《各各他e5目屎--苦難得安慰》

 | | | 轉寄

作義ê器具

作者 紀福讚 2006.09.10

「Tio̍h獻lín ê百體hō͘上帝做義ê器具」（羅馬書六章13節）

1997年3月初四，台灣通過「菸害防治法」，禁止18歲以下ê青少年食菸，規劃禁菸場所kap罰則。Tī這個過程裡，禁菸基金會ê嚴道，是值得oló ê推動者。77歲ê嚴道，十外歲就開始食菸，50外歲ê時，正旁肺葉病變tio̍h割除。1963年，伊將公司業務交hō͘別人，成立董氏基金會，全心投入tī反菸害ê運動裡，tī公共場所，伊若看人食菸，伊會行倚去，蹲（khû）tī hitê人ê身邊，細聲kā講：「我kā你講一項代誌，請你m̄ thang受氣！Tī這款封閉ê空間，食菸是m̄好ê！」通常hitê人，看見這個老人，客氣、有禮貌ê苦勸，lóng會及時將菸擲掉。

保羅對腓立比教會講：「我tī第八日受割禮，是以色列族ê人，便雅憫ê支派，是希伯來人所生ê希伯來人。照律法，就是法利賽人；照熱心，就是khúntio̍k教會；照律法ê義，就是無phāng thang嫌。若是平素做我ê利益ê，我為基督已經看它做損害。M̄若ánni，我真正看萬事做損害，因為我掠bat我ê主基督耶穌做第一好。我為tio̍h伊bat損失一切，也看做pùn圾，是ài得tio̍h基督。（腓立比三章5－8節），che是保羅ê堅持。他bat有痛疼、錯誤ê經歷，hō͘ chē chē跟隨耶穌ê人喪失性命，但tī大馬色路上伊轉變了，伊就拚性命來見證，就棄sak hit款前看做有利益ê代誌，完全棄sak，看做pùn圾。tī羅馬書，伊進一步講：「莫得容允罪惡做王tī lín會死ê身軀，致到lín順趁私慾。也莫得將lín ê百體獻hō͘罪惡做不義ê器具。」（羅馬書六章12－13節）。

Tī hō͘哥林多教會ê批，他講：「Kiám m̄知lín是上帝ê殿，上帝ê靈tiàm tī lín內面mah？人若毀壞上帝ê殿，上帝也beh毀壞伊。」（哥林多前書三章16－17節）。所以，伊講：「是tio̍h將本身獻hō͘上帝，親像tùi死人中來活ê，也獻lín ê百體獻hō͘上帝做義ê器具。」（羅馬書六章13節），che是性命ê轉變。棄sak生活ê歹習慣，錯誤ê價值觀，歹ê意念，積極投入tī義ê行列，做義ê器具。

【祈禱】主ah！感謝你教示阮做義ê器具，做你聖靈khiā起ê所在！