《宋澤萊新著《天路拾穗》TOJ/台灣字版》 |
 |
 |
|
 轉寄 |
Chútê 34：Sènglêng lāichū（éngchū）honghoat, phiatpō͘
作者 Sòng Te̍klâi 2026.10.25
Chútê 34：Sènglêng lāichū（éngchū）honghoat, phiatpō͘
Chia só͘ kóng ê lāichū sī teh chí "éngchū" tī sengkhu ni̍h lâi kóng.
Tng chi̍tê lâng sìn Iésu liáuāu, chíiàu chitê "sìn" sī "chin sìn", Sènglêng to̍h ē lâi kàu sìntô͘ ê sengkhu téng.
Chísī, tú khaisí ê lāichū tōapō͘hūn sī téchiām ê, Sènglêng chóng sī khì koh lâi, lâi koh khì. Ūsî koànak lo̍h lâi, hō͘ lán ētàng kóng honggiân, kiâⁿ sînjiah, tit ībāng, tit īsiōng. Ūsî sī chhiongmóa sìntô͘ ê lōechāi, hō͘ lán chi̍tsî kámkak kó͘bú, giânhêng ū la̍t, sīmchì ētàng kakiông kakī ê hóekái hiòngsiān lêngle̍k, chiongkîbóe ētàng chin kín thêngchí kakī ê okhêng. Chísī, chiah ê lêngle̍k tī Sènglêng līkhui liáuāu, to̍h koh siausit à, ittēng tio̍h tán kàu Sènglêng koh chi̍t pái lâilîm ê sî, i chiah ētàng tiôngsin khioh tńglâi lêngle̍k. Lâilâikhìkhì ê Sènglêng, pangchān sìntô͘ kiâⁿ tī sìngióng ê lō͘ ni̍h, kiànkò͘ sìntô͘ kuiê jînseng sìngióng ê kiâⁿkiâⁿ koh thêngthêng ê le̍kthêng. M̄koh, chiongkîbóe ū chi̍t kang, Sènglêng lāichū tī sìntô͘ ê sengkhu ni̍h bô koh līkhui, to̍h khaisí sánseng Sènglêng ê lu̍t, ētàng kah “lāu góa” ê chōe ê lu̍t siocheⁿ, kauchiàn keklia̍t, siōng bóe Sènglêng ê lu̍t tī síchōe ê lu̍t, hō͘ chōe ê lu̍t bô koh tī sengkhu ni̍h chò pháiⁿ, lán chiongkîbóe páithoat chōe ê chòeāu khúnpa̍k, kámkak lán chhengkhì à, oa̍hoa̍h khòaⁿkìⁿ hitê chōeok ê sèkài oánlī; tio̍hsǹg khòaⁿ tio̍h sèkan ê chōeok kahná tōachúi kòngkòng lâu, kā chitê sèkài imbia̍t, m̄koh íkeng bô hoattō͘ ùjiám góa ê sinsim, sèkài ê lâsâm koh khah ánchóaⁿ to bô góa ê hūn ā. Che to̍h sī Sènglêng lāichū（éngchū）liáuāu só͘ tòa lâi ê konghāu, I íkeng ínchhōa góa ētàng pêngan tòa tī énghêng ê pêngan, hílo̍k ê lo̍khn̂g ni̍h à.
Ánne, ánchóaⁿ ētàng hō͘ Sènglêng tùi lâilâikhìkhì piànsêng éngchū tī sengkhu ni̍h leh? Chitê pìkoat ittēng tio̍h kiànli̍p tī tùi Sènglêng lāichū ê "puttoān ǹgbāng" téngbīn, bô í bó͘ chi̍tkóa Sènglêng ê insù, Sènglêng ê koànak, Sènglêng ê chhiongmóa tòngchò boánchiok, chīnle̍k khúnkiû Sènglêng lāichū tī sengkhu ni̍h, sàutû só͘ū sengkhu téng, sin lāi ê lâsâm, ittēng ài ta̍tkàu koh khah oânchoân, koh khah sèngkiat ê tēpō͘. Kású ū chitê ǹgbāng, chiongkîbóe ū chi̍t kang, Sènglêng to̍h ē éngchū tī lí ê sengkhu ni̍h, chhōa lí lâi kàu oânchoân sèngkiat, oânchoân chhengkhì ê tēpō͘!
──2014, 07, 05 tī Lo̍kkáng
