《宋澤萊新著《天路拾穗》TOJ/台灣字版》 |
 |
 |
|
 轉寄 |
Chútê 18：Kámkak kahná tī thiantông ni̍h kîtó sī ánchóaⁿ chi̍t hôesū?（ji̍tkì saⁿ chek）
作者 Sòng Te̍klâi 2026.07.05
Tējī pō͘ Sènglêng Koànak
Chútê 18：Kámkak kahná tī thiantông ni̍h kîtó sī ánchóaⁿ chi̍t hôesū?（ji̍tkì saⁿ chek）
Jī Goe̍h chhe 3：
Kin'áji̍t chò chi̍t tiám gōa cheng ê honggiân kîtó, kàu ēpo͘ ê sî, ūi tio̍h Jī Goe̍h chhe 7 beh tī Tâipak Chēlâm Kàuhōe ê chi̍t tiûⁿ iánkáng chò chúnpī, chiāmthêng kîtó. M̄koh hutjiân kámkak simlêng ni̍h ê sīkak tōa khui, chìnchêng só͘ū jiakhàm tī thâuchêng ê mi̍hkiāⁿ lóng pī sóa khui ā, chi̍tê chin khoah bô piⁿkài ê sèkài chhuthiān, kahná liâmpiⁿ khílâi kàu bôhān kiongchhong ê thiantông, khoah bóngbóng, jîchhiáⁿ khiā tī SiōngChú ê bīnchêng; inūi ánne koh kèsio̍k chò chi̍t tōaⁿ sîkan ê honggiân kîtó, iáu sī hoatkiàn kahná to̍h tī chinsi̍t ê thiantông kah tī SiōngChú bīnchêng teh chò kîtó! Chìnchêng m̄sī ánne. Chìnchêng chò kîtó ê sî chóng sī kámkak sī tī kēé ê jînsèkan hiòng iâuoán thiantông ê SiōngChú teh kîtó, kámkak beh hō͘ SiōngChú thiaⁿ tio̍h kakī ê kîtó chin khùnlān, ittēng tio̍h kengkòe Iésu á sī Sènglêng ê thoânta̍t á sī choánkò, SiōngChú chiah ē thiaⁿ tio̍h. Chitm á bô kângkhoán loh, kîtó ê sî kahná sûisî kàu thiantông, to̍h khiā tī SiōngChú bīnchêng teh chò kîtó, chit tiám hō͘ kakī kámkak chin kiaⁿhiâⁿ giâugî!
Jī Goe̍h chhe 4：
Kin'áji̍t ê kîtó kah chahng kângkhoán, To̍h kahná sûisî kàu thiantông, lâi kàu SiōngChú ê bīnchêng chò kîtó. Jîchhiáⁿ hoatkiàn kakī ê honggiân kîtó koh khah liúlia̍h, khoàisok, ū la̍t. Āu lâi koh hoatkiàn, ēng ngó͘sèng kîtó（itpoaⁿ ê gígiân kîtó）mā sī kângkhoán, tāiseng mā sī hoatkiàn kahná sûisî lâi kàu thiantông, sòachiap mā hoatkiàn kahná tī SiōngChú bīnchêng kîtó. Honggiân kîtó ipēⁿ choanka Dave Roberson bo̍ksu tī i tînsu̍t honggiân kîtó òpì ê chheh “Kiâⁿ tī Sènglêng ni̍h ─ kiâⁿ tī tōa lêng ni̍h” ni̍h kóng, “Tng lán ūi tio̍h chōchiū kakī, khaisí ēng honggiân kîtó, to̍h chìnji̍p chi̍tê sèngkiat ê 'lāi sek', hō͘ lán têngthâu seⁿ, chàichō kah Iésu Kitok chòhóe chē tī thiⁿténg ê lêng, mā kah SiōngChú kakī chòhóe tī sînsèng ê kauthong ni̍h. Che sī kòjîn ê kauthong, mā sī sèngkiat ê kauliû, Mô͘kúi bô hoattō͘ chìnji̍p hia." Chitê hoatkiàn huisiông liáuputkhí, inūi i hoathiān honggiân kîtó sî ê chi̍t tiâu sînsèng ê koántō ē phah thong, liáuāu kah SamūiΙtthé ê saⁿ ūi chòhóe tī hongpì ê koántō ni̍h, góa chìnchêng iā bat ū chit chióng kámkak; tng Dave Roberson siáchok “Kiâⁿ tī Sènglêng ni̍h ─ kiâⁿ tī tōa lêng ni̍h" ê sî, mā íkeng chò bo̍kchiá 25 nî, mā ū kóng 25 nî ísiōng ê honggiân. M̄koh chitmá góa só͘ hoatkiàn ê sī, tng lán chò honggiân kîtó ê sî, ū chi̍t kang ē chhuthiān chi̍t chióng chōnghóng, tāiseng sī hoatkiàn kahná sûisî lâi kàu khoah bóngbóng ê thiantông, sòachiap hoatkiàn kahná tī SiōngChú bīnchêng kîtó; jîchhiáⁿ liáuāu suijiân ēng ngó͘sèng kîtó（itpoaⁿ ê gígiân kîtó）mā hoathiān kângkhoán ê chōnghóng. Ōaⁿ kù ōe lâi kóng ̄, honggiân kîtó ētàng chōchiū lán lâi kàu chi̍t chióng kéngkài, nā lán chò jīmhô gígiân kîtó ê sî, ētàng sûisî hoatkiàn kakī kahná lâi kàu bôhān kiongchhong ê thiantông, liáuāu to̍h tī SiōngChú ê bīnchêng kîtó, koh khah ti̍tchiap, koh khah chhiauoa̍t, chitê hoatkiàn hō͘ góa kámkak bôhān ê phutphuttiô!
