《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第八章

作者 巴克禮普世版小組 2013.11.24

Hoān Kanîm ê Chabó͘lâng
1 Chènglâng lóng tńgkhì in tau, m̄ koh Iâso͘ khì Kannásoaⁿ. 2 Kehtńg chákhí thàuchá, Iâso͘ koh khì sèngtiān, kûnchiòng lóng lâi I hia, I chiū chē lo̍hlâi kā in kàsī. 3 Kengha̍kkàusu kah Hoatlīsàiphài ê lâng chhōa chi̍tê chabó͘lâng lâi, i teh kiâⁿ kanîm ê sî hō͘ lâng lia̍h tio̍h. In hō͘ i khiā tī tiongng, 4 In chiū tùi Iâso͘ kóng, "Lāusu, chitê chabó͘lâng sī túteh kiâⁿ kanîm ê sî hō͘ lâng lia̍h tio̍h. 5 Mô͘se ê lu̍thoat bēnglēng lán, tio̍h ēng chio̍hthâu kā chitchióng chabó͘lâng tìmsí, taⁿ Lí siūⁿ ánchóaⁿ?" 6 In kóng ánne sī beh chhìthàm Iâso͘, àibeh chhōe khangphāng kā I kò. Iâso͘ chiū àⁿ lo̍hkhì, ēng chéngthâu'á tī thô͘kha siájī. 7 M̄ koh in itti̍t mn̄g bē soah. Iâso͘ chiū khiā khílâi tùi in kóng, "Lín tiongkan bô chōe ê lâng thang seng ēng chio̍hthâu kā i tìm." 8 Iâso͘ koh àⁿ lo̍hkhì, ēng chéngthâu'á tī thô͘kha siájī. 9 In thiaⁿ tio̍h chiahê ōe liáuāu, tùi lāuê kàu siàuliânê, chi̍tê chi̍tê liu chhutkhì. Chhun Iâso͘ kakī chi̍tê lâu tī hia. Hitê chabo͘lâng iûgoân khiā tī tiongng. 10 Iâso͘ khiā khílâi kā i kóng, "Chabó͘lâng ah, in hiahê lâng khì tī tóūi? Bôlâng kā lí tēngchōe sībô?" 11 Chabó͘lâng ìn kóng, "Siansiⁿ ah, bô pòaⁿ lâng." Iâso͘ kóng, "Góa mā bô beh kā lí tēngchōe, lí thang tńgkhì, taⁿ íāu m̄ thang koh hoānchōe."

