《宋澤萊新著《天路拾穗》TOJ/台灣字版》

 | | | 轉寄

Chútê 25：SiōngChú kám ū koán chóngthóng ê kēngsoán?

作者 Sòng Te̍klâi 2026.08.23

Chútê 25：SiōngChú kám ū koán chóngthóng ê kēngsoán?

2004 nîchhe ê chóngthóng soánkí huisiông chengchhái, Tân Chúipíⁿ kah Liân Chiàn tiánkhui khongchiân keklia̍t ê kēngcheng.

M̄chai sī ánchóaⁿ, góa hiônghiông kiankoat jīnûi suiàu siá kóa kēngsoán ê chéngkô kòetêng kìlo̍k.

Góa tùi tâuphiò ji̍t ê chêng kúi kògoe̍h khaisí siá khí, ta̍k kang chùsîn bānglō͘ ê êngbō͘ khòaⁿ, kā ta̍kê pòchóa píkàu khah tiōngiàu ê pòtō, it'it tiahlio̍k lo̍h lâi, kasiōng kakī ê phênglūn, ànchiàu ji̍tkî, chi̍t kang sòachiap chi̍t kang lâi susiá. Chitthò chheh ū sì chheh, chhaputto lóng tī kēngsoán kîkan（siōng bóe chi̍t pún chheh sī khui phiò kiatsok liáuāu）, iû Chiânōe chhutpánsiā chhutpán, chhehmiâ to̍h kiòchò "Siáⁿlâng ētàng tòngsóan chóngthóng? ", kó͘kè choânpō͘ jī sò͘ tī 60 bān jī chóiū.

M̄koh, chiahê m̄sī góa tī chit phiⁿ bûnchiuⁿ ni̍h beh tâm ê. Góa beh kóng ê sī, tī kēngsoán kîkan SiōngChú hō͘ góa ê chi̍tê ībāng.

Tī chéngkô kēngsoán kòetêng ê kìlo̍k tiong, tú khaisí, góa píkàu khah ētàng póchhî tiongli̍p khehkoan, mā tī chheh ni̍h hiòng tho̍kchiá thánpe̍k kóng, góa ǹgbāng m̄thang kòethâu siū kòjîn chèngtī ìsek hêngthài ê énghióng, chīnliōng mài ū chêngsū ê lūnsu̍t.

M̄koh, tòe leh kēngsoán ê keklia̍t hòa, góa jú lâi jú bô khehkoan, kinpún bô hoattō͘ páchhî kakī. Góa sī tôngchêng Tân Chúipíⁿ ê, inūi tùi chi̍t khaisí, i ê bîntiāu to̍h giâmtiōng lo̍kngó͘ Liân Chiàn chin chē（chhaputto sī lo̍kngó͘ 20% chóiū）. Tongsî, Liân Chiàn ê tàuthâu sī Sòng Chhó͘jû, in chhiaukòe 50% ê koân chichhî tòaniá, soatbêng Tân Chúipíⁿ ittēng lo̍ksoán!

Tân Chúipíⁿ ê bîntiāu chichhî tòaniá chóng sī lo̍kngó͘, chhiau chêng ê chōnghóng bô chē. Tòngchò chi̍tê chiahni̍h iùlō͘ ê le̍ksú lîmtiûⁿ kìlo̍k chiá, góa chin oh chūngó͘ khiphiàn, suijiân soán chêng jú lâi jú káisiān, m̄koh khióngkiaⁿ Apíⁿ lo̍ksoán sī biánputliáu ê!

Kúinā kògoe̍h, chin chē lâng cháu lâi mn̄g góa soánchêng, ài góa chhaichhek siáⁿlâng iâⁿ siáⁿlâng su, góa tōatosò͘ kóng bē chhut chhùi, inūi bô siūⁿ beh hō͘ chichhî Tân Chúipíⁿ ê lâng sitbōng, m̄koh góa kā in kóng, Liân Chiàn ê iâⁿbīn kahná píkàu khah tōa.

M̄koh, chiū tī chòeāu ê chi̍t kògoe̍h, góa chò chi̍tê ībāng, káipiàn góa ê koantiám. Tongsî, Tân Jînchong bo̍ksu, Ông Sèhun gīoân kah Sêngtek huhū, múi nn̄g lépài to̍h kàu goán tau lâi chūhōe, teh tâm kàu SiōngChú ê sî, lânbián chhamcha̍p tio̍h keklia̍t ê chóngthóng soánkí chitê ōetê, sīmchì píchhú mn̄g, "kiùkèng siáⁿlâng ē tòngsóan? Tân Chúipíⁿ kám ē iâⁿ?" Góa siūⁿ ībāng chiū ánne chūjiân hoatseng.

