《各各他e5目屎--苦難得安慰》

 | | | 轉寄

虛假ê高貴

作者 紀福讚 2006.09.24

基督教ê人士時常流傳這個故事：倫敦聖保羅大禮拜堂ê設計工程師克利斯多夫，視察工地ê時，問3個工人，「你teh做啥物代誌？」第一個回答：「我teh裝水管，趁錢渡三頓」第二個講：「我teh疊磚á，趁錢飼某子」，第三個講：「我teh灌水泥，但我mā teh參與起造一間輝煌ê拜堂，hō͘人tī chia敬拜上帝。」 牧師常常用這個例來鼓勵人參與教會ê義工kap奉獻，也教人tio̍h有高貴ê情操來自我肯定家己ê人生。但講ê時，kiámchhái lóng忽略一項事實，就是前二個是講真話，做工趁錢，艱苦甘願；第三個講話khah好聽，m̄ kú做工ê時，憂頭結面。這是一種虛假ê高貴，也是今á日台灣人真流行ê心態kap產品。

明明是因為「歪哥，強佔宿舍，引起公憤，hō͘人siàn嘴phóe，soah家己面頂貼金á講：「這個『siàn嘴phóe』是pa所有中華民國ê國民」，hō͘人聽了會「呸血」；明明是「愛名koh愛利」，soah講是「為tio̍h beh盡一份薄力服務大眾」；明明是「權力ê鬥爭」，soah講是「beh突顯啥物碗糕問題」；明明是「大頭病，死豬鎮砧」，soah講是「為tio̍h維護體制」；明明是「家己內心充滿怨恨」，soah講是「對方無誠心悔改」。這種虛假ê高貴是對群眾極度ê蔑視、欺騙、侮辱，莫怪hō͘人聽了真想beh「chhohkànkiāu」，因為除了ánni出氣以外，會hō͘氣死。但咱想看māi，今á日台灣人ê心靈是m̄是也受這種虛假ê高貴所污染neh？

耶穌bat指責當代ê一寡自命清高ê猶太人律法師講：「Lín是粉白ê墓，外面好看，內面是àu骨頭。Lín tī人ê面前顯出公義，內面卻裝滿假善kap不法ê事。」台灣人受中國文化ê污染，凡事lóng想beh「名正言順」、「理直氣壯」，結果就為家己製造一寡虛名歪理來自我安慰，也欺騙無知ê群眾。親像最近ê「中華民國tī台灣」、「麥××關懷兒童演唱會」、「三民主義統一中國」，. .... . . lóng是用外面好看ê包裝來hō͘跟隨ê群眾kap參與ê人感覺是一種高貴ê行動。其實lóng是戲弄ê騙術，愚民ê心態，m̄ nā這種欺世盜名ê行為愛做這款「虛假ê高貴」，連一寡真有意義ê行動，也lóng是用真好聽ê口號來包裝，親像「退報救台灣」、『買雛菊，救雛妓』」.... 等。這種過頭軟性ê訴求，只是一種「虛假ê高貴」，hō͘一寡邪惡koh khah縱行。若是去除這個高貴ê纏絆，改做khah強烈ê抗爭，kiámchhái會khah有效果。問題是chiahê參與抗爭ê人，家己tī「道德上ê自省kap節制」是m̄是有夠額「無thang嫌」？若無，也是另外一種型式ê「虛假ê高貴」。『嫖雛妓』總比「欺騙少女ê感情」kap「放sak某kiáⁿ」khah有道德。罵別人ê報紙胡亂報，家己ê報紙是m̄是犯tio̍h kāng款ê毛病？是m̄是也墮落tī另外一種「虛假ê高貴」？

愈文明ê所在愈chē這種「虛假ê高貴」，親像農藥加上芳水，tī無形中吞食草地人ê樸實純真，也殘害大眾ê心靈，soah認為是對大眾有利益ê「殺蟲劑」，大家悽慘chōaⁿ，鼻起來真爽快，看bē tio̍h目睭前討厭ê蟲，soah同時teh殺害家己ê性命，製造無形ê污染。這是草地人所擔憂ê。耶穌bat講：「Lín ê話，是就講是，m̄ 是就講m̄是，若koh加講，就是出tī惡。」是m̄是值得咱想看māi？