Iâso͘ Sī Sèkan ê Kng
12 Iâso͘ koh tùi kûnchiòng kóng, "Góa sī sèkan ê kng. Tòe Góa ê lâng bô tī o͘àm tiong sengoa̍h, tiantò ē ū oa̍hmiā ê kng." 13 Hoatlīsàiphài ê lâng chiū kā I kóng, "Lí teh ūi kakī chò kiànchèng, Lí ê kiànchèng bô hāu." 14 Iâso͘ ìn kóng, "Góa suijiân ūi kakī chò kiànchèng, Góa ê kiànchèng mā sī ū hāu, inūi Góa chai kakī tùi tóūi lâi, beh khì tóūi. Lín m̄ chai Góa tùi tóūi lâi, beh khì tóūi. 15 Lín ēng lâng ê phiauchún phòaⁿtoàn lâng. Góa bô kā lâng phòaⁿtoàn. 16 Góa nā phòaⁿtoàn lâng, Góa ê phòaⁿtoàn sī chèngkhak ê, inūi Góa m̄ sī kakī teh símphòaⁿ, sī chhephài Góa lâi ê ThiⁿPē kah Góa chòhóe símphòaⁿ. 17 Koh kóng chiàu lín ê lu̍thoat ê kìchài, Ū nn̄g lâng ê kiànchèng chiū ū hāu. 18 Góa ūi kakī chò kiànchèng, chhephài Góa lâi ê ThiⁿPē mā ūi Góa chò kiànchèng." 19 In chiū mn̄g Iâso͘ kóng, "Lí ê ThiⁿPē tī tóūi?" Iâso͘ ìn kóng, "Lín m̄ bat Góa, mā m̄ bat Góa ê ThiⁿPē. Lín nā bat Góa, mā ē bat Góa ê ThiⁿPē." 20 Iâso͘ tī sèngtiān kàsī lâng, tī hōnghiànsiuⁿ ê piⁿ'á kóng chiahê ōe, m̄ koh bôlâng kā I lia̍h, inūi I ê sî iáubōe kàu. 21 Góa Beh Khì ê Só͘chāi Lín Bē tàng Khì Iâso͘ koh kā in kóng, "Góa beh līkhui à, lín ē chhōe Góa, m̄ koh lín ē ūi tio̍h kakī ê chōe lâi sí. Góa khì ê só͘chāi, lín bē tàng khì." 22 Hiahê Iûthàilâng kóng, "I kóng, ' Góa khì ê só͘chāi, lín bē tàng khì.' Kám kóng I beh khì chūsat?" 23 Iâso͘ kā in kóng, "Lín sī tùi ē bīn lâi, Góa sī tùi téngbīn lâi. Lín sī sio̍k tī chit sèkan, Góa bô sio̍k chit sèkan. 24 Só͘í Góa chiah kā lín kóng, lín ē ūi tio̍h kakī ê chōe lâi sí, inūi lín nā m̄ sìn Góa chiūsī Hitūi, lín ē sí tī lín ê chōeok tiong." 25 In chiū mn̄g Iâso͘, " Lí sī siáⁿlâng?" Iâso͘ ìn kóng, "Góa tùi khíthâu to̍h kā lín kóng kòe à. 26 Koanhē lín ê tāichì, Góa ū chinchē thang kóng, thang kā lín tēngchōe, m̄ koh chhephài Góa lâi Hitūi sī chinsi̍t. Góa kā tùi I só͘ thiaⁿ tio̍h ê thoân hō͘ sèkanlâng." 27 In bô liáukái Iâso͘ tùi in kóng ê sī teh chí ThiⁿPē. 28 Só͘í Iâso͘ kā in kóng, "Lín kúkhí Jînchú ê sî, chiū chai Góa sī Hitūi. Góa só͘ chò ê tāichì bô chi̍t hāng sī chiàu kakī ê ìsù, lóng sī chiàu ThiⁿPē kàsī Góa ê lâi kóng. 29 Chhephài Góa lâi Hitūi kah Góa tôngchāi, I bô pàng Góa kakī chi̍tê tīteh, inūi Góa putsî teh chò I só͘ hoaⁿhí ê tāichì." 30 Iâso͘ kóng chiahê ōe ê sî, ū chinchē lâng sìn I.

Chūiû ê Lâng kah Lô͘lē
31 Iâso͘ chiū tùi sìn I ê Iûthàilâng kóng, "Lín nā siôngsiông chunsiú Góa ê tōlí, chiū chinchiàⁿ sī Góa ê bûntô͘. 32 Lín ē bat chinlí, chinlí ē hō͘ lín tit tio̍h chūiû." 33 Hiahê lâng ìn I kóng, "Goán sī Apekla̍hhán ê kiáⁿsun, chiônglâi m̄ bat chò lâng ê lô͘lē, lí náē kóng, ' Lín ē tit tio̍h chūiû?" 34 Iâso͘ ìn kóng, "Góa si̍tchāi kā lín kóng, hoānchōe ê lâng chiūsī chōe ê lô͘lē. 35 Lô͘lē bô éngoán sio̍k tī chúlâng ê katêng, kiáⁿ chiū éngoán sio̍k hitê katêng. 36 Só͘í SiōngChú ê Kiáⁿ nā hō͘ lín chūiû, lín chiū chinchiàⁿ chūiû. 37 Góa chai lín sī Apekla̍hhán ê kiáⁿsun, m̄ koh lín siūⁿbeh thâi góa, inūi lín m̄ chiapsiū Góa ê tōlí. 38 Góa sī chunchiàu Góa tùi ThiⁿPē hia khòaⁿ tio̍h ê lâi kóng. Lín sī tùi lín ê pē hia thiaⁿ tio̍h ê lâi chò."

