《歷史上ê主耶穌》

 | | | 轉寄

第十一章_3 前往耶路撒冷ê路徑

作者 杜英助 台譯：Lîm Chùnio̍k 2020.11.08

三）你是基督，是永遠活ê上帝ê Κiáⁿ

耶穌chhōa門徒渡過加利利海去到對岸，因為門徒bē記得帶餅，就順機會教導in講：「Lín tio̍h謹慎，防備法利賽人kah撒都該人ê酵。」門徒彼此議論講：「這kám是因為咱無帶餅。」耶穌知影門徒ê想法，就講：「Lín chiah ê小信ê人，為啥物因為無餅to̍h彼此議論？Lín kám iáu bē明白？Bē記得hit五塊餅分hō͘ 五千人，koh收拾gōa chē籃á ê餅屑？Kám mā bē記得hit七塊餅pun hō͘ 四千人，koh收拾gōa chē筐á ê餅屑？我kā lín講：『Tio̍h防備法利賽人kah撒都該人ê酵』，chitê話m̄是teh指餅講ê，lín án怎bē明白？」門徒ánne chiah知影祂講ê m̄是叫in防備餅ê酵，乃是防備法利賽人kah撒都該人ê虛假教示（馬太16：5～12、馬可8：14～21）。

究竟法利賽人kah撒都該人ê虛假教示是啥物？是án怎耶穌教導祂ê門徒ê時ài in謹慎細膩（sèjī）防備？是因為in經常kah耶穌ê門徒四界跟tòe耶穌ê腳跡，聽耶穌對眾人ê教導，看見耶穌所行ê神跡，食過餅kah魚，看過真chē病人得tio̍h醫好，m̄ koh，in lóng m̄相信耶穌是上帝ê Κiáⁿ，而且iáu想beh chhōe出耶穌教導人ê話柄kah安息日ê禁令來陷害祂；其次，in tī眾人面前tiāⁿtiāⁿ thiau故意對眾人風神in是gōani̍h'á ē遵守摩西ê誡命，行仁慈，施疼心，賑濟sànchhiah人。其實，in tī眾人面前做chiahê tāichì lóng是假冒偽善ê行為；了後，耶穌bat對in直接指出，in ánne做真正是有禍à！（請看馬太23：1～36、馬可12：38～40、路加11：37～52、路加20：45～47）

做餅ài加酵是因為酵ē tàng hō͘ 麵粉膨大；因為ánne，法利賽人kah撒都該人錯誤ê思想kah教示，若是親像酵暴發膨大，ē污染眾人ê行為，做善事lóng tio̍h有目的，想beh得tio̍h別人ê oló；tī眾人看bē tio̍h ê所在á是tī安息日，in to̍h絕對bē做善事幫贊人。

Koh再講，耶穌tī chia mā提起用五餅二魚飼飽五千人kah七餅飼飽四千人ê tāichì，可見這是tī二个無仝地方所行ê神跡。耶穌tī加利利海對岸，tī庫爾西格拉森人tòa ê所在，kā hō͘ 群鬼附身ê人ê群鬼趕走，群鬼走到豬群中間，hiahê豬群被嚇kah衝入去加利利海；以及耶穌koh再到加大拉kā加大拉人hō͘ 鬼附身ê人身chiūⁿ ê鬼趕走，iáu有一大陣豬被嚇kah衝入去加利利海，這mā是兩件tī無仝所在對無仝ê人所行ê神跡，無重複，絕對m̄是親像某一kóa人解說為仝一件事，kantaⁿ是tī數字上有cheng差ê記述。

耶穌kah祂ê門徒tī北加利利，先到伯賽大醫好一个盲人（馬可8：22～26），續落來koh再行到黑門山麓有名ê凱撒利亞腓立比ê境內，問門徒講：「咱人講人子是啥人？」á是講：「眾人講我是啥人？」In kā某一kóa人ê認知kā耶穌講：「有人講是行洗禮ê約翰；有人講是以利亞；koh有人講是耶利米á是先知內底ê一位。」希律王（安提帕）聽tio̍h別人koh ánne講：「是行洗禮ê約翰tùi死koh活。」就ánne，希律王mā想beh見耶穌（馬太14：1～2、馬可6：14～16、路加9：7～9）。

耶穌聽tio̍h chiahê kah祂ê身分無符合ê答案，就koh再問祂ê門徒講：「Lín講我是啥人？」眾門徒ioh bē出ê時，西門彼得終其尾答tio̍h à，伊講：「祢是基督，是永遠活ê上帝ê Κiáⁿ。」耶穌chit時oló彼得講：「約拿ê kiáⁿ西門，你是有福ê！因為這m̄是屬血肉ê指示你ê，卻是我tī天頂ê父指示ê。我beh koh kā你講，你是彼得（意思是石磐），我beh kā我ê教會起造tī chitê石磐上；陰間ê權柄無法度贏過伊。我beh kā天國ê鎖匙hō͘ 你，凡若你tī地chiūⁿ所綑縛ê，tī天頂mā tio̍h綑縛；凡若你tī地chiūⁿ所tháu放ê，tī天頂mā得tio̍h tháu放。」（馬太16：13～20、馬可8：27～30、路加9：18～20）

講mā奇怪，當彼得受天父啟示講出「耶穌是基督，是永遠活ê上帝ê Κiáⁿ。」ê時，耶穌對眾人見證祂是上帝ê Κiáⁿ基督，m̄ koh，偤太人ê祭司長、法利賽人kah撒都該人，頭尾lóng恬去， m̄相信。Hit時，耶穌是án怎竟然吩咐門徒講：M̄ thang對任何人講祂是基督（馬太16：20）？耶穌kā門徒講：這是因為「祂一定tio̍h去耶路撒冷，會hō͘ hiahê長老、祭司長、經學教師迫害，受真chē苦難，mā一定會hō͘ in害死，第三日上帝會hō͘祂koh活。」（馬太16：21），當時彼得聽tio̍h耶穌忽然ánne講，伊就真體貼耶穌，用手kā祂giú.leh，講：「千萬m̄ thang ánne，chit項tāichì絕對m̄ thang發生tī祢身chiūⁿ。」M̄ koh，耶穌tńg身過來，卻責備彼得講：「撒旦，閃開！你是我ê阻礙，你所想ê m̄是上帝ê tāichì，是人ê tāichì」（馬太16：22、23）

試想看māi：彼得tútú受tio̍h天父啟示，伊講：「人子是基督，是永遠活ê上帝ê Κiáⁿ。」過無gōa久，伊ê心內to̍h去ho͘ū撒旦侵佔，kahná真體貼耶穌，叫祂明明知影有危險，甚至ē喪失性命，就m̄ thang koh再去耶路撒冷受害；彼得心內ê變化ná ē hiahni̍h大？既然受tio̍h天父啟示伊知影人子是啥人，m̄ koh tòe後，撒旦就進入伊ê心，想beh阻止人子到耶路撒冷去為tio̍h擔當罪人ê罪來犧牲性命。表面上kahná是真體貼主耶穌，啥人知這是違背上帝ê旨意，所以，耶穌看透彼得ê心，to̍͘h對伊講一聲：「撒旦，閃開！」

因此可見，做上帝ê代言人mā可能成做撒旦ê代言人，真正oh得猜想ē到！為tio̍h 無ài講m̄ tio̍h話，人人一定tio̍h「緊緊來聽，慢慢á講」chiah好；「想好勢，chiah koh講」比較bē講m̄ tio̍h，求主賜hō͘ 咱有分辨是非，分別tio̍h kah m̄ tio̍h ê智慧、能力。