《《陳夫人》日譯台e5台灣小說 第二部》

 | | | 轉寄

《陳夫人》第二部 親子 第十六章

作者 庄司總一著 賴永祥指導 林俊育台譯 2017.02.19

陳家ê人漸漸去接近清文ê農場。

這並m̄是因為掠tio̍h lâlí'á ê宣傳效果，是因為清文kah安子想beh建立khah好ê生活品質ê意志，對陳家ê人成做牽引力。

優雅ê別莊式ê厝，樓腳用大柴搭架ê大廳有十坪，樓頂有三間日本式ê thathamih房間。清文in tiāⁿtiāⁿ來chia度周末，到假日ê時，tī台北讀高等學校ê阿明kah tī東京讀私立大學ê景仁mā會來，大家聚集做伙真鬧熱。大家tī大廳話仙，聽唱片á是收音機。安子種ê菜蔬—tho͘máto͘h（譯註：華語ê番茄）、洋蔥、荷蘭豆等等，新鮮koh豐富。鳳梨當然免講，其它iáu有檨á、kin蕉、木瓜、蓮霧、白柚....ta̍k季節ê水果lóng食會tio̍h。Tī厝內若久來會倦，ē tàng去外面散步。Chia kah市內無仝，暗時涼風吹來，山附近安靜kah真爽快。

農場hiahni̍h吸引厝裡ê人，清文kah安子原本無想像tio̍h, ánne真好。起初in無ánne計畫, soah自然而然想tio̍h chit種效果。大概是因為台南地方四kho͘ 圍lóng是平原，缺乏地形ê變化；台南州內kantaⁿ有一位溫泉，mā是tī真遠無方便ê所在。雖然是古都，有kóa風景區kah古蹟，m̄ koh, 風景kah台北比起來，單調koh無趣味，thang遊山玩水ê所在真少。Koh再講，年輕ê一輩希望逃離家族制度ê束縛，厝裡ê人tī無意識中mā有chit款ê心情。Tī厝裡tio̍h受在來ê麻煩老規矩束縛，尤其是老母阿嬌在世ê時，凡事lôlílôso。長幼ê區別真lôso, 原則上，男女無仝桌食飯。Chit種ê封建生活，雖然日常bē感覺不便，m̄ koh來到農場，iáu是有解放ê感覺，大家輕鬆、自由自在。

Kantaⁿ阿嬌iáu m̄ bat去過農場。獻上lâlí'á ê時，她歡喜kah講beh去一chōa，m̄ koh, iáu是因為年老、固執kah lánsi行動，就無想beh去。

玉簾kah take tú好倒páiⁿ，她ài去農場，tiāⁿtiāⁿ來。她來到農場就kah平常時無仝，有元氣起來；她oló講：每pái來lóng心chiâⁿ真好、開朗，看tio̍h花草燦爛，開kah滿四界，她就講家己mā beh做kóa園藝，借她一koá土地thang來做花壇。她mā落廚房，炒tú挽落來ê菜蔬，用現刣（thâi）ê雞肉á是買來ê豬肉料理。玉簾tī厝裡m̄ bat落廚房，lóng是chabó͘kán teh煮食；她來到chia to̍h穿圍su裙，輕快料理煮食。
「玉簾ná會無啥tāichì tiāⁿtiāⁿ來農場？」

清文感覺小khóa不可思議，m̄知tang時ánne問安子。 玉簾確實有khah過頭熱心，安子mā無真了解她ê心情。總是，她對ta̍k項tāichì lóng真固執、堅持；無婉轉，歡喜to̍h歡喜，棄嫌to̍h棄嫌，極端ê性地。她ê信仰mā帶（tài）chit種狂熱ê色彩。

玉簾對農場hiahni̍h熱心，安子並無掛意。M̄ koh, tùi農場傳來一koá風聲，講農場監督游德仁kah玉簾中間ê關係有一點á怪怪。男女私下做伙講話就hō͘ 人用奇異ê眼光來看待。安子掠準是ánne ê程度, 所以她無kā它當做是重大ê tāichì。

總是，安子mā有兩三pái看tio̍h玉簾tī農場ê溫室內kah游德仁講話。有一pái是偶然tú tio̍h tùi溫室出來ê玉簾，她chhoah一tiô。這並m̄是因為懷疑，實在是因為玉簾ê姿容看起來真súi，無像以前ê平素。安子感覺驚一tiô, 因為玉簾自從去教會以來to̍h無打扮，面皮是黃種人ê本色，穿樸素ê台灣服á是簡單ê洋裝，一點á都無感覺ánne無好。玉簾無打扮ê姿容，看起來有寂寞感，m̄ koh, 她決定ánne做就徹底無改變，安子認為真難得。總是，chit工安子看tio̍h以前有打扮ê玉簾，心肝chhoah一tiô。她ê面抹粉，頭毛m̄是loahkah ânân ê龜á頭髻，是有波浪ê西洋髮型，穿台灣服—烏色素花綢á ê長衫真合身，hō͘ 肢體顯露出苗條ê優雅風韻，m̄ koh, 她ê腰、肩kah頷頸iáu是khah有肉淡薄á, 有中年女性ê體態。因為慣勢看她無化妝打扮，chitmá看起來有kahná開花hiah súi。

