《宋澤萊新著《天路拾穗》TOJ/台灣字版》

 | | | 轉寄

Chútê 10： Lí mā ētàng kà lâng kóng honggiân（lênggí）! _3

作者 Sòng Te̍klâi 2026.03.22

Tējī pō͘ Sènglêng koànak

Chútê 10： Lí mā ētàng kà lâng kóng honggiân（lênggí）! _3

3） Ìgōa o̍h ēhiáu kàutō pa̍tlâng kóng honggiân
2004 nî, Jînchong bo̍ksu, Sêngtek huhū, Sèhun hiaⁿ tiāⁿtiāⁿ lâi goán tau chūhōe ê sî, to̍h sī góa o̍h ēhiáu kà lâng kóng honggiân ê khaisí. Tēitê hō͘ góa kàutō ētàng kóng chhut honggiân ê lâng to̍h sī Sèhun hiaⁿ.

Hit sî, goán chūhōe tiāⁿtiāⁿ kóng tio̍h kóng honggiân chit hāng tāichì, suijiân tongsî Sìngīhōe tùi sìntô͘ kóng honggiân chit hāng tāichì chháichhú pósiú ê thāitō͘, m̄koh ànchiàu goán ê kenggiām, kóng honggiân tùi lêngmiā ê sêngtióng ū bôpí ê hāule̍k, tng goán chòhóe kîtó ê sî, mā tiāⁿtiāⁿ ēng honggiân kîtó.

Só͘í chiū ánne ínkhí iáu bē hiáu kóng honggiân ê Sèhun hiaⁿ ê hèngchhù. Ū chi̍t pái chūhōe ê sî, Sèhun hiaⁿ to̍h kóng i siūⁿ beh o̍h honggiân, ài goán kà i.

Hit tongsî, honggiân kóng kah píkàu khah itliû ê lâng, sī góa kah Sêngtek hiaⁿ. M̄koh Sêngtek hiaⁿ só͘í ēhiáu kóng honggiân ê goânin, pēng m̄sī lâichū liāmsiōng "Halélú'iah" chit kù oló sû; i sī kengkòe chi̍t ūi Sinkapho pò͘tōka ê hōaⁿchhiú, hutjiânkan kóngkhí honggiân. Iā to̍h sī kóng Sènglêng kengkòe hit ūi pò͘tōka ê chhiú, thoânta̍t kàu Sêngtek hiaⁿ ê sengkhu téng, i inūi ánne hutjiân ēhiáu kóng honggiân. I kóng honggiân ê lêngle̍k bô chhinchhiūⁿ Chin Iésu kàuhōe ê sìntô͘, ittēng tio̍h sinkhó͘ liāmsiōng "Halélú'iah" tit tio̍h ê; ōaⁿ kù ōe kóng ̄, i m̄bián ha̍ksi̍p to̍h ēhiáu kóng honggiân à. Kìjiân m̄sī ha̍ksi̍p lâi ê, to̍h bô siáⁿ khólêng chaiiáⁿ kàutō thajîn kóng honggiân ê honghoat! Só͘í góa to̍h chūkòhùnióng kóng, “Góa lâi kà lah!"

Kóng si̍tchāi ōe, hit tongsî góa m̄sī chin ū chūsìn, inūi góa sī kengkòe chin chē nî hùntàu chiah ēhiáu kóng honggiân ê, simlāi chaiiáⁿ kóng honggiân m̄sī hiahni̍h kántan. M̄koh, kìjiân Sèhun hiaⁿ siūⁿ beh ha̍ksi̍p, góa to̍h engkai kà i, tio̍hsǹg tongtiûⁿ bô hoattō͘ kóng chhut honggiân, íāu mā thang ànchiàu góa kà ê honghoat, kakī ke khah chē liānsi̍p, kàu siōng bóe mā ittēng ētàng kóng honggiân.

Góa seng kā Sèhun hiaⁿ kóng, "Honggiân sī tùi ' Halélú'iah ' chit sì jī choánōaⁿ kòe lâi chò ê, tng lán kā chit sì jī ēng ke̍k kín ê soktō͘ tōasiaⁿ liânsòa liāmsiōng, kàu siōng bóe, lán ê gíim to̍h ē khòaⁿ khí lâi būbū bô bêng; kohchài kakhoài soktō͘, lán ê chhùichi̍h to̍h ē kńg khí lâi, kóng chhut chi̍t chióng lán só͘ bô hoattō͘ líkái ê ōe. Lán engkai tī simlāi kiantēng jīnûi góa ētàng kóng chhut thiⁿsài ê ōegí; îit ài chò ê tōngchok to̍h sī bô só͘ kiaⁿùi lâi tōa imliōng, jîchhiáⁿ kakhoài soktō͘ lâi liām"

Góa koh kā i kóng, tng i liāmsiōng "Halélú'iah" ê sî, góa ē itchài hōaⁿchhiú tī i ê thâukhak téngbīn, tng góa hōaⁿchhiú ê sî, i to̍h ke tōa imliōng, cheng khoài sok tō͘.

