《宋澤萊新著《天路拾穗》TOJ/台灣字版》

 | | | 轉寄

Chútê 20：Siūⁿ beh kiò "sílâng khiā khí lâi" ê kiaⁿkî thégiām

作者 Sòng Te̍klâi 2026.07.19

Tējī pō͘ Sènglêng Koànak
Chútê 20：Siūⁿ beh kiò "sílâng khiā khí lâi" ê kiaⁿkî thégiām 　　
Góa beh kóng chi̍tê chinsi̍t ê kò͘sū. Chit hāng tāichì engkai sī hoatseng tī 2023 nî Chiaⁿ Goe̍h. 　　　　

Ū chi̍tê lâng tùi 2022 nîté óakīn kòenî ê sî, hē koatsim ta̍k kang chìchió beh chò 2 tiámcheng ê honggiân（lênggí）kîtó, jîchhiáⁿ chìchió ài liânsòa saⁿ kògoe̍h ánne chò. Tú khaisí chitê lâng to̍h huisiông jīnchin, bôlūn ji̍tsîthâu á sī àmsî, ū sîkan to̍h kîtó, kiatkó chi̍t kang kîtó ê sîkan ka khílâi sǹg, huisiông khókoan, óngóng ū 3~4 tiámcheng hiah chē. Chit tōaⁿ tn̂gkî ê kîtó tī Sì Goe̍h té chiongchí, sǹgsǹg leh chóngkiōng ū sì kògoe̍h kú. 　　
Kiámchhái sī chit chióng liânsòa sèng ê honggiân kîtó ētàng hō͘ lâng chìnji̍p kah Sènglêng tôngchāi ê chhimchân tētài, sîsiông ē tòa lâi bó͘ chi̍tkóa liāusióng bē kàu ê sînjiah. Pílūn lâi kóng, tī chit sì kògoe̍h lāi, ū chin chē bat kah m̄bat ê pêngiú itti̍t lâi Lo̍kkáng chhōe i, in iaukiû i kà in kóng honggiân, chitê lâng mā bô kīchoa̍t kòe in, hoānnā chiânlâi ê lâng, chhaputto ū peh siâⁿ ê lâng lóng tī 10 huncheng lāi to̍h kóng chhut honggiân, chìchió ētàng kóng chhut tan imchat ê honggiân. Ū chi̍tkóa siàuliânlâng kinpún bô suiàu ke kà in siáⁿmi̍h, chi̍t chē tī i ê bīnchêng, to̍h sûisî kóng chhut sio liânsòa huisiông liúlia̍h tōasiaⁿ ê honggiân, chinchiàⁿ sī hō͘ lâng kiaⁿhiâⁿ giâugî. Sīmchì iáu ū lâng tī tiānōe tiong kah i chòhóe kóng honggiân, mā lóng ētàng tī 10 huncheng lāi to̍h kóng chhut honggiân. Chitê lâng kinpún to̍h m̄chai sī ánchóaⁿ ē hoatseng chit khoán tāichì, chísī kámkak āubīn ū chi̍t kó͘ sînpì ê le̍kliōng teh chútō che itchhè, kah bô jīmhô lêngle̍k ê i púnsin bô siuⁿ tōa ê koanhē. 　　　
Tī chit kîkan, chi̍t kiāⁿ koh khah kîkoài ê tāichì mā hoatseng; hoatseng ê sîkan tāikhài sī tī 2023 nî Chiaⁿ Goe̍h té. Ū chi̍t pái chitê lâng khì chi̍t keng ū kóngkhoah khongkan ê chhiauchhī khòaⁿ chheh kah choh honggiân kîtó. I chē tī koân kha ê í'á téng tahtah ū nn̄g tiámcheng kú, tāikhài sī inūi sîkan siuⁿkòe kú, hutjiân kámkak liaphō͘sòaⁿ koh bē sóngkhoài khí lâi. Hoānnā ū liaphō͘sòaⁿ chéng