《各各他e5目屎--苦難得安慰》

 | | | 轉寄

怨恨光ê人

作者 紀福讚 2006.06.11

「見若做歹ê人，lóng怨恨光」（約翰三20）。聽講tī監獄中ê慣犯lóng有一個kāng款ê怪癖，就是驚光，m̄ ài牢房有光。有光就感覺chhīⁿ目，無安全感，所以就怨恨光。這種心理ê產生，是因為in tī烏暗中「àmmnogsoa」ê生活已經習慣。Tī烏暗中計劃做歹，埋伏隱藏、逃閃走路。久á久，就對光驚惶，會聯想tio̍h危險ê信號－－警察、敵人、搜查、審問。M̄若tī心理上是ánni，tī心靈上koh khah有驚光ê理由。因為光會hō͘伊有良知ê責備，會hō͘伊hitê the beh消失ê見笑心感覺bē自在。但是，一旦將最後唯一微細ê光kā遮khàm，良知、見笑心就lóng看bē tio̍h，就完全喪失分辨是非好歹ê能力，做事ê憑準是靠感覺，會hō͘家己爽快，就是「tio̍h」ê；會hō͘家己安全ê，就「Thang」去做；會滿足家己ê慾望ê，lóng是「好」ê；因為無光，也看bē tio̍h別人ê反應，別人ê感受，完全是以「自我做中心」ê人格。親像一個紅嬰á，無分辨ê能力，不管別人ê需要。所以有大ê體能、成熟ê肉體，卻是紅嬰á ê人格kap心思、心靈。

有一個譬喻講：有一個青瞑人tī黑暗暝出門gia̍h燈行路，tī半路hō͘人撞tio̍h，大聲罵講：「你是青瞑hio͘h，無看我gia̍h燈，就是驚hông撞tio̍h。」hitê人講：「真失禮，我m̄知影有燈。」原來燈光早就熄去。光ê目的，是beh照路，照別人，也照家己。但火若hoa去，就看bē tio̍h別人，也m̄知影家己，尚可憐ê，就是青瞑ê人，連家己ê「光」早已經消失，卻無知覺。今á日台灣ê社會整體thang講是一個無光ê心靈，雖有科技、經濟、生存ê體能，但在人性、人格ê長成，卻猶原tī紅嬰á ê階段。親像紅嬰á胡亂放屎，sìkè pùn圾亂tàn。人ê「自私、自利、自我」表現tī家庭生活、社會群體、政治組織ê頂面，無形、有形ê犯罪；法律、道德上ê犯罪，已經到tī慣犯ê層次，是非、公理、公義、公權已經m̄是道德ê標準。道德ê標準變做「行會通kap行bē通」ê問題。有錢駛鬼ē磨，有錢會當控制資訊，會當將烏變做白。所以道德標準到tī最後變做「有錢kap無錢」「有勢kap無勢」「有權kap無權」ê問題。做事憑感覺，m̄是照是非，這是亂世ê現象，親像人tī烏暗暝，無光、驚光、怨恨光。尚可悲ê是教會自認是「做光」，卻親像一個青瞑人gia̍h燈光行路，一方面是明哲保身，替別人照路，免得家己受災禍。但卻m̄知，chit pha燈光，一出門就hō͘外面ê強風吹熄。悲哀ê是因為家己青瞑，連燈光老早就hoa去toh m̄知。

耶穌ê時代ê法利賽人也kāng款，甚至是猶太人，以為家己會當做光、照光，但m̄知家己早就「無光」。因為無光看bē tio̍h真理（實），看bē tio̍h家己ê實存。所以耶穌tī土腳寫字幫助犯姦淫ê婦人人免受石頭丟死ê事件了，伊講：「我是世界ê光」。然後對猶太人講：「真理beh hō͘ lín得自由」，猶太人反駁講：「阮m̄ bat做人ê奴隸」，這句話是「無光」ê講法，因為tī歷史上in做過埃及、巴比倫、羅馬ê奴隸。所以無光ê現狀，就是對真理ê排斥，驚看tio̍h真理（實）。怨恨光，就是怨恨真理（實）。「凡若做歹ê，怨恨光，m̄來就近光，驚了伊ê行為受責備，但行tī真理（實）ê，beh來就近光，顯明伊所行ê，是靠上帝來行」（約三20－21）。今á日台灣教會若肯做上帝受苦ê奴隸，引導台灣社會tī光明中，tio̍h親像以賽亞四十二1－7所講：「有上帝ê靈kap我同在，將公理傳hō͘外邦；憑tio̍h真實將公理傳開；無失志，無喪膽，在地上設立公理；海島等候伊ê訓示.... . . ，做眾百姓ê中保，做外邦人ê光，開青瞑人ê目睭，引chhōa受關ê出牢獄，引chhōa坐tī烏暗ê出監牢。」台灣人ê心靈久長受壓迫，tī烏暗中，無安全感，致到轉向顧家己，自我中心真強ê社會人格，今á日教會beh做光，tio̍h先記得「耶穌是世界ê光」，先hō͘做主、做光，除去咱家己ê自閉，先家己目睭光，才會tàng引chhōa人tī光明中。