Ūi tio̍h beh hō͘ i chaiiáⁿ honggiân sī siáⁿmi̍h, góa seng sīhoān chi̍t hēlia̍t ê honggiân hō͘ i thiaⁿ. Góa kóng chíiàu thâu khíseng hoatchhut chi̍tê bóim, m̄kóan sī A, E, I, O, U……ê tiongkan jīmhô chi̍tê, góa to̍h ētàng kóng chhut chi̍tê ōekù, múiê ōekù lóng bôkâng, góa mā m̄chai in ê ìsù, m̄koh in ê kiōngtông tiám to̍h sī chi̍h im te̍kpia̍t chē, inūi hit kóa ōe chúiáu sī tùi chhùichi̍h chìntōng sánseng ê, chhùichi̍h sī kóng chhut honggiân ê pìbi̍t só͘chāi. Góa siôngsè sīhoān kóng honggiân hō͘ i thiaⁿ.

I chiū ánne khaisí liām khí "Halélú'iah" chit sì jī, góa to̍h hōaⁿchhiú tī i ê thâukhak téngbīn, kó͘lē i ke tōa imliōng, kakhoài soktō͘. Ūi tio̍h bô beh hō͘ i sitkhì tōngle̍k, góa to̍h tī i ê sinpiⁿ chò "tan imchat ê honggiân kîtó", góa ēng "tah, tah, tah, tah" chit chióng ke̍k kín ê chi̍h im tī i piⁿ'á tōasiaⁿ kîtó, kiò i ētàng chhiauoa̍t góa ê siaⁿim ê imliōng kah soktō͘. Ta̍k pái i ê liāmsiōng ê siaⁿim sè lo̍h lâi á sī soktō͘ bān lo̍h lâi, góa to̍h hōaⁿchhiú tī i ê thâukhak téngbīn, kā i kóng, "siaⁿim siuⁿ sè! Soktō͘ siuⁿ bān! Kaiû! Koh chài kaiû!” Góa ài i bōngchêng kîtó, phahpiàⁿ kîtó, kahná chi̍t pah bí cháupio písài, hiòng chêng ti̍tti̍t chhiong!

Chhaputto 20 hun cheng liáuāu, i ê thâuhia̍h ū kōaⁿ, m̄koh liāmsiōng "Halélú'iah" ê gíim būbū bô bêng ā, sòachiap i kóng chhut kúiê chi̍h im honggiân, suijiân bô ku̍tliu, m̄koh siaⁿim chin tōa. Góa koh kiò i tōasiaⁿ kèsio̍k kóng, i chiongkîbóe ētàng bô thêng kóng chhut sio liânsòa ê honggiân à. Chiongkîbóe tāikongkòsêng lah!

Che sī góa kà Sèhun hiaⁿ kóng honggiân ê kuiê kengkòe, mā sī thâu chi̍tpái kà lâng kóng chhut honggiân. Suijiân góa kah i lóng chin chia̍hla̍t, chin bô kántan chiah kà i ētàng kóng chhut honggiân, m̄koh góa iáu sī kiaⁿ chi̍t tiô, inūi i kèngjiân ētàng kóng chhut sio liânsòa ê honggiân, kah góa púnlâi īkó͘ ê bô kângkhoán, góa púnlâi jīnûi i bô siáⁿ khólêng ē tongtiûⁿ kóng chhut honggiân.

Góa to̍h siūⁿ, "Chin kîkoài! Sèhun hiaⁿ kèngjiân chiahni̍h kín to̍h ēhiáu kóng honggiân à. Góa phahpiàⁿ 10 nî ísiōng chiah ēhiáu kóng honggiân, i kèngjiân 20 hun cheng to̍h o̍h ēhiáu, chinchiàⁿ sī bô kongpêⁿ!" M̄koh, góa chinchiàⁿ ūi i chin hoaⁿhí.

Chiū tī hit tongsî, góa ìsek tio̍h, goânlâi kóng honggiân ittēng ài ū lâng tī piⁿ'á kàutō, kó͘lē, ittàn khiàmkhoat kàutō, kó͘lē, khò kakī tanto̍k liānsi̍p siūⁿ beh kóng chhut honggiân, ittēng ē piàn kah bôpí ê kanlân!