tōa chèngthâu ê pêngiú tāikhài lóng chaiiáⁿ, hit chióng bô sóngkhoài to̍h sī chi̍t chióng chéng khí lâi ê kámkak, seng tī ēpaktō͘ ê tiongng pō͘ūi bîbî'á thiàⁿ, chhiongmóa kàu kuiê ēpaktō͘, liáuāu koh thoân kàu téngpaktó͘ lâi, óngóng piàn kah hōanchiá puttekput tháu khui iotòa, lâi kiû chiāmsî ê khinsang. M̄chai sī ánchóaⁿ, chit pái liaphō͘sòaⁿ ê tiùⁿthiàⁿ, hō͘ i huisiông siūkhì. Tāikhài sī inūi chìnchêng chitê lâng bat tī chi̍t pái ê ībāng tiong, hoatkiàn ū chi̍t tiâu n̂gsek ê tōa chôa peh khui tōa chhùi, tîⁿ tiâu tī i ê paktó͘, tī ēkha hiòng téngbīn, tùi i hoatchhut huisiông sàngsè ê thiauchiàn chuthài. Só͘í íāu hoānnā liaphō͘sòaⁿ thiàⁿ, óngóng liântài hō͘ i siūⁿ tio̍h ībāng tiong ê hit bóe chôa. Thang oànthàn ê sī, kútn̂g ílâi, chitê lâng chóng sī khì io̍hpâng bé chi̍tkóa io̍h'á lâi tīliâu tiùⁿthiàⁿ, bô gōa goān’ì chhap chit chióng tiùⁿthiàⁿ; ōaⁿ kù ōe lâi kóng to̍h sī bóng tō͘ bóng kòe. I ê thāitō͘ chhìnchhái thang khòaⁿ chò sī tùi liaphō͘sòaⁿ chéng tōa á sī hit bóe chôa ê bô taôa, sīmchì thang kóng sī tùi in chiongkīn sī chi̍t chióng chi̍t tiám'á pānhoat to bô ê hoánèng. M̄koh chit pái, i chò oân chin tn̂g ê chi̍t tōaⁿ honggiân kîtó liáuāu, hutjiân piàn kah chin siūkhì, tùi in huisiông thóià. Ū chi̍t kó͘ le̍kliōng tùi sengkhu lāi seng koân, to̍h kámkak i ētàng kikolîmhā, oânchoân chèho̍k hit chióng tiùⁿthiàⁿ kah hit bóe chôa, jîchhiáⁿ kámkak ittēng tio̍h tùi in pòsiû soathūn. I seng tī simlāi kah chhùi ni̍h chho͘ló͘ chiùmē chi̍t chūn'á, hutjiân hōng Iésu ê miâ hōaⁿchhiú tī paktó͘ téngbīn, jîchhiáⁿ kéngkò hit bóe chôa, tùi i kóng kású m̄ līkhui, ánne to̍h iû Iésu seng kā i siak lo̍hkhì tēga̍k ni̍h, á sī chitmá to̍h iōng tēga̍k ê hóe lâi sio i, inūi pī hóesio to̍h sī i ohtit pībián ê siōng bóe ūnmiā. I mē siaⁿ liânliân, itchài kā i khukóaⁿ chhut khì! Kóng mā kîkoài, i ê paktó͘ sûisî khaisí ti̍tti̍t hoatchhut kuhkuh ê hiángsiaⁿ, chéng chin kín to̍h siau lo̍h khì, paktó͘ bóe hoeho̍k píⁿ pêⁿ ê kámkak, kantaⁿ tī kúi huncheng sîkan lāi, tiùⁿthiàⁿ phah bô khì à, kahná chiônglâi bô phòa kòe pēⁿ ê khoán（chù：Tùi ánne sǹgkhí, itti̍t chiongkīn gō͘kò gōa goe̍h liáuāu, paktó͘ bóe chōnghóng chiàusiông ánne chin hó）, i to̍h chaiiáⁿ i íkeng pī i hó à.