39 Hiahê lâng ìn I kóng, "Goán ê chó͘sian sī Apekla̍hhán." Iâso͘ kā in kóng, "Lín nā sī Apekla̍hhán ê kiáⁿsun, lín ē chò Apekla̍hhán só͘ chò ê tāichì. 40 Taⁿ Góa chiong tùi SiōngChú só͘ thiaⁿ ê chinlí lâi kā lín kóng, lín soah beh thâi góa. Apekla̍hhán pēngbô chò chit khoán tāichì. 41 Lín sī teh chò lín ê pē só͘ chò ê tāichì." Hiahê lâng ìn kóng, "Goán m̄ sī putgī ê kiáⁿjî. SiōngChú sī goán îit ê ThiⁿPē." 42 Iâso͘ kā in kóng, "SiōngChú nā chinchiàⁿ sī lín ê ThiⁿPē, lín ē thiàⁿ Góa, inūi Góa sī tùi SiōngChú hia lâi ê, chitmá tī chia. M̄ sī chiàu Góa kakī ê ìsù lâi, sī SiōngChú chhephài Góa lâi.ê. 43 Lín náē bē bêngpe̍k Góa ê ōe? Sī inūi Góa ê tōlí lín thiaⁿ bē ji̍pkhì. 44 Lín ê pē sī Mô͘kúi, lín kantaⁿ siūⁿbeh si̍thêng lín lāupē ê suio̍k. I chū khíthâu to̍h sī thâilâng ê hiongchhiú, bô chunsiú chinlí, inūi i simlāi bô chinlí. Kóng pe̍hchha̍t sī i ê púnsèng, inūi i sī kóng pe̍hchha̍t ê lâng, mā sī kóng pe̍hchha̍t ê lāupē. 45 Inūi góa kóng chinlí, lín m̄ sìn Góa. 46 Lín tiongkan siáⁿlâng ē tàng chíchek Góa ū chōe? Góa nā kóng chinlí, lín náē m̄ sìn Góa? 47 Sio̍k SiōngChú ê lâng thiaⁿ SiōngChú ê ōe. Lín m̄ thiaⁿ, inūi lín m̄ sī sio̍k SiōngChú ê lâng."

Iâso͘ kah Apekla̍hhán 48 Hiahê Iûthàilâng ìn Iâso͘ kóng, "Goán kóng Lí sī Satmálīalâng, koh hō͘ siâsîn hūsin, kám m̄ tio̍h?" 49 Iâso͘ ìn kóng, "Góa m̄ sī hō͘ siâsîn hūsin, Góa sī chunkèng Góa ê ThiⁿPē, m̄ koh lín tiantó bújio̍k Góa. 50 Góa bô kiû kakī ê êngkng. m̄ koh ū chi̍tê teh thè Góa kiû koh chò chithāng tāichì ê símphòaⁿchiá. 51 Góa si̍tchāi kā lín kóng, Lâng nā chunsiú Góa ê tōlí, chiū éngoán bē sí." 52 Hiahê Iûthàilâng ìn kóng, "Taⁿ goán chai Lí sī hō͘ siâsîn hūsin, Apekla̍hhán sí, chèng sianti mā sí, m̄ koh Lí kóng, 'Lâng nā chunsiú Góa ê tōlí chiū éngoán bē sí!' 53 Lí kám ē pí goán ê chó͘sian Apekla̍hhán khah úitāi? I íkeng sí, chèng sianti mā sí. Lí siūⁿkóng Lí sī siáⁿlâng?" 54 Iâso͘ ìn kóng, "Góa nā êngkng kakī, góa ê êngkng chiū bô kèta̍t. Êngkng Góa ê sī Góa ê ThiⁿPē, chiūsī Hitūi lín só͘ kóng ê sī lín ê SiōngChú. 55 Lín m̄ bat I, m̄ koh Góa bat I. Góa nā kóng Góa m̄ bat I, Góa chiū kah lín kāngkhoán sī pe̍hchha̍t, m̄ koh Góa bat I, mā chunsiú I ê tōlí. 56 Lín ê chó͘sian Apekla̍hhán hoaⁿhí teh thènghāu Góa lâilîm ê ji̍tchí, i ū khòaⁿ tio̍h, khòaⁿliáu chin hoaⁿhí." 57 Hiahê Iûthàilâng tùi Iâso͘ kóng, "Lí iáubōe gō͘cha̍p hòe, kám bat khòaⁿ tio̍h Apekla̍hhán?" 58 Iâso͘ ìn kóng, "Góa si̍tchāi kā lín kóng, Apekla̍hhán iáubōe chhutsì, Góa to̍h chûnchāi." 59 Hiahê Iûthàilâng chiū the̍h chio̍hthâu beh kā I tìm, m̄ koh Iâso͘ siámkhui, tùi sèngtiān chhutkhì.