《宋澤萊新著《天路拾穗》TOJ/台灣字版》

 | | | 轉寄

Chútê 21：Siāukài honggiân（lênggí）kîtó tōa chheh “Kiâⁿ tī lêng ni̍h ─ Kiâⁿ tī tōa lêng ni̍h"

作者 Sòng Te̍klâi 2026.07.26

Chútê 21：Siāukài honggiân（lênggí）kîtó tōa chheh “Kiâⁿ tī lêng ni̍h ─ Kiâⁿ tī tōa lêng ni̍h"

Tō͘ Khèngsêng：Góa khòaⁿ Pêⁿ Ioksek bo̍ksu ê iáⁿphìⁿ, i kiàngī honggiân（lênggí）kîtó liáuāu, anchēng chi̍t tōaⁿ sîkan, SiōngChú ē siúⁿsù ōegí. Góa tú kàu hāuhn̂g honggiân kîtó, siōng chúiàu ê ūi tio̍h chukeh khó, Tâioân Bûnha̍k Ha̍khōe kah chi̍tkóa kòjîn ê tāichì. Nā góa chēngchē koh kîkiû SiōngChú siúⁿsù ōegí, bô kàu saⁿ huncheng, náuhái tiong to̍h phû chhut "sèngkeng” kengbûn, chhinchhiūⁿ, lí tio̍h choansim óakhò SiōngChú, I ittēng sêngchiū lí só͘ kiû só͘ siūⁿ ê tāichì; jīnbat SiōngChú sī tìhūi ê khaitoan téngténg. Chhiáⁿ mn̄g lāusu, che kám to̍h sī SiōngChú beh kā góa kóng ê ōegí? Honggiân kîtó chi̍t tōaⁿ sîkan liáuāu, chin bênghián ê, góa éngkòe chin kipsò, phahkiatkhiû ê kòsèng, tit tio̍h siongtong thêngtō͘ ê káisiān, mā chin chió hoat phîkhì. Tosiā lāusu, hō͘ góa liáukái honggiân kîtó ê òpì.

Sòng Te̍klâi：Iúkoan àⁿ hīⁿkhang thiaⁿ SiōngChú só͘ sù ê ōegí engkai sī kah ībāng, īsiōng kâng chi̍tê hoānûi, sī sio̍k tī chiósò͘ lâng ê te̍ksû châilêng, Pêⁿ Ioksek khólêng to̍h sī chit chióng lâng, i bô sio̍k tī kóng honggiân chit chióng tōatosò͘ lâng phó͘phiàn insù ê hoānûi. Kóng honggiân tùi thêko àⁿ hīⁿkhang thiaⁿ SiōngChú ê ōegí ê lêngle̍k khólêng m̄sī chin tōa, ná chhinchhiūⁿ góa chitmá suijiân píkàu khah piàⁿsì chò honggiân kîtó, m̄koh pēng bô hoatkiàn góa ê ībāng kah īsiōng ū chengka ê hiānsiōng. Lióngchiá kipún siōng chìnhêng tī chin bôkâng ê chêngkéng tiâukiāⁿ hā.

Kóng honggiân ê choanka Dave Roberson tī ”Kiâⁿ tī lêng ni̍h ─ Kiâⁿ tī tōa lêng ni̍h " chit pún chheh ni̍h kā sìntô͘ kóng m̄thang àⁿ hīⁿkhang thiaⁿ SiōngChú ê ōe, i itseng kantaⁿ ū chi̍t pái thiaⁿkòe SiōngChú kā i kóngōe, i kah SiōngChú kauthong ê koántō tûliáu kóng honggiân ígōa, lóng sī īsiōng, ībāng píkàu khah chē; kiámchhái i jīnûi àⁿ hīⁿkhang thiaⁿ SiōngChú ê ōegí píkàu khah iông’ī tìsú chhòkak. Góa mā kantaⁿ ū chi̍t pái píkàu khah sǹg sī lênggiām ê, tongsî ū thiaⁿ tio̍h SiōngChú hō͘ góa bó͘ lâng ê miâ, āu lâi góa khì chhōe hit ê lâng, tāichì chiū káikoat, kîtha pēng bô thiaⁿkòe SiōngChú bat hō͘ góa siáⁿmi̍h lênggiām ê ōegí, góa kah SiōngChú kauthong ê koántō tûliáu honggiân kîtó ígōa, tōapō͘hūn sī ībāng, tī "Kitokkàu Thongsìn" ni̍h lí thang khòaⁿ tio̍h góa siá chin chē ībāng, lóng chin oa̍hthiàu chúnkhak.