Sòachiap koh hoatseng tī siōng thâuchêng só͘ kóng ê siūⁿ beh kiò "chi̍tê sílâng khiā khílâi" ê kîkoài tāichì, to̍h hoatseng tī liaphō͘sòaⁿ chéng thiàⁿ pī i hó ê liáuāu nn̄g kang. Chitê lâng ēkìtit sī tī hit kang ēpo͘, i khì khiāke piⁿ'á ê HiLife chhiauchhī bé kóa ímliāu, liáuāu, kiâⁿ kòe Lo̍kkáng Kitokkàu pēⁿīⁿ, iân tōa kelō͘ kiâⁿ tńgkhì chhù ni̍h. I chhiú the̍h ímliāu, iânlō͘ kiâⁿlō͘, iânlō͘ choh honggiân kîtó, sinsim kámkak chin khoàilo̍k. To̍h tī lī chhù bô hn̄g ê chheⁿâng teng si̍pjīlō͘ kháu, hoathiān kelō͘ tòpêng, ū chi̍t hō͘ jînke tng teh chò songlé, chi̍tê tōatōa ê pò͘pêⁿ kè tah tī tōathiaⁿ mn̂gkháu, téngbīn íkeng tà phângpò͘, lāibīn khaisí teh chò chi̍tkóa pâisiat, mā ū túnchek chi̍tkóa songlé ēng ê mi̍hkiāⁿ. Tāikhài sī khò͘ chîⁿ kimchóa iáubōe khaisí sio, chhinchiâⁿ pêngiú mā iáubōe lâi, kantaⁿ ū chi̍t tùi siàuliân ê lâmlú tī pêⁿkè lāigōa teh bôêng chìnchhut, khòaⁿ khí lâi iáu ū kóa chhengchēng.

I tùi pêⁿkè thâuchêng kengkòe, to̍h chhinchhiūⁿ hōaⁿchhiú tī liaphō͘sòaⁿ hit chi̍t pái kângkhoán, ū chi̍t kó͘ kângkhoán ê le̍kliōng koseng khí lâi, jîchhiáⁿ koh khah khí koân siaⁿ, siūⁿ beh chèho̍k bó͘ chióng tùili̍p mi̍h ê hit chióng kámkak koh chhuthiān à. I hutjiân chi̍tsî tī pêⁿkè thâuchêng thêng pō͘, m̄ kiâⁿ à. Chitê kítōng liân chitê lâng kakī lóng kiaⁿhiâⁿ giâugî khí lâi, m̄chai goânin chhut tī tóūi!

Chit chióng kítōng sī ûihoán chitê lâng íóng bīntùi pa̍tlâng songlé ê itkoàn thāitō͘. Chū sèhàn, i to̍h sī chi̍tê chin kiaⁿ khòaⁿ tio̍h songlé ê lâng, tāikhài chū sèhàn to̍h sī sengkhu soejio̍k, ìchì la̍t nńgchiáⁿ, hoānnā khì kàu songlé hiāntiûⁿ, lóng ti̍tkak kámkak hit thâu ū bônglêng chûnchāi, ūtangsî'á iáu khòaⁿ tio̍h lāibīn ê só͘ūi sehong saⁿ sèng, Tēchōng Ông Phô͘sat á sī cha̍ppeh chàn ê tēga̍k tô͘, koh khah hō͘ i kámkak khióngpò͘ kah ohtit títòng, kámkak he sī huisiông put kiatsiông ê só͘chāi. Tōahàn íāu, chitê lâng chiàusiông ánne; inūi ánne, bôlūn songlé tōasè, chíiàu i khòaⁿkìⁿ chi̍t tiámtiám’á hêngiáⁿ, to̍h se̍h hn̄glō͘ phiahkhui, m̄ hō͘ kakī bak tio̍h chi̍t tiámtiám’á soeūn. Sǹgmiā ê lâng kóng che sī "patjī siuⁿ khin" só͘ tì, m̄koh i ê patjī sī sì niú, pēng bô sǹg khin, engkai sī kah patjī bô siáⁿmi̍h koanhē. Koh khah chhim ê goânin kóng che sī chūchiông chhengsiàuliân sîkî khaisí, i to̍h itti̍t kámkak kakī sèngtē bô hó, ìài hoānchōe, bô lâng ētàng kiù i, sí liáuāu chùtiāⁿ lânbián ē phiaulîu khì bêngkài á sī tēga̍k, kah bônglêng chòhóe teh kòe bô ǹgbāng ê sengoa̍h iúkoan. "Síbông liáuāu"chit chióng mi̍hkiāⁿ chin chá to̍h chiâⁿchò i jînseng ê chi̍t chióng chiùchó͘.

