《各各他e5目屎--苦難得安慰》

 | | | 轉寄

莊腳ê長老

作者 紀福讚 2006.06.04

Ta̍k年ê熱天，lóng會想tio̍h莊腳ê長老。Tùi細漢讀夏季學校，到大漢tī教會做工，熱天是教會活動尚chia̍p ê季節。學生一放假，就歸日chiú tī教會。Tùi早起時ê早天祈禱會，早起ê初中（國中）一年ê英語、數學班，ē晡時ê夏季學校，暗時ê祈禱會，家庭禮拜，整個暑假lóng chiú tī教會。有時父母會擋bōe tiâu，唸幾句á，但就會用耶穌ê話語來做理由：「Kiám m̄知我tio̍h tiàm tī老父ê家mah？」（路加二49）。當然，青年人ká做伙，若koh有異性ê兄弟姊妹，就會sńg kah m̄知人。探訪、釣魚、教冊（ABC）、查經、信仰分享、田岸邊散步、騎鐵馬郊遊、坐bus遊覽、chhōa gín'á做遊戲，chiahê lóng是真深ê回想，是真súi ê童年、少年、青年回憶。但hō͘人尚感心ê iáu是莊腳ê長老。

莊腳ê長老，姓蔡，teh賣桔餅維生，做主日學校長三十幾年。伊m̄是受真koân ê教育，卻是真有進取ê心，也真熱心，真有愛心kap信心。每一禮拜，伊透早就來，看今á日主日學教材是m̄是準備妥當，金句、黑板、獎品、課本、分班資料、點名簿、輔用教材等，一項一項核對清楚，椅á、桌á排整齊，坐tī第一排祈禱，等主日學生來，kā in招呼，所以全教會百外個學生，伊逐個名lóng叫會出來。hō͘ gín'á對教會有真大ê歸屬感－－校長有teh關心我。看gín'á tùi幼稚班、國小班、少年班、師範班、參加教學、結婚、做TKC會長、做長執，這是莊腳ê長老尚大ê安慰。教會tī伊ê眼中是一個學習基督性命ê共同體。Tī chia，作伙大漢，作伙哀傷，作伙啼哭，作伙受教育、作伙為上帝國拍拼，後來全教會也beh tâi作伙，等候主koh來ê日子，作伙koh活。

莊腳ê長老，常常會chhōa主日學老師去探訪學生。特別是生活有欠缺ê主日學學生。所以tī主日學慕道ê學生非常濟。主日學是教會第一線傳福音ê所在。Tī夏季學校，有80% ê學生是tùi父母未信主ê家庭來。In真ài chiahê尪á圖，金句卡片，也真ài聽chiahê故事。所以莊腳ê長老tī鄉ni̍h是一位四界人會尊敬ê「校長」。In對伊ê認同，kap教會ê印象是分bōe開ê。Tī夏季學校ê時，莊腳ê長老會暫時放下伊園ni̍h ê khangkhòe一個月，專心tī計劃、招學生、教學、準備點心、tàu載莊腳遙遠路途ê學生，到tī最後一禮拜ê拜六，全教會ê人坐遊覽車去chhitthô。tī車內，有吃、有唱、有做謎猜、有講笑話、老ê、少年ê、查某、查埔、就sńg作伙，káná是人間天堂。

莊腳ê長老，是家庭禮拜固定出席ê人。無論散赤、老ê、少年ê、新ê、舊ê家庭，伊lóng會去參加。凡若是tī教會出入ê大細，伊lóng看做是教會ê親人，是家己ê人，有欠缺、有歡喜、有破病、有哀傷，就kap in作伙。伊親像教會ê大家長。譬如有一位常常tī市場求乞ê老阿伯，伊chhōa伊來教會，koh chhōa伊去厝nih，hō͘伊食，kap伊同桌；hō͘伊tòa，kap伊生活。親像長輩，一tòa就tòa幾十年。這是莊腳ê長老表現基督ê疼，kap莊腳ê人情味ê所在。

但莊腳ê長老年紀漸漸大，做工參與ê時間，體力bōetàng親像以前hiahni̍h濟。教會ê gín'á也漸漸m̄ bat伊，伊tī教會也漸漸孤單。少年ê牧師、同工也感覺伊有khah老淡薄、思想、觀念khah退時，但伊iáu透早就到教會，無離開伊ê教職，長輩班若是kantaⁿ一個學生，伊也是充分準備，有教無類，鞠躬盡職！伊kantaⁿ有一個心願，盼望這間教會猶原是一bô͘上帝ê田園，有人iā種，有人施肥，有人收成，一代一代繼續到主koh來！

教會是上帝ê田園，莊腳ê長老體會特別深！以前是一bô͘旱田，無水、石頭滿滿是；今經過80年，這bô͘旱田已經變做良田，好種作，好收成，前人所流ê汗無白費。

熱天koh到lah！莊腳ê長老hō͘人siàu念！