《台語家庭》

 | | | 轉寄

我siōng愛去chhitthô ê所在 (22)

作者 Lí Chhengchheng 2006.12.10

﹝Iánkáng kó 演講稿﹞
Góa siōng ài khì chhitthô ê só͘chāi
我siōng愛去chhitthô ê所在 (22)

Choânlôbûn Chokchiá: Lí Chhengchheng
全羅文作者：李青青
(台中教育大學附設實驗小學4年生，2006.11.29寫)
Kàutùi, phahjī, Hànlôbûn hoansiá: Ông Hōebûn
校對、phah字、漢羅文翻寫：王薈雯

Amá chú ê chhài sī siōng hó chia̍h ê, liân hó chia̍h ê gûpâi mā bôhoattō͘ pí. Amá ta̍kpái lóng ê chú akong chèng ê chhài, akong chèng ê chhài putchí'á hó chia̍h, koh bô lôngio̍h, jīchhiáⁿ akong chèng ê chhài ū chin chōe êngióng, gún ta̍kke lóng chiok ài chia̍h ê.

Amá煮ê菜是siōng好食 ê,連好食 ê牛排mā無法度比。Amá ta̍kpài lóng會煮a公種ê菜，a公種ê菜putchí'á好食，koh無農藥，而且a公種ê菜有chin chōe營養，阮ta̍k家lóng chiok愛食 ê。

Akong ū ê sîchūn ē chhōa gún khì bóe mi̍hkiāⁿ, góa kap chéché thiaⁿ tio̍h beh khì bóe mi̍hkiāⁿ, lóng chiok hoaⁿhí ê, inūi gún siūⁿ beh bóe siáⁿmi̍h bûnkū, lóng ē sái ê. Ta̍kpái gún lóng bóe chiok chē, inūi akong lóng kóng: "Bōe iàukín, ē sái thàn chin chē chîⁿ." Amá lóng kóng i sī "Tionghôabînkok ê bíthâng". Chiok hósńg ê.

A公有ê時chūn會chhōa阮去買物件，我kap姊姊聽著beh去買物件lóng chiok歡喜 ê,因為阮想beh買什麼文具，lóng會使 ê。Ta̍kpái阮lóng買chiok chē，因為a公lóng講：「Bē要緊，會使thàn chin chē錢。」Amá lóng講伊是「中華民國ê米蟲」。Chiok好sńg ê!

Góa siōng kahì khì amá tau sńg ah! Hia khongkhì chin hó, koh ū chin chē hósńg ê só͘chāi, jīchhiáⁿ akong kap amá tùi gún chiok hó ê. Só͘í, góa siōng kahì khì amá tau chhitthô!

我siōng kahì去amá tau sńg ah！Hia空氣chin好，koh有chin chē好sńg ê所在，而且a公kap amá對阮chiok好 ê。所以，我siōng kahì去amá tau chhitthô！

Góa ê iánkáng kàu chia kiatsok. Tosiā ta̍kke !

我ê演講kàu chia結束。多謝ta̍k家！