Tējī pái kàutō pa̍tlâng kóng honggiân, sī tī kīlî Lo̍kkáng bô hn̄g ê "Kheô͘ Choânjîn Koanhoâi Tiongsim（Kheô͘ Sìngīhōe）", sîkan mā sī 2004 nî.

Ū chi̍t pái, Jînchong bo̍ksu anpâi góa khì "Kheô͘ Choânjîn Koanhoâi Tiongsim" iánkáng, kóng siáⁿmi̍h to̍h piànsêng lântê. Tongsî, góa tùi Kitokkàu kàulí oânchoân m̄bat, tiāⁿtiāⁿ chi̍t khuichhùi to̍h chaiiáⁿ kakī kóng m̄ tio̍h, kinpún to̍h bô kángtō ê púnsū. Góa chin siūⁿ mài khì, khiok thesî bē tiāu. Kàu siōng bóe, góa chò mō͘hiám ê koattēng, siūⁿ beh kà Kheô͘ ê sìntô͘ kóng honggiân.

Góa chiàusiông m̄sī chin ū sìnsim, mā m̄ káⁿ kóng ēng chi̍t tiámcheng ê sîkan to̍h siūⁿ beh kàutō gōa chē lâng ētàng kóng chhut honggiân. M̄koh nā ētàng kà chhut chi̍t nn̄gê lâng kóng honggiân, káipiàn chi̍t nn̄gê lâng ê lêngmiā chōnghóng, to̍h chin boán’ì à. Inūi bôlūn ánchóaⁿ kóng, kóng honggiân tùi lêngmiā ê hāukó lâi kóng, pí thiaⁿ 50 pái, 100 pái ê iánkáng khah hó!

Kàutō honggiân ê sîkan sī Lépàiji̍t ê chákhí 10~11 tiám, tiûⁿbīn kiámchhái píkàu khah tōa, lâi lépài ê lâng chhiaukòe 20 lâng ísiōng, ū lâng thiaⁿ kóng góa beh kà honggiân, sīmchì tùi hn̄ghn̄g ê só͘chāi kóaⁿ lâi chūhōe. Góa kiaⁿ chi̍tê lâng ènghù bē khì, inūi ánne to̍h chhiáⁿ Sèhun hiaⁿ kah Sêngtek hiaⁿ lâi pangbâng, ǹgbāng in ētàng hia̍pchō͘ góa.

Kójiân, chiânlâi"Kheô͘ choânjîn koanhoâi tiongsim"chhamka lépài ê lâng kiōngiú 21 lâng, chhaputto lóng sī bē hiáu kóng honggiân, chit tiám tiantò ū kóa hō͘ góa ìgōa, kámkak Sìngīhōe siuⁿkòe pósiú lah.

Góa chúnpī chi̍t tè CD, lāibīn tōapō͘hūn sī kîkiû Sènglêng kànglîm ê koa, huisiông hóthiaⁿ. Tī khaisí kàutō chìnchêng, góa seng pòhòng chiahê koa, bānbān'á tán chūhōe ê lâng choân sò͘ kàu chê. Tī hòngsàng imga̍k ê sî, góa phó͘phó͘ á hoatkiàn Sènglêng kahná tī lépàitn̂g ê téngbīn niûthiāu kan teh liûtōng, hō͘ góa kámkak ū kóa beh chùi khì ê hit chióng kámkak, sìnsim inūi ánne piàn kah chin oa̍htāng.

Khaisí kàutō ê sî, kah kàutō Sèhun kângkhoán, ài in liāmsiōng "Halélú'iah" ê siaⁿim tio̍h kóaⁿkín, ài tōasiaⁿ; góa ē hōaⁿchhiú tī in thâukhak téngbīn, ē tī in ê hīⁿkhang piⁿ kîtó; in ittēng tio̍h kah góa kēngcheng, khòaⁿ siáⁿlâng ê liāmsiōng siaⁿim píkàu khah tōa, píkàu khah kín.

Tongsî, góa sú'iōng màikuh, hō͘ góa ê kîtó piàn kah píkàu khah iông’ī.

Góa mā seng sīhoān chi̍t piàn honggiân kîtó, ài in chù’ì honggiân kîtó to̍h sī chi̍h im ê kîtó.

