《宋澤萊新著《天路拾穗》TOJ/台灣字版》

 | | | 轉寄

Chútê 10：Lí mā ētàng kà lâng kóng honggiân（lênggí）! _4

作者 Sòng Te̍klâi 2026.03.29

Tējī pō͘ Sènglêng koànak
Chútê 10：Lí mā ētàng kà lâng kóng honggiân（lênggí）! _4

4） Honggiân ê pêngsiông sèng, si̍tiōng sèng kah chhauliān
Góa tùi honggiân ê chiapchhiok, kàu chitmá ûichí, íkeng chhiaukòe 30 nî ísiōng ê sîkan, só͘ chiapchhiok ê ētàng kóng honggiân ê lâng huisiông chē, bôlūn seⁿ chhiú mā hó, kochhiú mā hó, góa lóng jīnbat kòe. M̄koh pēng bô tú tio̍h kóng honggiân ê lâng ū só͘ūi "khí mô͘ kong（Hôagí ê “cháu hóe ji̍p mô͘"）” ê hiānsiōng; tiantò sī góa tú tio̍h ēhiáu kóng honggiân ê Kitoktô lóng sī huisiông chek ke̍klo̍k koan, in inūi chaiiáⁿ Sènglêng ê chi̍tkóa tōlí, piàn kah huisiông pênghô koh ū chūsìn, in inūi ánne bē hām lo̍hkhì"in hêngûi chhenggī” ê phianchha lāité, ētàng chunhêng Sènglêng ê kàutō lâi sêngchiū sìngióng, hō͘ huisiông lâng chunkèng. Só͘í kóng honggiân iaumô͘ hòa ê chokûi, chāi góa khòaⁿ khí lâi sī bô engkai ê. In bē hiáu kóng honggiân m̄ to̍h hó ah, soah mā bētàng iôngín pa̍tlâng kóng honggiân, sīmchì tiāⁿtiāⁿ giâmtiōng siatto̍k Sènglêng, chionglâi ittēng ē chia̍h tio̍h kiⁿ. Lán nāsī tú tio̍h chit chióng lâng, engkai siānì kā i kiùchèng, chiah biántit i itti̍t m̄ tio̍h, chiongkîbóe tìsú bô hoattō͘ siusoah.

Tôngsî, mā ū lâng kòehūn kokí kóng honggiân ê hāukó, jīnûi kóng honggiân chiah ētàng"titkiù", che iū koh sī chi̍tê ke̍ktoan ê khòaⁿhoat. Kóng honggiân kám ētàng titkiù? Chit tiám góa bô siáⁿ chaiiáⁿ. M̄koh hoan piàn "sèngkeng" choa̍ttùi chhâ bē tio̍h"kóng honggiân ittēng titkiù"chit kù ōe, só͘í kóng liáu mā téngî pe̍h kóng. "sèngkeng"kantaⁿ ū"in sìn chheng gī","sìn koh siūsé ittēng titkiù"chiahê kengbûn."sìn Iésu"chiah sī titkiù ê îit hoatmn̂g, kîtha lóng sī phònghong jîí. Só͘í tú tio̍h chit chióng bô chhâkhó "sèngkeng" kóng honggiân ê lâng, lán mā engkai tio̍h kā i khoàntō, hō͘ i tńglâi"in sìn chheng gī” ê tōlō͘, hō͘ i ū jīnbat"kṳàu chinlí” ê kihōe, lí bián tùi i siuⁿ khehkhì, chiah biántit hāi tio̍h i!

Chóng kóng chi̍t kù, kóng honggiân sī chin pêngsiông ê, kah lán ēhiáu kóng Enggí, Ji̍tgí sī kângkhoán, m̄nā bē oh o̍h, mā bô siáⁿmi̍h hikî, ēng pêngsiông ê simthài lâi khòaⁿthāi to̍h hó.

