《陳雷文選》

 | | | 轉寄

寫hō͘學生朋友 ê 代誌 28 台灣路

作者 陳雷 2019.12.08

（Siá hō͘ ha̍kseng pêngiú ê tāichì 28）（寫hō͘學生朋友 ê 代誌 28）

Tâioân lō͘ / 台灣路

Kòelâi ê gō͘cha̍p nî, tùi Tâioân énghióng siōngtōa ê engkai sī tē kiû ê khoânkéng piànhòa. Putkò che m̄ sī lán kin'áji̍t thólūn ê būntê. Lán beh kóngê sī Tâioân ê chèngtī khoânkéng.

過來 ê 50 年, 對台灣影響上大 ê應該是地球 ê 環境變化.不過che m̄是咱今 á日討論 ê 問題. 咱beh講 ê 是台灣 ê 政治環境.

Lán ū sìpah tang pī si̍tbîn ê le̍ksú, chinchai Tâioân lâng ê anchoân kap chūiû suiàu to̍kli̍p chúkoân ê kokka chiah ē tàng póchèng. Chittiâu tōsī lán beh kiâⁿ ê Tâioân lō͘. Tānsī chittiâu lō͘ m̄ sī e̍hchiⁿ ê kokka chúgī. Inūi lán ê tē lí sī háiiûⁿ, lán ê hái sìpiⁿ khaihòng, lânglâng lâióng, lán iāsī kokchè chúgī chiá. Kap choânsèkài ê kokka pêngténg lâióng. Kokchè chúgī hō͘ lán chìnpō͘, hùjū, anchoân. Só͘í Tâioân lō͘ ū siangchōa, chúkoân kokka kap ha̍pchok ê kokchè chúgī.

咱有400 冬被殖民 ê 歷史, 真知台灣人 ê 安全kap 自由需要獨立主權 ê 國家chiah 會當保証. 這條tō是咱beh行 ê 台灣路. 但是這條路 m̄是e̍hchiⁿ ê 國家主義. 因為咱 ê 地理是海洋, 咱 ê海四邊開放,人人來往, 咱也是自然 ê國際主義者. Kap 全世界 ê 國家平等來往. 國際主義hō͘咱進步,富裕,安全. 所以台灣路有雙chōa, 主權國家kap合作 ê 國際主義.

Siōngkài hoántùi Tâioân lō͘ ê sī Tiongkok kiōngsántóng chèngkoân. In beh chhimchiàm Tâioân, khòngchè Tâioân. In ê iásim sī chòeāu khòngchè choân sèkài ê lâng kap chugoân, chhinchhiūⁿ in chitmá khòngchè choân Tiongkok kângkhoán. Che sī bo̍kchêng Tâioân siōngtōa ê hûihiám, tē it te̍kjîn. Lán ittēng tio̍h khòaⁿchin in ê púnchit, chiah ē tàng póhō͘ katī.

上蓋反對台灣路ê是中國共產黨政權. In beh侵佔台灣, 控制台灣. In ê野心是最後控制全世界ê人kap資源, 親像in chitmá控制全中國仝款. Che是目前台灣上大ê危險, 第一敵人. 咱一定tio̍h看真in ê本質, chiah ē tàng保護家己.

Tâioân lō͘ khamkhamkhekkhek, iōng lán ê tìhūi, gánkong, koatsim nákiâⁿ ná khuilō͘. Che sī lán to̍kto̍k chi̍ttiâu hó koh tn̂g ê chhutlō͘.

台灣路坎坎坷坷, 用咱ê智慧, 眼光, 決心ná行ná開路. Che是咱獨獨一條好koh tn̂g ê出路.
（Chokchiá chù:chhiáⁿiōng pe̍hōejī)（作者注：請用白話字）