《宋澤萊新著《天路拾穗》TOJ/台灣字版》

 | | | 轉寄

Chútê 19：Honggiân ínkhí sînjiah itī lio̍ktâm（ji̍tkì gō͘ chek）

作者 Sòng Te̍klâi 2026.07.12

Tējī pō͘ Sènglêng Koànak

Chútê 19：Honggiân ínkhí sînjiah itī lio̍ktâm（ji̍tkì gō͘ chek）

Saⁿ Goe̍h 23：
Chūchiông kūnî bóe, koattēng ta̍k kang chìchió kîtó 2 tiámcheng, liânsòa kîtó 3, 4 kògoe̍h liáuāu, honggiân kîtó piànsêng chi̍t tiûⁿ malásóng cháupio písài, ji̍tchí ni̍h chóng sī itti̍t kóng honggiân, ūsî si̍tchāi chin bôliâu, hō͘ góa kámkak kahná tńglâi siàuliân sî chhamsiân ê siàuliân sòegoa̍t, itti̍t chham kongàn, kā chháu pīⁿ ê chē chū’á lóng chē kah phòa khì. Chitmá chiah sī chē tī í'á téng teh kîtó, ūtangsî'á khiā khílâi kiâⁿkiâⁿ leh, í'á lóng kiông beh chē pháiⁿ khì. M̄koh to̍h sī ē chìnpō͘, sengkhu jú lâi jú ióngchòng, lênghûn jú lâi jú kongkiông, chi̍tkóa pēⁿ chiū ánne bo̍kbêngkîbiāu to̍h hó khì.

Ēkha sī Tâioân bûnha̍kka Gô͘ Kímhoat tī bīnchheh só͘ siá ê honggiân kîtó ê konghāu：

"Siusêng chin tōa. Chòekīn nn̄g pái sengkhu kiānkhong kiámcha mā chhuthiān kahná kîchek sū ê ho̍kgoân, sán 11 kongkin, chin chē sei jīnûi bô siáⁿ khólêng káipiàn ê chísò͘ lóng káipiàn à, simchōng konglêng mā chin hó à. Thn̂g jiō, saⁿ koân choânpō͘ hôeho̍k chèngsiông chi̍t nî pòaⁿ à, hō͘ iseng lia̍tchò bô͘hoān sêngkong ê ànlē; m̄koh i m̄chai góa ta̍k kang kîtó, honggiân kîkiû, līkhui chheh toh hn̄ghn̄g, ûnûn'á kiâⁿ, lêngmiā khésī…… téngténg ê tāichì, góa mā bô kā i kóng. Simchōng pānmo̍͘h thíkhui e̍h hòa ê būntê, mā tùi e̍h hòa kàu 0.65 konghun thí khui kàu O.75, kàu saⁿ kògoe̍h chêng chò kiámcha, kohchài thí khui kàu 1 konghun, kèsio̍k óng hó honghiòng chìntián!"

Saⁿ Goe̍h 24：
Chinchiàⁿ chin hóchhiò, kahná ittēng tio̍h piànsêng bûnkekhíbú ê Chó͘ Te̍k, , khîn liān honggiân.

Chêngji̍t（22 ji̍t）àmsî Khó͘ kàusiū khà tiānōe hō͘ góa, kóng i tòe iáⁿphìⁿ ni̍h ê sióchiá o̍h honggiân, íkeng ēhiáu kóng kúiê sû à. Liáuāu góa kiò i kā "Halélú'iah" liām kín koh tōasiaⁿ, i sûisî to̍h kóng chhut 10 kúi huncheng kú ê sio liânsòa chi̍h im honggiân, chinchiàⁿ līhāi! Khó͘ kàusiū kohchài kúi kang beh khì chhiúsu̍t, SiōngChú hō͘ i ánne chi̍tê chiokhok.

Saⁿ Goe̍h 24
Ētàng kóng honggiân mā bô lō͘ēng, chi̍t kang chíū kóng kúi huncheng kinpún chísī teh anùi kakī! Sèkài siōng sìkè lóng ū lâng ēhiáu kóng honggiân, ētàng siu tio̍h hāukó ê lâng khiok chin chió chin chió! Ittēng tio̍h ū kèōe sèng ta̍k kang lóng chò 1~2 tiámcheng ê honggiân kîtó, liânsòa 1 kàu 3 kògoe̍h, chit chióng to̍h ē sánseng tōa ê hāukó! Honggiân kîtó ê sî to̍h sī kah Sènglêng chòhóe, chi̍t tiámcheng chi̍t tiámcheng lúichek, chekchū lêngliōng, siōng bóe sìnsim to̍h ē thêko kàu chi̍tê koântō͘（chù: che sī koankiàn tiám）, kiâⁿchhut kîsū, só͘í tongjiân sī kîtó sîkan chē ê lâng khah ū iâⁿbīn! Chit tiám kèngjiân chin chió lâng chaiiáⁿ.

