《各各他e5目屎--苦難得安慰》

 | | | 轉寄

oló耶和華

作者 紀福讚 2006.02.05

「oló」是現代建立人際關係最有力ê方式，因為人tī心靈ê深處lóng欠缺自我肯定，需要藉別人ê oló來得tio̍h自信、滿足。馬克吐溫bat講，伊會tàng 用一句oló ê話，活三工。卡羅素講伊會chiâⁿ做一個歌唱家，是因為細漢老母不時teh oló。詩篇147:1「Lín tio̍h oló耶和華；因為唱歌oló咱ê上帝，是真好真妙；Oló是合宜。」親像上帝也欠缺oló，來證明伊有氣力ê存在。詩篇22:3「你是用以色列ê oló做座位ê。」Tī oló中，上帝有威嚴ê存在，降臨tī咱ê中間，愈有oló ê所在，伊愈愛去，kap in愈親密。一個親密ê關係，tio̍h不斷用oló來肯定、強化、hō͘相建立造就。oló會增加彼此ê歸屬感，彼此ê吸引力。Tī雅歌書中咱會當讀tio̍h真『肉麻』ê oló，但也表明in ê關係真密切。這是現代東方ê尪某所欠缺ê。Kantaⁿ oló tī心內，你ê牽手，你所疼ê人感受bē tio̍h，會減少互相吸引、欣慕ê力量。

為什麼咱tio̍h oló耶和華？是m̄是因為伊是有氣力ê神明，咱tio̍h kā巴結呢？若無kā oló，驚伊會生氣，降災禍hō͘咱？這種「驚惶」ê心理，是原始宗教抑台灣民間崇拜ê心理，但也存在tī今á日教會敬拜ê中間。有時oló也出tī想beh得tio̍h好處ê心理，親像teh對待頂司、頭家、顧客。但這lóng m̄是正確ê oló態度。詩篇一四七1講，oló ê原因kap原動力，是因為伊是善、是美。伊ê善表明tī「醫好傷心ê人，包紮in ê傷痕；伊為受屈ê伸冤，賜食物hō͘饑餓ê，伊釋放受關監ê，伊開睛瞑人ê目睭，伊扶起受壓制ê人，伊扶持寡婦孤兒，伊hō͘歹人ê道路彎曲。」所以oló是出tī受tháu放ê人ê嘴kap心。親像tī浴室受tháu放就自然想beh唱歌一樣，tī一四七7講：「Lín tio̍h用感謝向耶和華唱歌。」Oló是出tī內心ê感謝kap釋放。Tī早期教會唱「彌賽亞」ê時，一定是將收ê門票kap會後ê義賣做救濟散赤ê路用，ánni才達到oló ê實質，若無，就失去唱「哈利路亞」ê意義。Kantaⁿ中產階級ê人因為家己ê享受kap好勢teh oló上帝，這是對上帝ê譏刺，會hō͘上帝見笑。這是對上帝ê巴結、應酬，講好聽話，唱好聽ê歌，bē當稱做是oló。Kāng款，今á日ê教會若kantaⁿ因為家己ê拜堂súi、冷氣強、講壇讚、詩班齊、經費飽來teh oló上帝，這是對上帝ê譏刺，會hō͘上帝見笑。愈表明上帝是一位無公義、無疼ê神明，無值得oló。但這soah是今á日教會普遍ê現象，悲哀看做是正常。教會若因為增長soah無kap散赤、弱勢ê人khiā tàu陣，這種ê oló是對上帝ê巴結，m̄是「出tī受tháu放ê人」ê感謝。Bē當稱做是「oló」。這種oló ê話m̄是合宜ê。Tútú親像兩個穿súisúi ê人the 互相『恭維』in ê『善心』，soah忽略邊á一位穿破破iau餓ê兄弟。

Oló上帝也是出tī「súi」ê讚嘆！詩班唱了真「súi」會hō͘人產生敬畏ê心；講壇讚，會hō͘人有向善ê心；拜堂súi會hō͘人愛來朝見上帝。但chiahê，若無帶出去tī所khiā起ê群體中間，就是表明咱ê上帝是m̄敢見人ê上帝，kantaⁿ bih tī聖殿吹冷氣，坐tī高高ê寶座，等候享受人稱讚ê「老爺」，也是無值得oló ê神明。無真kap無善ê súi，是虛假、暫時、片面ê。大地teh oló上帝，是因為大地、五穀、走獸、花草、蟲thōa lóng感受tio̍h上帝ê善，所發出súi、感謝ê聲，這就是oló。人若自私，kantaⁿ beh滿足家己ê慾望、享受來破壞生態，anni咱為tio̍h家己ê享受teh oló上帝，大地soah teh phahng、啼哭、受破壞、壓迫、毀滅，ánni咱ê oló是譏刺，hō͘上帝見笑koh生氣。咱ê oló若是建立tī別人ê受苦，大地ê受苦，這個oló是片面、虛假、暫時ê。所以tī罪中ê oló是欺騙上帝，褻瀆上帝，惹上帝生氣。真正ê oló是會引起「共鳴」ê，hō͘人思念上帝ê「好」「善」，作伙來感謝，發出oló。Ánni ê oló才是真ê、久長ê、全面ê。大地，眾人ah！咱tio̍h oló耶和華！