注意頂面 ê 經節有一字細細，無注意 tio̍h ê 字 “tī”！有真 chōe 例，上帝無 ài hō͘ 伊 ê 聖徒 tú tio̍h 火，火會 kā 人燒傷，燒疼。總是咱 “tī”ta̍k 樣苦難中也 beh 榮耀主。
Tùi chit 種 ê 道理，咱 tī 火焰中，也 tio̍h 榮光伊。伊容允試煉臨到咱，hō͘ 咱 beh 經歷 tio̍h 完完全全 ê 信心，相信伊 ê 好意 kap 真實 ê 疼痛。Tùi 火中經過以後，咱 tùi 各種事會 kohkhah oló 主。
Tùi 火中經過，是需要真大 ê 信心，若是小信 ê 人會失敗。咱的確 tio̍h tī 火中得勝利。──Margaret Bottome
信心是 tī 一個人 tú tio̍h 困難 ê 時 chiah 會顯露出來，受人 hiat tī 火中 ê Satekla̍h，Bísoah，Apeknîko，chit 三人當離開火 ê 時，lóng 無改變，kap 原來同款，只是綑縛 in ê 鎖無去 nātiāⁿ。父上帝 tī 咱 ê 苦痛 ê 試煉火爐中，也會解除咱 ê 鎖鏈。
Chit 三人 tùi 烈火中經過，lóng 無受傷，身上連起皰也無。火無力 thang 傷 in ê 身軀，頭毛也無臭 ta，衫也無變色，lóng 無一點 á 臭火 ta 味。(但以理 3:27)
一個基督徒應該ánni行出火 ê 試煉爐──鎖鏈解除，身體無受火炎傷害。
「Tùi 內面來大大 khah 贏伊」(歌羅西 2:15)
真正 ê 勝利就是，tī 破病中贏過破病；tī beh 死 ê 時超越死亡；tī 逆境中克服逆境。相信我，確實有一個力量，tī 衝突中 hō͘ 咱會 khah 揚。
當咱達到 tī 高 ê 所在，回頭看咱所行 ê 路，咱 beh 唱勝利 ê 歌。當咱散赤 ê 時，會 hō͘ 人富裕，人也 beh 看咱是富足，咱已經 tī 散赤中 khah 贏散赤。
基督 tī 伊 ê 受侮辱中，忍耐得勝，咱也 beh tī 受人侮辱中，忍耐得勝利。── Margaret Bottome
看 tio̍h 一個受考驗，受重擔，心猶原是快樂 ê 人，咱 kiám bōe 欣羨伊？看 tio̍h 受引誘，無失迷來得勝 ê 人，咱 kiám 無感染伊 ê 英雄氣慨？看 tio̍h 一個 kap 你同行，身體衰 lám，精神堅強 ê 人，你 ê 心 kiám 無感動，kap 伊 saⁿkap 光榮？
|
|
|
轉寄
