《各各他e5目屎--苦難得安慰》

 | | | 轉寄

信仰見證á是商業廣告

作者 紀福讚 2006.10.01

Tī廣告性ê見證，咱常常會聽見一寡政治kap宗教ê術語，有時講ê人已經講習慣，親像「放屁」hiahni̍h自然。「高舉基督」、「oló主」、「感謝主」、「哈利路亞」.... . ，「主權在民」、「為民服務」、「老店新開」、「維護中華民國」、「二千萬人ê利益」、「咱就是台灣人，也是中國人」.... . 等等一寡政治kap宗教ê「痟話」、親像麻醉品自欺欺人、喊了會「爽」，但kantaⁿ「喊爽」nātiāⁿ。親像白人ê查某gín'á諷刺黃人ê查埔gín'á是「NATO」（no action talk only）。

台灣古早ê民風是謙卑、樸素，「是就是，m̄是就m̄是」。但今á日ê政治、宗教廣告詞，常常欺騙chiahê古意ê台灣人，致到台灣人愈來愈m̄敢「hō͘信」，「hō͘人騙kah驚tio̍h」。親像擔任chē年ê司法院長，講伊做公務人員40年尚疼心ê，是「選風愈來愈歹」。但伊bē記得，伊做省主席、內政部長、司法院長20冬久，端正選風是伊尚主要ê職責，伊完全無盡責，koh怨嘆別人，koh kantaⁿ想beh做總統，出嘴lóng是仁義道德，一點點á lóng無感覺見誚，tútú親像最近台灣水災省政府救災ê預備金，hō͘宋楚瑜提去「賄選」里長、鄉長，soah將責任sak hō͘無權限ê高雄縣長，家己扮演救災ê英雄，呼籲民間捐獻，這是「有夠烏koh惡毒ê手段」，但有偌chē人會瞭解呢？演戲ê廣告大家lóng會曉poaⁿ，但真正肯做代誌，甚至犧牲權益ê見證，就m̄是政客、神棍所會當表現ê。

廣告，á是見證，tī選舉ê時刻，台灣人tio̍h愛目睭「peh hō͘金」，有智慧來判斷，m̄ thang koh做「phan'á」。

這個時代是注重廣告、包裝ê時代。啥物人會當掌握資訊、媒體，啥物人就會當「烏白顛倒」、「隨意捏造事實kap形象」。所以，愈會曉演戲ê人，愈受群眾ê擁護，愈會當名利雙收。特別是一位公眾ê人物，伊若bē曉演戲，就註定無「票房」，hō͘群眾棄絕。譬如，宋楚瑜就是一位包裝ê專家，也是一位真容易入戲ê演員。做新聞局長ê時，打壓台語tī電視頂出現，今四界做「台語秀」；tī國民黨ê中常委「憤慨」ê表演，幫助李登輝取得黨主席，也完全得伊ê信任，到處標榜是「死忠部隊」；tī省議會大唱「哭調á」，「氣走」、「驚走」吳伯雄；伊thang講是一位真標準ê政治演員。Tī今á日台灣ê政局，這是真有「票房」ê。相對tī宋楚瑜ê演戲性格，陳定南是一位「硬氣正直」ê人，伊tī宜蘭做縣長ê時，六親不認，取締貪污，kap王永慶電視辯論環保，hō͘伊氣kah phutphut跳；鐵腕處理民進黨員ê賄選，無顧可能面對ê反擊，會tàng看出伊是一位是非分明，無驚特權ê政治個性。對這兩種個性極端相對ê省長候選人，會當看出台灣今á日ê民主政治水準kap智慧，是ài看演戲，á是對做代誌ê人認同。

政治演員ê特點，就是「食西瓜，倚大旁」，政治立場隨時會當改變；伊ê政治意識，就是「做官」，若有官thang做，跪teh叫人祖公，伊都敢表演，bē感覺歹勢。所以，「khiú衫á裾」是伊ê特長。宋楚瑜以前輕視講台語ê台灣人，今á日為tio̍h beh「做官」，啥物『肉麻』、聽了會「kaléngsún」ê話lóng講會出來。這是演戲ê台詞，soah hō͘台灣ê善良百姓聽kah真感動。Che tútú是趙少康ê表演，是為tio̍h「中國人」ê選票，m̄是為tio̍h真正ê民主、正義。伊也是標準ê演員。做環保署長ê時，m̄敢取締RCA ê污染，m̄敢取締一寡弊端，對抗特權，kantaⁿ敢揀一寡「軟柿á」做戲。伊對李登輝ê抗議是出tī對台灣人ê輕視，台灣人bē tàng做頭，m̄是真正為tio̍h「民主」，掠tio̍h外省人愛看戲，想beh報復ê心理，抗議李登輝來得tio̍h選票，m̄是真正為tio̍h民眾ê權益，做啥物款ê抗爭。這kap朱高正當時做戲ê心理仝款，無L P敢對特權抗爭，但為tio̍h權益、票房，啥物戲都敢演。

今á日，tī宗教界也是仝款。注重包裝形象，廣告家己。親像某一位青年佈道家，專辦一寡廣告型ê聚會。Tī洛杉磯租一間會當坐3000人ê禮拜堂拍廣告，聚會出席數百人，但tī鏡頭處理了，變做一大陣群眾。將錄影帶寄去台灣做廣告，電視、報紙頂買廣告推銷，ánni phah開知名度，成做出名ê少年佈道家，但伊ê本質無變，所以為tio̍h吸引觀眾，佈道會ê參加者會當得tio̍h鍍金ê十字架做禮物。佈道會變做是一種ê商業活動，m̄是宗教信仰ê見證會。

今á日是資訊ê時代，愈會曉利用大眾傳達工具ê人或團體，就會愈興。所以，教會也迷信媒體ê功能，一項小事，通過媒體，顯露tī公眾ê面前，就變做大事。因此，教會á廟寺等等ê宗教團體會tàng製作種種ê錄影帶來見證in ê信仰，表現in ê信望愛，才有所謂ê電視佈道家或佛家講座等等ê現代產品。Chiahê產品lóng經過chē少ê包裝，才傳到觀眾ê面前。Tútú親像一寡醫藥、日常用品ê廣告一樣，有時廣告kap見證真歹區分，真ê kap假ê真困難判定，烏ê kap白ê也難得分明。一分ê「真」會當變做十分ê「廣告」，主要是看包裝手法ê好歹，但過頭好ê包裝，有時soah成做欺騙，失去宗教本質上ê「真」。親像一篇真súi ê講道，伊ê見證內容hō͘人真感動，也會激發人去行善ê立志，但見證本身soah是虛假，ánni，這篇講道soah成做善意ê欺騙，若是動機無純正，是為tio̍h取利得名，就成做高明ê騙術，是非常恐怖ê本質，親像政治ê參與，有時是出tī真高超ê情操，有時是高明ê騙術仝款。