M̄koh, kóng mā kîkoài, chit pái chitê lâng kèngjiân ētàng m̄ kiaⁿ pa̍tlâng ê songlé, tiantò sī tī songlé ê thâuchêng khiā chāi khapō͘. 　　
Chi̍t sî'á, hit kó͘ seng koân ê le̍kliōng piànsêng chi̍t chióng chhiongtōng, hō͘ i kámkak suiàu kiâⁿ kòe pêⁿkè, chìn ji̍pkhì khehthiaⁿ, kiò hitê íkeng síkhì ê lâng khiā khí lâi, ìsù to̍h sī khì kiò sílâng koh oa̍h khí lâi, chit kó͘ le̍kliōng koh khah sī huisiông ê tōa éng. 　　
M̄koh, kângkhoán ū chi̍t si'á sèsè ê tamiu kám tùi hitê lâng ê simlāi sengkhí, he to̍h sī hoânló bóngtóng chông ji̍pkhì songka, ngē beh kiò sílâng oa̍h khí lâi, choa̍ttùi m̄sī chi̍t kiāⁿ bô hiōkó ê tāichì. Kású i to̍h ánne ji̍pkhì tōa hoah chi̍t hôe, nāsī sílâng oa̍h khí lâi to̍h bô sū, nāsī bô hoattō͘ oa̍h khí lâi, songka ê lâng ittēng bē pàng i soah, in ittēng ē giâmlē chíchek, kóng i sī siūⁿ beh phòhoāi songlé. 　　
M̄koh, hit kó͘ le̍kliōng si̍tchāi tiòng kah chin koân, chhiongtōng chiàusiông chin tōa. Tī sio khanliân loān kóng chi hā, i khaisí tiûtû tùn teⁿ, tī pêⁿkè chêng lōalōasô khí lâi, tùi chit pêng kiâⁿ kòe khì, koh kiâⁿ tńg lâi, sio liânsòa kiâⁿ kúinā piàn, siōng khímá ū ５ huncheng kú. Chiongkîbóe, chitê lâng hòngkhì à, kiâⁿ kòe chheⁿâng teng, khì chhoahchhoah tńgkhì kàu chhù! 　　
Ūisiáⁿmi̍h i chiongkîbóe bô kiâⁿ ji̍pkhì kiò sílâng khiā khílâi leh? Sūāu chho͘pō͘ siūⁿ tio̍h, engkai sī tongsî Sènglêng bô kohchài chísī i chìn chi̍t pō͘ ê hêngtōng, nāsī tongsî Sènglêng kohchài hō͘ i ū khókhò ê sìnsit, kiò i ióngkám kiâⁿ ji̍p khì, ánne i ittēng chi̍tsut'á to bô hoâigî, khì kiò sílâng khiā khí lâi!

I koh khah siôngsè hunsek, kámkak hit kó͘ le̍kliōng kah chhiongtōng to̍h sī Páulô tī "Kolîmto Chiânsu" só͘ kóng ê káu chióng insù ê "sìnsim", tī cha̍pjī chiuⁿ ni̍h Páulô kóng, "Sènglêng chionghián tī kok lâng sengkhu téng, sī beh hō͘ lâng tit tio̍h hóchhù. Ū lâng chià tio̍h Sènglêng niásiū tìhūi ê giângí; ū lâng mā khò tio̍h kâng chi̍tê Sènglêng niásiū tìsek ê giângí; koh ū lâng tùi kâng chi̍tê Sènglêng niásiū sìnsim; iáu ū lâng tùi kâng chi̍tê Sènglêng niásiū ipēⁿ ê insù; koh ū lâng ētàng kiâⁿ īlêng, koh ū lâng ētàng chò sianti, koh ū lâng ētàng piānpia̍t kok chióng lêng, koh ū lâng ētàng kóng honggiân, koh ū lâng ētàng hoan honggiân." Chia só͘ kóng ê "sìnsim" kah "in sìn chheng gī" só͘ kóng ê sìnsim chēchió ū kóa bôkâng, i sī Sènglêng sù hō͘ sìntô͘ ê chhiauchūjiân lêngle̍k, hō͘ sìntô͘ ū ipēⁿ, kóaⁿ kúi téngténg ê koânlêng, thongsiông chhiongtōng lóng sī kotiòng ê. Iésu tī "Mákhó Hokim" 11, 23 kóng, "Góa si̍tchāi kā lín kóng, bôlūn siáⁿlâng tùi chit chō soaⁿ kóng, 'Lí sóa khui chit só͘chāi tâu tī hái lāité! ' I nā simlāi bô giâugî, kantaⁿ sìn i só͘ kóng ê ittēng chiâⁿ, to̍h ittēng hō͘ i chiâⁿ à." to̍h sī teh chí chit chióng "sìnsim".

