiah iûⁿ，kó͘chui ê，ēng àisioh ê mâi lâi hō in，putchí sòejī chiàukò͘ in，kàu ta̍k ê jīntit kakī ê mâi，bo̍kchiá kiò i， i chiū lâi；Iâso͘ chiū ēng chit hō ê tāichì phìjū I putchí thiàⁿsioh I ê ha̍kseng.Nāsī Kiùchú chòe lán ê bo̍kchiá，m̄ sī tī iûⁿkûn ê tiongkan kéng kúi ê lâi pósioh，sī lóngchóng hō͘ I kéng，lóngchóng hō͘ I pósioh；I ōe jīntit ta̍k ê miâ，ta̍k ê ia̍h ōe jīntit I ê siaⁿ，ái tè I.

Lán engkai tio̍h kiû Siōngtè hō͘ lán ji̍p I ê iûⁿkûn，tit tio̍h Iâso͘ chòe lán ê bo̍kchiá.Iâso͘ tùi I ê ha̍kseng kóng，"Lin sòe kûn iûⁿ m̄ sái kiaⁿ；inūi lín ê Thiⁿpē tehbeh chiong I ê kok siúⁿsù lín. "

思羅安台語點字網站