Saⁿ Goe̍h 25
Kin'áji̍t thàuchá khíchhn̂g, tī 7 tiám ê sî sáichhia kàu Lo̍kkáng Bûnkàu Tiongsim āubīn khàngtē ê pō͘tō, kā chhia thêng lo̍h lâi, chhiū ńg sôe lo̍h lâi, cha̍h tòng ji̍tthâu kng, ū chin chē chá khíchhn̂g ê lâng tī chit tài sànpō͘. Chìnchêng chia sī chi̍t phiàn bōng'ápo͘, chòekīn khaipi̍t chiâⁿchò chi̍t phiàn chin tōa ê konghn̂g, kó͘kè bô gōa kú tiāⁿtio̍h láu'á chhù itti̍t khí, chi̍t phiàn hoânêng. Oa̍h leh ê āutāi kah kòeóng ê chó͘sian siocheⁿ thó͘tē, kàu siōng bóe chóng sī oa̍h leh ê āutāi sènglī, che kahná to̍h sī thihlu̍t!

Chē tī chhiani̍h, khaisí honggiân kîtó chi̍t tiámcheng. Chìnchêng tûhui pitiàu tn̂gtô͘ sái chhia, bô siáⁿ káⁿ kútn̂g chē tī chhia lāi, inūi kē é ê phôe í'á ē appek tio̍h ēpak, koh khah appek tio̍h chéng tōa ê liaphō͘sòaⁿ, kàu siōng bóe chóng sī thiàⁿ. Chitmá m̄ kiaⁿ ā, inūi nn̄g kògoe̍h thâuchêng ê honggiân kîtó ū tòa lâi tōa sìnsim（chù：che sī koankiàn tiám）, kèngjiân kakī hōaⁿchhiú tī chéng tōa ê liaphō͘sòaⁿ téngbīn 5 huncheng, hitê chéng tōa ê liaphō͘sòaⁿ kahná làukhùi ê phôe kiû, tòa sèsè ê kuhkuh siaⁿ, itti̍t siau lo̍h khì, liáuāu bô koh chéng tōa, mā bô koh thiàⁿ, chitmá chōnghóng chiàusiông chin hó, íkeng káⁿ sok ân iotòa 2 kògoe̍h, góa jīnûi chá to̍h tit tio̍h i hó à. Ēkìtit tongsî ê kîtó sû sī ánne, "Hōng Iésu ê miâ, góa kiônglia̍t iaukiû ū bô phòapēⁿ ê khoânlī, mā kiônglia̍t kéngkò tîⁿ tiâu tī liaphō͘sòaⁿ ê siâlêng kah pēⁿmô͘ līkhui góa ê sengkhu ! Nā sī m̄ līkhui, siósim tēga̍k ê iāmhóe teh beh sio tio̍h lín! Chhutkhì! Chhutkhì! chhutkhì!" Siōng bóe hit saⁿ siaⁿ "chhutkhì!" hoah kah te̍kpia̍t tōasiaⁿ, kahná pòsiû thâi te̍kjîn, ū chi̍t tiám'á siáukông, khiok chin thiòng; khókiàn chitê tn̂gkî chûnchāi ê kacho̍k kútn̂g pēⁿ gōani̍h'á hō͘ lâng thònghūn!

Saⁿ Goe̍h 26
Ēpo͘ 3 tiám khì hônghun chhītiûⁿ bé chhài, kīlî chú àmtǹg iáu ū chi̍t tōaⁿ sîkan, oat kàu tìn li̍p ūntōngtiûⁿ, chúnpī koh chò pòaⁿ tiámcheng ê honggiân kîtó. Peh khílí saⁿchàn lâu koân ê tōa koh khoah bóngbóng ê koanchiòng khòaⁿ tâi’á téng, sìkho͘ûi bô lâng. Tī chitê koânkoân ê tâi’á téng, ētàng hn̄ghn̄g khòaⁿ tio̍h se̍h tī gánchiân liânchiap tio̍h thiⁿpiⁿ sìkè khí ê koân lâu tāihā, mā ētàng àⁿthâu khòaⁿ pauûi ūntōngtiûⁿ ê tōaphìⁿ sin chèng ê le̍k chhiū'á, hutjiân chi̍tsî kámkak sóng sîn.

Tī khòaⁿtâi ê chi̍tê kaklo̍h, phahkhui chhiúki ê iáⁿphìⁿ, khaisí kah iáⁿphìⁿ ni̍h ê sióchiá písài honggiân kîtó, kámkak suijiân bô hoattō͘ iâⁿkòe i, khiok mā bē tìsú su chin chē. Lō͘bóe kîtó to̍h piànsêng chūtōng hòa, thêng bē lo̍h lâi, kèngjiân chhiaukòe sîkan, tahtah kîtó chi̍t tiám gōa cheng.
── 2023, 03, 07 tah tī "Kitokkàu Thongsìn"