《巴克禮普世版聖經（試讀本）》

 | | | 轉寄

巴克禮普世版（試讀本） 腓利門書第一章

作者 巴克禮普世版小組 2016.05.08

1 Góa sī Pólô, ūi tio̍h Kitok Iâso͘ lâi chiâⁿchò siûhoān. Góa kah lán ê hiaⁿtī Thêmô͘thài siá phoe hō͘ goán só͘ thiàⁿ ê tângkang Huilībûn, 2 Ahuia chímōe kah goán ê chiàniú Akipò͘, íki̍p tī lín tau teh chūhōe ê kàuhōe. 3 Goān lán ê ThiⁿPē SiōngChú kah Chú Iâso͘ Kitok sù lín untián kah pêngan!

Huilībûn ê Thiàⁿsim kah Sìnsim
4 Góa múipái kîtó ê sî lóng ū siàuliām lí, siôngsiông kámsiā góa ê SiōngChú, 5 inūi thiaⁿ tio̍h lí tùi SiōngChú ê chúbîn ū thiàⁿsim, tùi Chú Iâso͘ ū sìnsim. 6 Góa khúnkiû SiōngChú, thongkòe goán kah lín hunhióng kiōngtông ê sìngióng, hō͘ lán ē tàng kohkhah chhimchhim théhōe kah Kitok kiatliân só͘ tit tio̍h itchhè ê chiokhok. 7 Hiaⁿtī ah, lí ê thiàⁿsim hō͘ góa ū chintōa ê hoaⁿhí kah kó͘lē, só͘ū ê sìntô͘ mā tùi lí tit tio̍h keklē.

Ūi Onîsebó͘ Kîkiû
8 Góa suijiân ē tàng khò Kitok lâi hótáⁿ bēnglēng lí chò engkai chò ê tāichì. 9 M̄ koh inūi siothiàⁿ ê iânkò͘, góa lêngkhó kā lí chhéngkiû. Góa íkeng nîlāu, chitmá iáukoh ūi tio̍h Kitok Iâso͘ teh siū koaiⁿkaⁿ. 10 Góa thè Onîsebó͘ ǹg lí chhéngkiû, i sī góa tī kòa thihliān ê sî só͘ seⁿ.ê. 11 I íchêng tùi lí lóng bô lō͘ēng, taⁿ tùi lí kah góa lóng ū lō͘ēng. 12 Góa chhephài i koh tńgkhì lí hia, i sī góa ê simpak. 13 Góa púnlâi siūⁿbeh kā i lâu tòa góa chia, thang tī góa ūi tio̍h hokim teh kòa thihliān ê sî thang thè lí lâi ho̍ksāi góa. 14 M̄ koh góa ǹgbāng itchhè lóng chhut tī lí ê kamsim lo̍kì, lóng bô biánkióng, só͘í nā bô lí ê tôngì, góa chi̍thāng mā bô beh chò. 15 Kiámchhái inūi ánne, Onîsebó͘ chiāmsî līkhui lí, sī beh hō͘ i koh tńgkhì kah lí éngoán chòhóe tòa. 16 I bô kohchài chò lô͘lē, i ê sinhūn chhiaukòe lô͘lē, sī lán só͘ thiàⁿ ê hiaⁿtī. Tùi góa lâi kóng i khaksi̍t sī ánne, tùi lí lâi kóng kohkhah sī ánne. Chitmá i m̄ nā sī lí kelāi ê lâng, mā sī Chúlāi ê hiaⁿtī. 17 Só͘í lí nā siūⁿkóng góa sī lí ê tângphōaⁿ, tio̍h chhinchhiūⁿ chiapla̍p góa ánne kā i chiapla̍p. 18 I nā ū tùiputkhí lí ê só͘chāi, á sī khiàm lí símmi̍h, thang lóng sǹg góa ê siàu. 19 Góa Pólô chhinchhiú siá, góa hūchek hêng. Nāsī koanhē góa kiù lí ê lênghûn, góa m̄ bián kā lí kóngkhí lí só͘ khiàm góa ê chè. 20 Só͘í hiaⁿtī ah, inūi Chú ê iânkò͘, góa pàithok lí tàukhachhiú chi̍tē. Lán pêⁿpêⁿ sī Kitoktô͘, kiû lí káitû góa ê chengsîn hūtam. 21 Góa chhim sìn lí ē thiaⁿ góa ê ōe, chiū siá phoe hō͘ lí. Kîsi̍t góa chai lí ē chò pí góa só͘ kóng ê khah chē. 22 Mā tio̍h chúnpī só͘chāi hō͘ góa tòa, inūi góa ǹgbāng SiōngChú ē thiaⁿ lín ê kîtó, hō͘ góa ē tàng khì lín hia.

Chòeāu ê Chhéngan
23 Ūi tio̍h Kitok Iâso͘ kah góa chòhóe teh koaiⁿkaⁿ ê Ípahut kā lín chhéngan. 24 Góa ê tângkang Mákhó, Alíta̍tkó͘, Tímá kah Lō͘ka mā beh kā lí chhéngan. 25 Goān Chú Iâso͘ Kitok ê untián kah lín tôngchāi! Amen.