《各各他e5目屎--苦難得安慰》

 | | | 轉寄

宣教kap宣道

作者 紀福讚 2006.01.15

「Mission」這個英文真歹翻譯。有人翻譯做宣道、傳道，有人翻譯做宣教、傳教。這種翻譯上ê差別，也是近代對「mission」ê定義kap教會ê功能、定位有所爭論ê所在。

代先，咱來看宣教ê意義kap目的。伊ê意義，有時必須tùi伊真正ê目的kap實際ê意念來瞭解。基本上，「宣教」ê目的是beh「教會ê增長」，是將一個團體不斷來擴大，tùi使徒十二個，門徒三千，會眾五千，教友（會友）十五億。本質上是注重「數量」ê增加，教會分佈範圍ê「量」kap參與教會活動ê人ê「量」，以及伊影響力ê「量」來做評估。教會hō͘人看做是上帝掌權tī地面上ê工具，教會到tá落，上帝ê權勢也延伸到tá落。教會是上帝爭戰ê前鋒，有時會hō͘人分bē清，是上帝帶領教會往一個區域teh前進，á是教會帶上帝到一個所在，將「上帝」介紹hō͘當地ê人，hō͘當地人認做神明來崇拜。親像美國ê Coca5 Cola teh「拍市場」kāng款，宣傳、廣告、推銷，佔領宗教信仰ê市場。「十字架」是佔領ê象徵，十字架插到tá落，教會kap上帝ê權勢也到tá落。宣教ê目的，真明顯是一個宗教信仰團體ê擴大，宣教意義ê重點是「教會ê增長」，教義本身ê推廣，形式khah過頭tī實質。當兩個有衝突ê時，會犧牲教義，來確保「教會ê增長」。

第二，咱來看宣教ê意義kap目的。宣教ê目的，真明顯是「道」本身ê彰顯。將「道」宣揚出去，影響當地ê文化，人ê心靈、意念、價值觀，以及社會、政治環境ê轉變。宣道ê意義是hō͘人認識「道」本身，接受「道」做伊人生ê準繩kap生活模式，kap「道」有交通。伊宣揚ê工具、媒體m̄是主體，主體是「道」本身。媒體會變遷，但「道」本身是常存。宣揚ê人、團體、教會、教派、帝國會消失、改換，但「道」本身bē改變。這個道，使徒行傳稱做「神ê道」（四31；六7），約翰一書稱做「性命ê道」：「Tī起頭有道，道kap上帝saⁿkap tīteh，道就是上帝。Chitê道tī起頭kap上帝saⁿkap tīteh。萬物tùi道來創造；見若受創造ê，無一項m̄是對伊來創造。」（約一13）。彼得見證講：「伊koh命令阮傳hō͘百姓」（徒十42），保羅講：「這個救世ê道是傳hō͘阮ê」。所以宣道ê目的，m̄是beh建立教會；教會建立ê目的是為tio̍h beh宣道。

但，真悲哀ê，今á日ê教會，大部分將宣道ê目的，是beh建立教會；宣教ê熱誠只停止tī建立教會kap教會ê增長。結果只有「宣教」ê真實，無有「宣道」ê效果。教會愈濟，當地ê文化、心靈、社會環境、道德愈敗壞，愈墮落。教會ê會友愈來愈濟，但上帝ê掌權soah愈來愈弱小，真理、公義、仁愛愈困難實現；教會有增長，宣教有成功，但上帝國soah縮小，宣道無效果。這個原因就是以「宣教」混淆「宣道」ê目的。將宣道ê目的，khǹg tī教會ê增長，m̄是將教會ê增長目的，是為tio̍h beh宣道。將「主體」kap「媒體」混淆。所以教會ê團體tī「量」ê頂面，tùi十二個門徒進展到十五億ê信徒，但對世界「質」ê影響soah愈來愈弱小。愈oh看tio̍h上帝ê掌權tī地面上。Kaná是俗語講ê:「濟子餓死父。」

因此，宣道應該是宣教ê目的，m̄是工具、過程。宣道是主體，宣教是媒體。所以m̄是教會建立齊備了，才出去宣道；無有宣道ê教會，bē tàng稱做是耶穌基督ê身軀，是「道」tī地面上有形ê代表。tī宣教ê目的，若m̄是beh建立「宣道ê教會」，這個宣教是親像跨州公司kāng款，是建立市場，建立家己ê國度，m̄是teh開擴上帝ê國度。「教會增長」ê目的是為tio̍h beh「宣道」；宣道ê目的，m̄是beh「教會增長」。「宣教」是「宣道」ê工具、過程；宣道是宣教ê終極目標。