對手ê chapo͘ chiah三十歲而已，玉簾已經四十三歲à。雖然無法度想像有無正常ê關係，m̄ koh, 有人講女性四十歲iáu是危險ê年齡。....若是發生chit款tāichì, beh án怎chiah好？若因為ánne引起無聊ê糾紛á是爭執，苦心經營ê農場吸引厝內ê人ê向心力，以及真無簡單chiah上軌道ê事業，可能lóng會想tio̍h影響。

若往pháiⁿ ê方面想，安子bē免會煩惱。清文雖然有小khóa致意，m̄ koh, 伊是一個chapo͘人，kahná對chit方面無深入去想ê款，清文講：
「有人teh散布一koá無聊ê謠言。」
「是ah, m̄ koh, 謠言khah常是無根無據。」
「總是，人ê話真驚人，無論如何，對農場ê人無好。」
「當然是ánne, m̄ koh, 免擔心。玉簾比一般人koh khah謹慎，只是她成做基督徒了後忽然消極起來，凡事樸素koh嚴格teh生活，大概她家己mā有感覺tio̍h chit種ê生活有khah悶。來到chitê曠闊ê大自然庄腳，自然會心胸開朗，所以真ài來。」

有一工，安子見tio̍h游德仁ê時，kek m̄知影事情問伊：玉簾時常來你chia, m̄知lóng談啥物tāichì。安子並無一定tio̍h試探清楚ê心情，m̄ koh, 對方有一點á緊張ê款。伊家己先講出已經聽tio̍h ê一koá謠言，伊表明絕對無hit種糊塗tāichì，只是玉簾beh引chhōa伊來信基督教。她是熱心ê基督徒，á伊根本to̍h是無神論者。她每pái來lóng是講宗教ê話á是向伊傳教，伊無法度領受。這是伊ê講法。

游德仁小心眼koh社會經驗淺，掛意人ê話，平常時無嘴尾，chitmá soah厚話ài辯，極力辯解。因此hō͘ 隨便提起來問ê安子感覺緊張，m̄知beh án怎chiah好。她並無深入思考玉簾接近游德仁ê tāichì, 因為對方ê辯解，安子soah開始懷疑起來。

事實上，玉簾對游德仁講一koá正經ê tāichì, 而且是siuⁿ過正經。 「種籽tùipuh芽到成長，開花結果子，chit種現象，你感覺án怎？」 游德仁認真teh做khangkhoè, 玉簾來kah伊話仙lóng是chit種話。 游德仁當teh做鳳梨新品種ê實驗，沿溫室北pêng ê窗á前，長形ê柴架á頂散散khǹg真chē玻璃淺盆á、瓶á、瓶á套組、試驗管kah藥品等等。伊kā鳳梨ê雄蕊kah雌蕊交合來培養鳳梨ê新品種，kā hitê種籽khǹg tī bulochin phéphah（譯註：ブロ—チング ペ—パ—=broaching paper, 培養種籽ê紙）頂面ak水，就會puh芽出來。Puh芽了後，用盆á tī溫室培養，然後徙（sóa）去鳳梨園種。游德仁從事chit種khangkhòe。
「游先生，你kám無感覺不可思議？你做ê khangkhòe。」
「無ah, ....是teh指啥物？」
「指植物tùi種籽到成長ê tāichì。」
「種籽若bē成長to̍h不妙loh。」
「是ah, ánne, 為甚麼種籽會成長neh？不可思議ah。」
「當然loh, 這是大自然ê力量。」
「無loh, m̄是lah, 這是神ê旨意。世間ê tāichì, 全世界ê tāichì, lóng是tùi神ê旨意來。你teh做無簡單ê實驗，培養出鳳梨ê品種，表面看起來是ánne, 其實m̄是ánne。而且，你kám認為鳳梨ê種籽是你培養出來ê？人類ê情形mā是ánne, 男女做伙就會生嬰á, m̄ koh hitê嬰á跳動ê心臟，kám講人有法度造出來？」

游德仁對chiahê話題oh得回答。伊小心處理，因為對方是董事長ê弟婦á，bē tàng pháiⁿ面得，伊努力謹慎應對。總是，當伊流汗認真做工kah真thiám ê時，伊想講：koh來ah, 真煩neh, 忍受夠額à, 焦心無奈。Chitê chabó͘人m̄知她ánne加添人ê麻煩，iáu koh一直來lôso。
「所以，聖經講：一隻雀鳥á若無神ê旨意，bē lak落來地上。」
「若ánne, 咱食烘雞肉串mā是神ê旨意loh。」