Ētàng thiaⁿ tio̍h SiōngChú ê ōe sī chi̍t chióng te̍ksû ê insù, thiaⁿ kóng ētàng ka hùnliān lâi ka kakiông. Kinkì góa só͘ chai, Tâitiong ū bó͘ chi̍tê kàuhōe choanbûn hùnliān sìntô͘ ánchóaⁿ ētàng thiaⁿ tio̍h SiōngChú ê ōegí; góa ū pêngiú chhamka hùnliān, mā iauchhiáⁿ góa chhamka, m̄koh góa bô sîkan, só͘í chiū bô khì, chin khósioh; góa siūⁿ kiámchhái he sī chi̍t mn̂g chin choanbûn ê ha̍kbūn. Lí kóng honggiân liáuāu ē píkàu khah pêngchēng, si̍tchāi tio̍h kā lí kionghí, che tùi sengoa̍h huisiông iúek. Góa sī tiāⁿtiāⁿ kámkak kahná thâuchêng ê chiònggāi jiakhàm bô khì, ētàng ti̍tchiap bīntùi SiōngChú kóngōe kângkhoán.

Kóng honggiân ê òpì ittēng tio̍h khòaⁿ honggiân choanka Tabi̍t Robertson ê “Kiâⁿ tī lêng ni̍h ─ Kiâⁿ tī tōa lêng ni̍h" chit pún tōa chheh! Chit pún chheh sǹg sī tâm honggiân òpì kah ánchóaⁿ chhauliān honggiân ê choan chheh, lāibīn tùi tī kóng honggiân chit hāng tāichì ū huisiông chhimji̍p ê lūnsu̍t kah chítō. Kóng tio̍h bo̍kchêng, choânkiû tāikhài ū 2,000 bān lâng ēhiáu kóng honggiân, m̄koh góa kó͘kè tāikhài ū 9 siâⁿ ísiōng ê lâng bô tit tio̍h gōa tōa ê līek. Goânin chāi tī ētàng kóng honggiân sī chi̍t kiāⁿ chin kántan ê tāichì, kúi huncheng chiū ēhiáu à; khùnlân ê sī tī chhauliān siōng. Kóng honggiân ittēng tio̍h ta̍k kang ēng nn̄g tiámcheng ísiōng ê sîkan khì chhauliān, liânsòa chi̍t kàu saⁿ kògoe̍h chiah ētàng sánseng tōa sìnsim kah sînjiah, ta̍k kang kóng kúi huncheng ê honggiân sī bē ū siáⁿmi̍h tōa hāukó ê. Tabi̍t Robertson ê “Kiâⁿ tī lêng ni̍h ─ Kiâⁿ tī tōa lêng ni̍h" chit pún chheh ūi lán phahkhui ánchóaⁿ chhauliān honggiân ê honghoat, mā kóng tio̍h chióngchióng putkhósugī ê sînjiah. Góa jīnûi Tabi̍t Robertson ê kiaⁿlâng sînjiah sī ētàng ho̍kchè ê, koankiàn tiám chāi tī íkeng ēhiáu kóng honggiân ê lâng sī m̄sī goān’ì kah i kângkhoán, bih tī sió pângkeng, liânsòa saⁿ kògoe̍h kui kang chò honggiân kîtó; nā ētàng, engkai sī jīmhô lâng lóng khólêng kengle̍k tio̍h kah i kângkhoán koântō͘ ê sînjiah.

Siūⁿ beh oa̍ttho̍k chit pún chheh ê lâng, chhiáⁿ tiám ēkha bāngchí, ētàng biánhùi oa̍ttho̍k, Http://www.daveroberson.org/....../WOSWOP......

Siūⁿ beh bé chit pún chheh ê lâng, chhiáⁿ tiám ēkha Sūimá chhutpánsiā ê bāngchí, chi̍t pún siūkè 250 kho͘, Https://www.rhemapublishing.com/books/4100.html

──2023, 03, 25 tah tī "Kitokkàu Thongsìn"