Chitê lâng chiū ánne bêngpe̍k Iésu sī ánchóaⁿ ētàng hō͘ sílâng kohoa̍h ê goânin. Tī “Iôhaneh Hokim” 11 chiuⁿ, tī Bēthaniah ê só͘chāi, Iésu bat kiò chi̍tê La̍hchalō͘ ê siàuliânlâng kohoa̍h. Tongsî La̍hchalō͘ íkeng síkhì sì kang, jîchhiáⁿ íkeng tâi tī hûnbōng ni̍h. Iésu lâi kàu hûnbōng chêng, kiò pôngkoan ê lâng kā hûnbōng chêng ê chio̍hthâu sóa khui, liáuāu gia̍h ba̍k ǹg thiⁿ, kóng, "Pē ah, góa kámsiā Lí, inūi Lí íkeng thiaⁿ góa. Góa mā chaiiáⁿ lí tiāⁿtiāⁿ thiaⁿ góa, m̄koh góa kóng chit kù ōe sī ūi chiuûi khiā leh ê chènglâng, kiò in sìn sī Lí chhe Góa lâi ê." Kóng chit kù ōe liáuāu, to̍h tōasiaⁿ hoah kóng, "La̍hchalō͘ chhut lâi!" Hit ê sílâng to̍h chhut lâi à, khachhiú ēng pò͘ pau leh, bīnchiūⁿ pau chhiúkin. Iésu tùi in kóng, "Tháu khui, kiò i kiâⁿ!" La̍hchalō͘ to̍h oânchoân kohoa̍h. Chhinchhiūⁿ chit chióng lêngle̍k, to̍h sī lâichū ke̍k koân ê sìnsim lêngle̍k.

Kângkhoán ê, chit chióng ētàng kiò sílâng kohoa̍h ê lêngle̍k, tī kin'áji̍t ê 20, 21 sèkí chiàusiông chûnchāi, chhutsì tī 1859 nî ê Engkok lâng Smith Wigglesworth mā ū chit ê lêngle̍k, i tiāⁿtiāⁿ ūi phòapēⁿ á sī lîm sí ê lâng chò liânsòa sèng ê kîtó, itseng tāikhài hō͘ 20 lâng tùi sí ni̍h kohoa̍h. Ū chi̍t pái i ūi chi̍tê kiòchò Mitchell ê sìntô͘ kîtó, tī Mitchell ê chhù, Mitchell ê khanchhiú íkeng chèngsi̍t kóng kakī ê angsài sí khì, Wigglesworth ê khanchhiú mā kiò i thêngchí kîtó, i to̍h sī m̄ sìn siâ, liânsòa tōasiaⁿ kîtó, liáuāu, Mitchell ū kohoa̍h, jîchhiáⁿ chū ánne oa̍h kah hósèhósè. Chiahê tāichì lóng kìchài tī "Bô thêng chengtióng ê sìnsim" chit pún chheh ni̍h（Chù 1）. Khókiàn ētàng hō͘ sílâng kohoa̍h ê lêngle̍k, tī hiāntāi mā bô khòaⁿ chò sī choa̍ttùi ê hikî!

──2023, 07, 01 tī Lo̍kkáng

Chù 1： Smith Wigglesworth tù "Bô thêng chengtióng ê sìnsim"（Tâitiong, Sūibé chhutpánsiā, 2009 nî chho͘pán）, beh bé chit pún chheh chhiáⁿ tiámkek ēkha bāngchí：https://www.rhemapublishing.com/all/allproducts1.html