游德仁感覺真煩，soah無心講出chit種khau洗ê話。伊後悔無應該講chit種無聊話ê時已經siuⁿ慢ā, 玉簾疼你火大。她講正經ê tāichì, 伊卻kā她khau洗，豈有此理，你是一個無藥thang醫ê人，應該受咒詛ê人。她沿路罵，氣phutphut行出去。

游德仁想講taⁿ害ah, 若因為chitê小khóa tāichì來hông辭頭路to̍h tāichì大條ā，伊心內不安。事實上，chhōe無比陳清公司hiah好ê待遇，想tio̍h若無離開bē sái得，心情to̍h鬱卒起來。M̄ koh, 伊koh再想：對無請家己來ê董事長ê弟婦á，伊只不過講一句khau洗ê話，chit種小khóa tāichì致使造成hông辭頭路ê siōng bái結局，不如講是因為chitê chabó͘人tiāⁿtiāⁿ去伊hia，致使引起人誤會in兩人之間有關係，chiah是siōng大ê原因。

伊想講hō͘ 對方受氣一定會有好結果，因為她會憤慨討厭伊，就bē koh再來溫室chhōe伊。若是ánne, 伊to̍h koh khah早kek她受氣，beh hō͘ hitê chabó͘人受氣真簡單，只要講出一句褻瀆神ê話就ē tàng。 不而過，想講bē koh來ê玉簾又koh出現。
「游先生，神iáu tòa tī你ê心內，你家己可能無發覺。」
「Ah, sànchhiah ê神tòa tī我心內，一定tio̍h租厝來tòa。」

游德仁無嘴尾koh bē曉滾sńg笑，m̄ koh, 為tio̍h保護家己，伊有準備好一句話。

玉簾果然受氣tńg去，游德仁tháu一口氣。過無幾工，玉簾koh忽然出現。還擊tńg去koh攻擊tńg來，還擊tńg去koh攻擊tńg來。Ánne ê攻防戰來回幾pái了後，游德仁漸漸倦落來。

討厭ê感受早to̍h過去，她所講ê神mā聽習慣à。當她àⁿ頭祈禱ê時，伊目chiu khehkheh講「阿們」，mā無感覺不可思議。她祈禱、讀經á是細聲吟詩，她hitê lililaklak ê日語，起頭感覺好笑，無久習慣了後kahná teh唱歌，無啥物感覺。她hit兩蕊目chiu仁發出狂熱信仰ê光芒ê時，伊感覺無自然ê驚惶。插tī她頭殼頂ê玉蘭花ê芳味，kah身體散發出來茉莉花芳油ê微微á氣味，刺激tio̍h伊ê鼻á。伊對chiahê可怕ê tāichì已經習慣à。伊認為習慣kahná無波浪ê水面，卻kahná腳浸入去深水ê不安kah恐怖，iáu teh等伊。

游德仁已經m̄知án怎chiah好，伊ê頭腦kui工lóng無法度離開神kah chabó͘人。Ánne落去ê結果究竟會án怎leh？只好成做基督徒以外無別條路thang行。Á是，伊koh想，就ánne不知不覺成做信徒，伊滾sńg笑teh講ê sànchhiah ê神tùi伊心靈租ê厝出來，另外一位奇妙ê神koh chông入來，beh講是神不如講是魔鬼。伊teh培養鳳梨新品種ê芽á是苗，伊ê身軀kahná mā生出奇妙ê芽。伊tī暗時做一個夢，夢見鳳梨ê小芽快速成長，tùi鋸齒狀ê葉á中間開淺紫色ê花集，無久to̍h結實，kahná松杲ê果子有人頭ê大，已經有夠大ā, iáu koh繼續變大，伊真煩koh不安。伊jú驚，果子jú成長，感覺變成一粒不可想像ê大果子。伊驚kah hoah出聲，夢mā醒。

為甚麼hitê chabó͘人對伊chitê無罪ê人凌遲kah ánne chiah甘願？伊想beh kā她咒詛。儘管如此，不可思議ê是：無看tio̍h她ê身影ê時，又koh kahná失落啥物。對chitê伊hiahni̍h驚koh討厭ê人，為甚麼無看tio̍h她ê身影會kahná失落啥物？她今á日kám會來？心內kahná ánne teh盼望。

Ánne kám講伊是teh kah意玉簾？Kahná mā m̄是。若beh講伊kah意hitê chabó͘人，不如講是kah意hitê chabó͘人hō͘ 伊ê痛苦，kahná意愛食鴉片一樣。Hitê chabó͘人無出現，tùi她所hō͘ 伊ê壓力暫時得tio̍h tháu放ê時，因為he m̄是決定性ê永久tháu放ê暫時條件，所以並無tùi絕望中間得tio̍h解救。既然無感覺幸福，心內mā無平安，不如繼續受壓力來感覺痛苦，á是koh khah受凌遲chiah爽快。伊陷落chit種奇怪ê習慣性kah惰性。