《宋澤萊新著《天路拾穗》TOJ/台灣字版》

 | | | 轉寄

Chútê 1：Góa ūisiáⁿmi̍h beh siūsé? _1

作者 Sòng Te̍klâi 2025.11.30

Tē it pō͘, Chhenggī titkiù

Chútê 1：Góa ūisiáⁿmi̍h beh siūsé? _1
Íngiân：Chiahê kenggiām lóng hoatseng tī 2004 nî Gō͘goe̍h siūsé chìnchêng, chit phiⁿ bûnchiuⁿ mā siá tī 2004 nî ê Gō͘goe̍h, bat tengchài tī "Kàuhōe kongpò".
※ Sìn Iésu sí khì kohoa̍h
Góa sī chi̍tê koktiong lāusu kah Tâioân bûnha̍k chokka. Tāiiok tī 10 kúi nî chêng （engkai sī 1990 nî chóiū）, kah chin chē ài chheh ê lâng kângkhoán, góa ū chi̍t pún “sèngkeng”, thauthau'á siuchông tī thoah’á ni̍h, ūtangsî'á the̍h chhutlâi khòaⁿ, inūi khiàmkhoat kipún ê jīnbat, kantaⁿ chaiiáⁿ piáubīn, bē bêngpe̍k chhim’ì, inūi ánne oa̍ttho̍k ê sî mā to̍h chi̍tsut'á to bô chiuⁿhoat. Ū chi̍t pái chin ióngkám kā "sèngkeng " the̍h lâi ha̍khāu ê tōsu sek, chē kah chin sìchiàⁿ teh oa̍ttho̍k. Góa ê piⁿ'á chē chi̍t ūi "tēhng chūhōe só͘" ê lāusu, i pêngsiông sî mā chin phahpiàⁿ khòaⁿ “sèngkeng”, chheh ia̍h téngbīn ōe kah sòaⁿtiâu móamóa sī, âng n̂g le̍k nâ, huisiông lāujia̍t. I khòaⁿ góa hiahni̍h phahpiàⁿ, chin tôngchêng góa, to̍h thánkhisin kòelâi kā góa kóng, “Lí chiahni̍h iōngkong teh tha̍k “sèngkeng”, ittēng bat chin chē tōlí, m̄koh bat gōa chē góa bô beh mn̄g lí, góa kantaⁿ mn̄g lí chi̍tê būntê, khòaⁿ lí ū siáⁿmi̍h ìkiàn; chhiáⁿ mn̄g lí, 'Lí kám siongsìn Iésu sí khì kohoa̍h? '" Góa hō͘ i ánne mn̄g, ū tiûtû kúi biócheng, simlāi siūⁿ kóng, góa khòaⁿkòe chin chē bînkan sìngióng ê chheh, mā táchō chhamsiân kòe, só͘ūi iôngsînchhutkhiàu, chìnji̍p têngthiⁿ ê hoatsu̍t pēng bô hō͘ góa kámkak hikî; Iésu sī SiōngChú, ánchóaⁿ bô hoattō͘ kohoa̍h? M̄koh bē liáukái i ūisiáⁿmi̍h beh mn̄g góa chitê būntê, góa chi̍tbīn sukhó chi̍tbīn tiûtû hôetap kóng, "Góa …ētàng… siongsìn." M̄koh tī kóng oân ōe hitê sîchūn, góa hoatkiàn lōechāi ū chhuthiān chi̍tê oa̍hoa̍h Iésu ê hêngiáⁿ, tùi chiàⁿpêng kàu tòpêng, ná chhinchhiūⁿ pàng tiāniáⁿ kiâⁿ kòe, chhaputto beh thiàu kàu góa ê sīkak, góa tōa kiaⁿ chi̍t tiô, chaiiáⁿ Iésu iáu chûnchāi tī chitê sèkài siōng sī bô thang hoâigî ê, I iáu tī chitê sèkài siōng, jîchhiáⁿ lī lán bô hn̄g, sûisî lóng ētàng chhuthiān! Chhúāu, góa khòaⁿ “sèngkeng” to̍h choan kéng "Sù Hokim Su" lâi khòaⁿ, góa beh liáukái, Iésu tàuté sī ánchóaⁿ ê chi̍t chióng sîn á sī lâng, só͘í oa̍ttho̍k “sèngkeng” to̍h piàn kah chin ū tiōngsim. Góa ētàng siongsìn “sèngkeng” ni̍h Iésu ê itchhè giângí, mā siongsìn Iésu só͘ū ê kîchek īlêng. Chia góa só͘ kóng "siongsìn" sī teh chí "kā chit kóa lóng bô tiâukiāⁿ ka jīnûi sī chinchiàⁿ" ê ìsù.
