《現代台語新約聖經 讀經日記》

 | | | 轉寄

第六篇　是poànsinputsûi 抑是piànsûi ê？

作者 李南衡 2012.01.22

讀經版本：羅馬字版《現代台語譯本新約聖經》，2007，台北：台灣聖經公會
進　　度：使徒行傳第八章

第八章第7節：Ū chin chōe hō͘ siâsîn hūsin ê lâng tōasiaⁿ hoah, tùi in só͘ hūsin ê lâng chhutkhì. Ū chin chōe poànsinputsūi kap khapáiê mā tit tio̍h ihó. 內底chitê“poànsinputsūi”是新語詞，漢字寫作「半身不遂」。《巴克禮版》kah《紅皮》攏譯作“piànsūi”、mā有人讀作“poànsūi”，漢字寫作「半遂」。《日語聖經》譯作「中風患者」，《現代中文》kah《和合本》譯作「癱瘓的」。咱若看1931年出版ê《台日》“piànsūi”（半遂 ）ê解釋：半身不隨。全身不隨。中風。仝本《台日》「半身不隨」ê解釋有加chitê（國），（國）ê意思是「國語」（當時ê「國語」是日語）也就是講「半身不隨」是日語ê講法。按呢咱就知影，無論“piànsūi”抑是“poànsūi”是咱台灣人原本ê講法，受日本殖民統治了後才借用日語講法，台灣tī日治時代，因為教育ê影響，真濟台語原本tio̍h有ê語詞煞改用外來ê日語語詞，雖然寫日本漢字、讀出來卻是用台語發音，che會使講是台灣當時ùi日本來ê外來語ê一大特色。Chit類ê例真濟，像講「屎礐」(sáiha̍k)攺作講「便所」(piānsó͘)、「客棧」(khehchàn)改作講「旅館」(líkoán)、「學堂」(o̍htn̂g)改作講「學校」(ha̍khāu)等等。借用外來ê chitê新語詞「半身不隨」有一點tio̍h注意，台語「隨」(sûi)發音第五聲，「遂」(sūi)發音第七聲，無仝。若是寫作“poànsinputsūi”漢字是「遂」，並m̄是原本ê日語漢字「隨」。

若是認為新語詞“poànsinputsūi”比原本用慣勢ê“piànsūi”khah好，是按怎佇《馬太福音》第四章第24節猶koh使用“piànsūi”？另外《馬太》第八章第6節，每一本聖經攏有寫hitê奴僕患tio̍h“piànsūi”（抑是講「癱瘓的」、「中風患者」）干單chit本《現代台語聖經》譯作：“Chú ah, góa ê lô͘po̍k tó tī chhùlāi bōe tintāng, huisiông kankó͘ .”無講伊患tio̍h啥物病。阮m̄知啥原因beh按呢省略。

　　仝chit節內底tùchiah講ê chitê詞“poànsinputsūi”後面ê“khapáiê”，讀tio̍h真bē順。無論是《巴克禮版》抑是《紅皮》，攏寫作“páikhaê”，《現代中文》kah《和合本》譯作「瘸腿的」，咱台語mā是講“páikhaê”，那像khah罕得聽人講“khapáiê”。我手底有ê幾本台語辭典字典、甚至中國出版ê「閩南話」、「廈門音」辭典，無一本有收“khapáiê”chitê詞。我想，真有可能是譯者ê筆誤抑是排版ê疏忽。

第八章第20節：Pítek tùi i kóng, “Lí ê chîⁿ kap lí chòehé khì sí ! Lí káⁿ siūⁿbeh ēng chîⁿ bóe Siōngtè ê unsù ! ” chit句 “Lí ê chîⁿ kap lí chòehé khì sí ! ”《巴克禮版》譯作：「你ê銀kap你saⁿkap滅無。」《紅皮》譯作：「你ê錢tio̍h kap你作伙滅亡！」《現代中文》kah《和合本》譯作：「你跟你的金錢（銀子）一起滅亡吧！」甚至連《日文聖書》kah“RSV”ê意思mā攏是滅無、滅亡。干單chit本《現代台語聖經》譯作“Lí ê chîⁿ kap lí chòehé khì sí ! ”阮ê疑問是：有生命ê人有可能kah無生命ê錢做夥（“saⁿkap”）滅無、滅亡，但是無生命ê錢beh按怎kah有生命ê人做夥去死咧！感覺怪怪。