In ê kîtó chi̍t khaisí, góa lûnliû chi̍tê chi̍tê ūi in hōaⁿchhiú, tī in ê hīⁿkhang piⁿ kîtó, kó͘lē in tōasiaⁿ koh khoàisok kîtó. M̄koh jînsò͘ si̍tchāi siuⁿ chē, piàn kah ū chi̍t tiám'á oh ènghù, góa kantaⁿ ētàng tī bó͘ lâng ê piⁿ'á thêngliû chi̍t, nn̄g huncheng to̍h līkhui, kohchài ōaⁿ kàu lēnggōa chi̍t lâng ê sinpiⁿ khì, kahná chhân eⁿ tiámchúi. Góa chiū ánne kā ǹgbāng khǹg tī màikuh téngbīn, góa itti̍t ēng màikuh chò"tan imchat ê honggiân kîtó", hō͘ "tah, tah, tah, tah" ê siaⁿim hiáng piàn seklāi, góa itti̍t ài in tōasiaⁿ koh khoàisok kîtó, chi̍t tiám'á to bô ài in sanglēng lo̍h lâi!

10 kúi huncheng kòeliáu, góa hoatkiàn ū chímōe khaisí teh khàu, mā ū lâng itti̍t lâu ba̍ksái. Tng góa kiâⁿ khì in sinpiⁿ ka khòaⁿ, to̍h thiaⁿ tio̍h in íkeng kóng chhut honggiân. Góa koh khah phahpiàⁿ, chiàu sūnsī pang múi lâng hōaⁿchhiú kîtó, itti̍t kóng in ê siaⁿim siuⁿ sè, soktō͘ siuⁿ bān; chi̍t tú tio̍h íkeng kóng chhut honggiân ê lâng, góa to̍h kā i kóng íkeng ēhiáu kóng honggiân ā, ài i koh khah tōasiaⁿ kîtó.

Chi̍tba̍knih kú, 30 hun cheng kòekhì à, góa hoatkiàn ēhiáu kóng honggiân ê lâng jú lâi jú chē, ū kóa lâng ê siaⁿim huisiông tōasiaⁿ, jîchhiáⁿ kui sengkhu chìntōng, huisiông chìnji̍p chōnghóng.

45 huncheng liáuāu, góa kòjîn íkeng kámkak chihchài bē tiâu, siaⁿim piàn kah ū kóa jio̍k lo̍h lâi, lâng mā thiám loh, góa to̍h soanpò͘ thêngchí kîtó, kiatsok chit tiûⁿ kàutō.

Liáuāu, góa kiò íkeng ētàng kóng chhut honggiân（tī kàutō kòethêng tiong hō͘ góa chhengchhó jīntēng ētàng kóng chhut honggiân chiá）ê lâng gia̍h chhiú, kiōngiú 7 lâng, hunpia̍t sī So͘ Kimhô, Chiā Sèhun, Chu Phàichin, So͘ Chhiausèng, Tân Gio̍klêng, Âng Gio̍khio̍h, Tân Iāmhông. Tiongkan í So͘ Chhiausèng ê siaⁿim te̍kpia̍t tōasiaⁿ koh phiauchún. Lēnggōa iáu ū 3 lâng sī góa jīnûi óakīn ētàng kóng honggiân pianiân ê lâng （ētàng hoatchhut bô liûlī ê chi̍h im）, hunpia̍t sī Lí Éngtó͘, Chiu Bēngkun, Liāu Kénggî.

Siusêng chhiaukòe góa ê ànsǹg, kèngjiân ū chiahni̍h chē lâng tongtiûⁿ o̍h ēhiáu kóng honggiân, tāikhài sī ū saⁿ hun chi it; ōaⁿ kù ōe kóng ̄, saⁿ lâng tiongkan to̍h ū chi̍t lâng ētàng kóng chhut honggiân; koh khah hôhòng iáu ū chi̍tkóa lâng mā lâi kàu kóng honggiân ê pianiân. Chit pái mā hō͘ góa kiaⁿhiâⁿ giâugî bô thêng.

Lēnggōa, tī kūnî, "Lo̍kkáng Sìngīhōe" sêngli̍p bô gōa kú, góa koh tī chūhōe tiong chòhóe kàutō sìê lâng, hit tiongkan ū Tân Bûnkiat, Tân Bûnkiat ê lāubú, Tân Bûnkiat ê khanchhiú ētàng kóng chhut honggiân, sîkan chhaputto pòaⁿ tiámcheng, í Tân Bûnkiat ê siaⁿim te̍kpia̍t tōasiaⁿ koh phiauchún. Chit pái ê pílē sī sìhun chi saⁿ.

Iáu ū chi̍t pái sī kà Âng Siokkheng chímōe kóng honggiân, sîkan tāiiok chí ēng 10 huncheng chóiū.

Koh tī Ôngkeng kà Î Kùi hiaⁿtī kóng honggiân, chit pái siōngkín, Î Kùi hiaⁿtī tāikhài kantaⁿ ēng 2 huncheng ê sîkan to̍h kóng chhut honggiân.