Lēnggōa, kóng honggiân ū nn̄gê kongiōng, chi̍tê sī chōchiū kakī; lēnggōa chi̍tê sī chōchiū kàuhōe. Tī chōchiū kakī chit hongbīn, náisī chí ētàng giú kīn Sènglêng íki̍p Iésu kah lán chi kan ê kīlî, hō͘ Sènglêng kah Iésu bi̍tchhiat tī lán ê simlāi seⁿ kin; jîchhiáⁿ jú kóng honggiân, chit chióng kámkak to̍h ē jú lâi jú chhim, che sī chin bênghián ê hāukó, sī bēsái hó͘ⁿjīn ê sūsi̍t. Suijiân Páulô kā kóng honggiân ê insù lia̍t tī káu chióng insù ê āubīn, hō͘ lâng kámkak i sī"siōng sè ê insù", m̄koh tī si̍tchè ê thégiām lāité, i pí"ībāng","īsiōng"koh khah ētàng giú kīn lán kah Sènglêng, Iésu chi kan ê kīlî. Lán chaiiáⁿ, ētàng chò "ībāng” “īsiōng” ê lâng chin iông’ī to̍h piànsêng"sianti", inūi Sènglêng ē chià tio̍h"ībāng","īsiōng"tāiseng kā i kóng chi̍tkóa tāichì, khòaⁿ khí lâi insù sī chin tōa ê; khósioh ê sī chit chióng lâng iáu sī bô hoattō͘"sîsîkhekkhek"ū"ībāng","īsiōng". Inūi lán tûhui khùn khì, nā bô, bē ū"ībāng"; mā bô khólêng ta̍kê tī tngthâu pe̍hji̍t lóng ū"īsiōng". M̄koh, lán khiok ētàng"sîsîkhekkhek"kóng honggiân, iā to̍h sī"sîsîkhekkhek"hō͘ kakī chhimchhiat kámsiū tio̍h SiōngChú kah góa tôngchāi, che sī kóng honggiân bô khóchhú tāi ê iusè, só͘í lí kám ētàng kóng i sī siōng sè ê insù?

Tôngsî, ū lêngle̍k tiāⁿtiāⁿ chò"ībāng","īsiōng"sīmchì"thiaⁿ tio̍h SiōngChú ê ōegí” ê lâng chin chió, bô chhinchhiūⁿ kóng honggiân ê lâng hiahni̍h phó͘phiàn, to̍h koh khah hō͘ lâng kámkak i sī chiâⁿ tiōngiàu. Kóng honggiân chiah sī Sènglêng kah chèng sìntô͘ chi kan siōng hó ê kauthong koántō, ittàn hòngkhì kóng honggiân, to̍h téngî sī chia̍ttn̄g Sènglêng kah sìntô͘ chi kan siōng hó ê ónglâi kiôniû, chit tiám ta̍ttit hoántùi kóng honggiân ê lâng hóhó’á chimchiok sukhó! Tongjiân, góa m̄sī kóng hoānnā ēhiáu kóng honggiân ê lâng, ittēng ētàng kah Sènglêng chìnhêng siōng chhimkhek ê kauliû, ū ê lâng suijiân ēhiáu kóng honggiân, m̄koh tùi Sènglêng ê thégiām iáu sī bô hoattō͘ chhimji̍p, che to̍h ài khòaⁿ kóng honggiân ê lâng kám goān’ì phahpiàⁿ"chhauliān honggiân"（iā to̍h sī tiāⁿtiāⁿ kóng honggiân ） lâi koattēng.

Itpoaⁿ lâi kóng, kantaⁿ ēhiáu kóng kúiê imchat honggiân ê lâng kah ētàng tn̂gphiⁿtāilūn soeh honggiân ê lâng sī bô kângkhoán. Chêngchiá ê kong la̍t chhián, hiōchiá ê kong la̍t chhim, che sī ittēng ê tōlí. M̄koh, khò"chhauliān"（iā to̍h sī tiāⁿtiāⁿ kóng honggiân）, kàu siōng bóe chíū kóng kúiê imchat ê lâng mā thang piànsêng ētàng kóng kah lòlò tn̂g ê lâng, hō͘ chi kan ê chhapia̍t hông giú pêⁿ. Kiaⁿ ê to̍h sī, ū kóa íkeng o̍h ēhiáu kóng honggiân ê lâng bô koh kóng honggiân, tìsú 10 nî, 20 nî liáuāu, i chiàusiông kantaⁿ ēhiáu hit kúiê imchat ê honggiân, che to̍h chin khósioh loh!