Jī Goe̍h chhe 5： Cha mê chò chi̍tê ībāng, góa hoatkiàn bāngni̍h chhuthiān chi̍t tiuⁿ kahná sī chhiam si ê mi̍hkiāⁿ, tē it ōekù siá, "Lí só͘ū ê chōe lóng pī siàbián à!" Sòachiap khòaⁿ lo̍h khì, khiok būbū bô chheng, khòaⁿ bē chhengchhó. Góa sûisî chhéⁿ khí lâi, chaiiáⁿ sī SiōngChú tùi góa ê hôetap. Inūi chêngji̍t kakī chò chi̍t kiāⁿ simlāi kámkak ū chōe ê tāichì, lâi hiòng SiōngChú chhàmhóe; tôngsî mā ūi kakī chitmá íkeng sòngsit ê 20 kúi hòe sî ê chûpi sim, kámkak bānpoaⁿ hiōhóe, siūⁿ bē kàu kakī chitmá kèngjiân piàn kah ánne, kámkak chitmá ê kakī oa̍h kah ke̍k chhinchhiūⁿ sitkhì só͘ū thiàⁿsim ê kiangsi, bâpì khì à! Kin'áji̍t mā khì kiâⁿ Oânlîm ê Tînsoaⁿ pō͘tō, hoatkiàn kòekhì só͘ū ê simlêng ni̍h ê kok chióng chó͘gāi lóng pī sóa cháu, in lóng pī sóa khì kàu sin gōa ê sèkài, to̍h bētàng chó͘tòng. Chìnchêng simlêng ni̍h chóng sī ū chi̍tlō͘ lúichek sò͘ cha̍p nî ê chióngchióng chiònggāi kah chhòchiat tī sìkho͘ûi, siôngsè kā in chhengtiám, lóng sī oansiû lâng kah sū（iā to̍h sī íkeng tekchōe kòe góa á sī bīlâi kiámchhái ē tekchōe góa ê lâng kah sū）, kā kakī ba̍t chiuhchiuh ûikhùn tiâu leh, lāibīn sīmchì paukoat kakī ê chìchhin; jîchhiáⁿ lúichek ê sò͘liōng jú lâi jú chē, chin ohtit hūtam. Inūi ánne, kah sìkho͘ûi khoânkéng ê tùili̍p, soah tiāⁿtiāⁿ bôiânbôkò͘ khòaⁿ khí lâi chin koân koh hàm, aple̍k chin tōa. Bêngbêng chaiiáⁿ che sī kakī khó͘náu, hùnnō͘, oànhūn, kíntiuⁿ, chhausim, utchut, tiûtû ……ê lâigoân, khiok m̄chai engkai ánchóaⁿ sī hó. Chitmá chiahê lóng pī sóa cháu ā, gánchiân kah sìkho͘ûi lóng bûchó͘ gāi, sī tī chi̍tê kngkng ê khiânkhun chi hā, khoah bóngbóng, simlāi huisiông pêngan, kahná lâng sī tī thiantông.
"Pêngan"chitê sû ê Enggí sī peace, iā to̍h sī hôpêng ê ìsù. Chitmá kakī koh khah chaiiáⁿ chitê sû ê hâmì, goânlâi sī teh chí"lênghûn ni̍h bô siûte̍k"ê ìsù, mā chaiiáⁿ sī ánchóaⁿ "sèngkeng" itti̍t khah kiông tiāu"goânliōng lí ê siûjîn"kah"siàbián pa̍tlâng"ê goânin; inūi tûhui ánne chò, lán ê simlāi to̍h bô pêngan! che sī honggiân kîtó só͘ tòa lâi ê hāukó chi it, te̍kpia̍t kā i kìlo̍k lo̍hlâi.
──2023, 02, 08 tah tī "Kitokkàu Thongsìn"