Tongsî góa pēng m̄chai góa ê hitê hôetap ittēng ē hō͘ góa "chhenggī titkiù", inūi “Lômásu” 10: 9~13 kóng, “Lí nā chhùi ni̍h jīn Iésu chò Chú, simlāi siongsìn SiōngChú kiò I tùi sí ni̍h kohoa̍h, to̍h ittēng ē titkiù. Inūi lâng simlāi siongsìn, to̍h ētàng chhenggī, chhùi ni̍h sêngjīn, to̍h ētàng titkiù." Chitkù ōe íkeng soatbêng "chhenggī titkiù" ê honghoat, náisī kántan iông’ī kiâⁿ, chi̍tsut’á to bô sînpì ê chi̍t chióng honghoat. Kin'áji̍t ê Kitoktô lóng chaiiáⁿ "sìn jî titkiù" ê tōlí, m̄koh chin chē lâng iáu bô chùì tio̍h "sìn" siáⁿmi̍h? Ū kóa lâng loān sìn, si̍tchāi hō͘ góa kiaⁿhiâⁿ giâugî.
Kîsi̍t "sìn" túhó sī seng sìn"Iésu síkhì kohoa̍h", liáuāu kohchài jīn "Iésu chò KiùChú" chit nn̄gê kinpún ê tiōngtiám, he to̍h ēsái titkiù à. Tôngsî, suijiân “Lômásu” kā chit nn̄gê tiōngtiám hunpia̍t ūi "chhùi ni̍h soanjīn" kah "simlāi siongsìn", m̄koh ànchiàu kenggiām, siōng hó chit nn̄gê tiōngtiám lóng ētàng "soanjīn". Ōaⁿ kù ōe lâi kóng ̄, lí engkai tī pa̍tlâng ê bīnchêng ēng chhùi kóng chhut "góa jīn Iésu chò KiùChú" kah "góa sìn Iésu síkhì kohoa̍h" chit nn̄g kù ōe. Iûkî "sìn Iésu síkhì kohoa̍h" chitê soanjīn, hō͘ góa tī āulâi itchài kámkak ū kohoa̍h ê tōa lêng kànglîm tī sinchiūⁿ, sinsim jú lâi jú pêngan hílo̍k. Jîchhiáⁿ "Iésu síkhì kohoa̍h" chitê kàugī engkai sī "Sù Hokim Su" siōng chákî ê lōeiông, lán tùi “Sùtô͘ Hêngtoān” kah Páulô só͘ lâu lo̍h lâi ê susìn tiong ētàng tit tio̍h ìnchèng, tng chákî ê kàutô͘ khaisí soankàu ê sî, in kàuio̍k sìntô͘ siáⁿmi̍h "hokim” leh? Iā to̍h sī kóng, tongsî iáubōe oânchéng ê "Sù Hokim Su", só͘ūi ê "hokim" sī siáⁿmi̍h? Chíiàu lí siôngsè chhâkhó “sèngkeng”, to̍h ē hoathiān, siōng chá ê hokim to̍h sī "Iésu kohoa̍h chiūⁿ thiⁿ" chitê tansûn ê kàugī. Tng ū lâng m̄ sìn ê sî, só͘ū khòaⁿkòe Iésu kohoa̍h chiūⁿ thiⁿ ê bûntô͘ lóng chhutlâi kiànchèng, kah m̄ sìn ê lâng tiánkhui keklia̍t ê piānlūn, chèngbêng Iésu tekkhak íkeng "kohoa̍h chiūⁿ thiⁿ ̄” loh. Siongsìn ê lâng to̍h sī Kitoktô, m̄ siongsìn ê lâng to̍h iûgoân sī Iûthài kàutô͘, ánne jîí. Tôngsî chitê kàugī ētàng koànthong kàu sèkài siōng bóe iúkoan "sílâng kohoa̍h", "boa̍tji̍t símphòaⁿ" kah "sin thiⁿ sin tē" ê tōlí, kongchhú lán tùi "kṳàu chinlí" ê chhimkhek jīnti, tùi líkái Kitokkàu ê pangchān huisiông tōa. Itti̍t kàu chitmá, tng ū lâng kā Kitokkàu bú kah bō͘khìtîmtîm, khàukhàuthîthî ê sî, góa lóng ē kámkak kîkoài, góa chhim chai Kitokkàu m̄ sī aitō chhiûchhám ê chongkàu, i engkai sī chhinchhiūⁿ bo̍kio̍kchhunhong, tiaukhìchhiotiô ê chongkàu chiah tio̍h, che kîtiong ê goânin túhó sī sìntô͘ khiàmkhoat tùi "kohoa̍h chiūⁿ thiⁿ" ê chhimkhek líkái, bētàng chaiiáⁿ "kohoa̍h chiūⁿ thiⁿ ̄" tī Kitok sìngióng tiong só͘ chiàm ê hūnliōng, chiah tìsú ánne ê kiatkó. Chúiàu ê sī, "kohoa̍h chiūⁿ thiⁿ ̄" chiah sī Kitokkàu kàugī ê he̍ksim, tûliáu chiahê ígōa, Kitokkàu to̍h bētàng hoatchhut chhànlān ê konghui kah bûkiông ê hílo̍k.