Tī hitê bāng tiong, góa seng khòaⁿ tio̍h chi̍tê chhàikó͘, kahná goán itpoaⁿ lôngka chhù thâuchêng ê hit chióng sió chhàikó͘, téngbīn kahná ū chheⁿ chhang, le̍k chhài, tī chhài kó͘ téngbīn khiā chi̍t lia̍t chéngchê ê sió chhâ phìⁿ, kahná tú boah thangkng ê iûchhat ê khoán, tī hia hoatkng. Chit chióng hoatkng ê sió chhâ phìⁿ, góa iā bat tī chìnchêng ê ībāng tiong khòaⁿkòe, chit sî koh chhuthiān, hō͘ góa kámkak huisiông kiaⁿhiâⁿ. Góa chùbo̍k khòaⁿ chhâ phìⁿ, to̍h khòaⁿ tio̍h tiongkan chi̍tê chhâ phìⁿ siá, 1％. Góa khòaⁿ chi̍t sî'á, to̍h chhéⁿ khí lâi.

Góa ti̍tkak kámkak, ībāng kā góa kóng, Tân Chúipíⁿ ē iâⁿ 1％. Che sī Sènglêng kah góa chi kan ê hō͘siong líkái, chitê hō͘siong líkái be̍kkhè kantaⁿ ū góa kah Sènglêng píchhú ētàng liáukái.

Bô gōa kú, chokka hó pêngiú Khng Goân to̍h khà tiānōe lâi, i kóng Chiong SuTāi ê chi̍tkóa kàusiū chin chē lâng lóng chin koansim soánchiàn, siūⁿ beh chaiiáⁿ soánkí ē ū ê kiatkó, i kóng, "Lí tng teh choānsiá ‘Siáⁿlâng ētàng tòngsóan chóngthóng?’ ", í lí ê kiànkái, siáⁿlâng ē tòngsóan?" Chit sî, góa bô koh chhìnchhái kóngkóng leh, góa khéngtēng kóng, "Apíⁿ ē iâⁿ 1％!" liáuāu, Khng Goân khì kā góa ê ōe thoân khui, tôngsî góa mā kā Tân Jînchong bo̍ksu, Ông Sèhun gīoân, Sêngtek huhū kóng kângkhoán ê ōe, góa sīmchì kā Apíⁿ ē iâⁿ 1％ ê īchhek, siá tī "Siáⁿlâng ētàng tòngsóan chóngthóng?" ê siōng bóe chi̍t chheh téngbīn!

Khui phiò ê kiatkó, Apíⁿ í 0.228 ê chengchha phahpāi Liân Chiàn! Chin chē lâng lóng kóng, kású kā hùi phiò lóng kèsǹg chāilāi, Apíⁿ tekkhak sī iâⁿ 1％!

SiōngChú kám bô koansim lán ê soánkí? Tùi chit hāng tāichì khòaⁿ khí lâi, SiōngChú iáu sī ū teh koansim. SiōngChú kám bô hoattō͘ īsian chaiiáⁿ soán chêng? Tùi chit hāng tāichì khòaⁿ khí lâi, SiōngChú iáu sī ētàng īti.

Kìjiân SiōngChú ētàng īsian chaiiáⁿ, to̍h piáusī lán sèkan ê bānsū, íkeng pī pho͘pâi hósè, itchhè lóng chiàu kio̍kpún teh iánchhut. Kìjiân itchhè lóng chiàu kio̍kpún teh iánchhut, pōeāu ittēng ū chi̍tê siá kio̍kpún ê lâng, chitê lâng sī siáⁿlâng? Tongjiân sī SiōngChú!

SiōngChú pho͘pâi hósè lí kah góa íki̍p Tâioân lâng, to̍h sī só͘ū ê lâng ê chionglâi, lán lóng chiàu kio̍kpún teh iánchhut. M̄koh, góa siūⁿ kìjiân SiōngChú ētàng siá kio̍kpún, I iā ētàng kengkái kio̍kpún.

Sī ánchóaⁿ ē ánne? Che sī inūi SiōngChú to̍h sī SiōngChú! Inūi ánne koh khah ánchóaⁿ to bô pí kîtó koh khah tiōngiàu ê tāichì! Lí kám ū liáukái góa ê ìsù?

Góa ē hôe iáu ē kóng tio̍h chi̍t kiāⁿ koh khah sînkî ê tāichì!

──2010, 07, 03 tah tī "Kitokkàu Thongsìn"