《各各他e5目屎--苦難得安慰》

 | | | 轉寄

拜上帝kap拜偶像

作者 紀福讚 2006.01.22

「M̄ thang為家己雕刻偶像」是十誡ê第二誡，是非常重要ê誡命，所以真濟基督徒m̄敢違犯，真濟宗教領袖也不斷ánni叮嚀，但bē記得吩咐一項（kámchhái是故意）：「請lín m̄ thang將我看做偶像。」所以有濟濟信徒，是先崇拜伊心目中ê偶像－－宗教領袖，才慢慢學習敬拜上帝。

人ê本性，m̄ nā是愛雕刻偶像，也真ài做人ê偶像。真ài雕刻偶像，是因為家己心中ê神明、信仰具體化，有一個具體ê象徵來提醒、聯想kap模仿。所以以色列百姓ài造金牛，愛拜巴力、亞舍拉，羅馬天主教ài造聖徒、馬利亞、耶穌ê雕像，基督徒ài掛十字架，台灣國民黨ài造蔣介石ê銅像，一寡有錢、有勢有地位ê人也ài造先人抑家己ê雕像hō͘子孫記念。Ài做人ê偶像是因為感覺家己ê理念kap實踐堪做人ê模範，也hō͘人肯定「學耶穌學了有sêng」ê滿足，kám親像保羅講ê:「Lín來學我，親像我學耶穌。」但現代人有比保羅khah有自信講：「Lín來tòe我，親像我tòe耶穌。」結果家己soah成做跟tòe者崇拜ê偶像。愈成功ê宗教領袖愈容易hō͘人看做偶像。hō͘人看做偶像了，盲目跟tòe ê人愈來愈濟。有時為tio̍h beh「傳福音」，也會故意「廣告」、「捏造」家己成做別人心目中ê偶像，ánni講道khah有力，khah有人ài聽，因為人ê本性lóng ài有偶像。這種偶像崇拜愈火熱，人ê心思、性質、行動也會愈親像偶像。

譬如有一寡神學生心目中ê偶像是in崇拜ê神學家，in ê思想愈受影響，實踐ê模式愈像hit位心中ê偶像。這種影響往往勝過聖經中上帝ê話語。Ánni伊ê神明是siáⁿ neh？耶穌也吐氣講：「lín又無beh就近我來得tio̍h活。」（約五40），保羅吩咐哥林多ê教會m̄ thang分pêng ê原因，就是分pêng ê背後是偶像崇拜。Tī路司得有人向伊獻祭，伊撕破衫講：「咱也是人，性質kap lín kāng款。」伊拒絕受當做偶像。伊清楚講：「我是罪魁，是我得tio̍h憐憫，因為基督beh tī我這個罪魁ê身上，顯明伊一切ê忍耐，hō͘後來信伊得tio̍h永生ê人做榜樣。」（提前一16）伊處處提防成做人信仰、跟tòe ê偶像。大衛是上帝所喜愛ê人，是猶太人信仰ê典範，但伊tī詩篇所表現ê是十足ê一個人ê性質，kap咱kāng款，伊無隱瞞伊ê犯罪記錄，伊無製造家己做偶像，但無失去人對伊ê欽仰、尊敬，伊無隱瞞伊心中ê生氣、怨恨、詛咒ê意念，但伊還是上帝喜愛ê人。

顛倒péng，今á日濟濟教會領袖m̄敢講公義（道）ê話語，m̄敢表現憐憫ê心，m̄敢告白家己有判斷錯誤ê時，m̄敢講出家己有疏忽ê時，m̄敢hō͘人誤解伊也有私心。原因是驚伊tī別人心目中ê形象，無koh是親像偶像ê款式。驚破除了伊成做偶像ê形象，所以tī該講話ê時，m̄敢講話；該開嘴ê時，m̄敢開嘴；該有行動ê時，m̄敢有行動；特別tī開總會；特別tī教會、資訊有誤導ê時；特別tī信徒對信仰產生疑問ê時；特別是需要公義，總是會得罪人ê時；愈m̄敢開嘴，十足親像廟內ê偶像。親像保羅ê吐氣：「Kiám講lín中間無一個智慧人，會審斷兄弟ê事mah？」（林前六5）。為什麼敢受「惡」ê攻擊，kiám m̄知咱受揀選、受救贖ê目的，就是beh kap「惡」爭戰。法利賽人最怨恨耶穌ê，就是耶穌撕破in ê假面具，打破in心目中ê偶像－－摩西kap律法，phah破in tī群眾心中假ê形象。

耶穌對敬虔少年官ê要求，講出一項拜上帝ê真實，就是真正ê拜上帝必須先除掉家己心內ê偶像－－金錢、權勢、面子、地位、名聲。Beh真正尋人拜上帝，也tio̍h phah破家己ê形象，親像耶穌，親像保羅，承擔所會遇tio̍h ê侮辱，性命ê危險，誤解ê攻擊，甚至是釘十字架，ánni才會tàng將各人tī基督ê內面完完全全chhōa到上帝ê面前（西一28）。若無，咱會chhōa人進入tī偶像崇拜，m̄是對上帝ê敬拜。