《宋澤萊新著《天路拾穗》TOJ/台灣字版》

 | | | 轉寄

Chútê 26：SiōngChú kám ū teh koán chóngthóng chi̍tke lâng ê tāichì?

作者 Sòng Te̍klâi 2026.08.30

Chútê 26：SiōngChú kám ū teh koán chóngthóng chi̍tke lâng ê tāichì?

Sènglêng tòa lâi ê ībāng sī putkhósugī ê. Tī só͘ū góa ê ībāng tiong, chit pái iū koh sī putkhósugī tiong ê chi̍t pái.

Ībāng hoatseng tī 2004 nîté li̍phoat úioân soánkí ê sî. Tongsî, Ông Sèhun hiaⁿ, Tân Jînchong bo̍ksu kah Sêngtek huhū iûgoân tiāⁿtiāⁿ lâi goán tau chūhōe. M̄koh, inūi Sèhun hiaⁿ chhamsoán Tâitiong ê li̍púi soánkí, hō͘ goán ê chūhōe koh khah siôngsiông kóng tio̍h chèngtī būntê, góa siūⁿ ībāng to̍h sī ánne hoatseng.

Góa bāngkìⁿ chóngthóng hujîn Gô͘ Sioktin ê bōng'ápo͘. Bāng tiong, góa bô khòaⁿ tio̍h tāitē á sī thiⁿ ni̍h ê pōekéng, kantaⁿ khòaⁿ tio̍h chi̍t chō bílē ê gîn chè bōng'ápo͘.

Hitê bōng'ápo͘ sī thoânthóng ê Tâioân bōng'ápo͘, m̄sī chin khoah ê kū ka hôcho̍k kóngtōa ê bōng'ápo͘, chísī tionghêng ê; suijiân kóng sī tionghêng ê, m̄koh sèkan koh khah ánchóaⁿ to bô hiahni̍h bílē ê bōng'ápo͘ à.

Góa kahná sī tī lio̍h'á koân ê khongtiong khòaⁿ lo̍h khì. Kuiê bōng'ápo͘ chhaputto ū chi̍tê lâng ê koântō͘, tûliáu khah koân ê chú bōngpâi ígōa, nn̄g pêng iáu ū sió hō͘lēng, iáu ū bē sè ê bōngtiâⁿ.

Góa khòaⁿ bē tio̍h bōng téngbīn ū chheⁿchháu á sī hoeba̍k chi lūi ê mi̍hkiāⁿ, kuiê bōng'ápo͘ huisiông hôkùi, tiausek lênglông, choânpō͘ lóng sī pe̍hgîn phahchò, gîn kng siámsih. Tī siongtong kng iàⁿiàⁿ ê ji̍tthâu kng（kiámchhái m̄sī ji̍tthâu kng）ēkha, hiáⁿba̍k konghui.

Góa khòaⁿ tio̍h chi̍tê lâng ê khachiahphiaⁿ, m̄koh khòaⁿ bē chhut i sī siáⁿlâng, kahná sī piàⁿsàu bōngtiâⁿ ê lâng, i chin kín to̍h kiâⁿ līkhui bōngtiâⁿ. Chit sî, bōng'ápo͘ kah bōngtiâⁿ lóng chhengkhì tangtang, bôsoabôsap, thang khòaⁿ tio̍h chéngchê ê pe̍hgîn khek hoe tng teh siámsiám hoatkng. Góa kahná khòaⁿliáu chin kú.

Siōng bóe, góa óng chú bōngpi téngbīn khòaⁿ khì, to̍h khòaⁿkìⁿ "Gô͘ Sioktin" chit saⁿê jī. Góa chhoah chi̍t tiô, simlāi siūⁿ kóng, "Aih, ánchóaⁿ ē ánne! Bô thiaⁿ kóng Gô͘ Sioktin íkeng kòesin a." to̍h chhéⁿ khí lâi!

Chitê bāng tòa lâi góa ê hūtam, inūi góa bô gōa líkái Sènglêng sī m̄sī ū àmsī góa suiàu kā chitê kéngkò thoânta̍t chhut khì.

Tī katêng chūhōe ê sî, góa to̍h thê chhutlâi kah tāike chhamsiông. Góa to̍h kóng, che m̄sī chi̍tê hó bāng, SiōngChú tng teh khiánchek chóngthóng hujîn à. Hit chō bōng'ápo͘ tú teh piáusī, chóngthóng hujîn chísī chi̍t chō bílē ê bōng'ápo͘, piáubīn hôkùi, m̄koh lōechāi íkeng chhinchhiūⁿ àu chhâ à. Góa koh khah giâmtiōng kóng, “I sī kimgîn ê gōapiáu, m̄koh lāitiong íkeng pāihoāi ā!”

Chit sî Sêngtek hiaⁿ ūi tio̍h kā góa antah, thêchhut lēnggōa chi̍tê káisoeh, i jīnûi che sī chi̍tê hó bāng, inūi “gîn” chitê mi̍hkiāⁿ tī Kitokkàu lâi kóng ūsî sī teh chí hó ê tāichì, pílūn kóng “gînsek ê Sèngtàn” to̍h sī hó ê, engkai sī hó siausit.

M̄koh, Sêngtek hiaⁿ ê kóngsû bô hoattō͘ hō͘ góa siongsìn, inūi kású sī hósū, ittēng ē hiánsī gîn chè ê póchō á sī gînsek ê biánliû chi lūi ê mi̍hkiāⁿ, bô khólêng sī bōng'ápo͘.

Tongsî, Apíⁿ tú liânjīm pòaⁿ nî, chèngchek jú lâi jú hó, chò chitê bāng sī chin kîkoài ê. M̄koh, pòchóa itchài pōlō͘ Gô͘ Sioktin kah'ì sńg kó͘phiò, sīmchì kah chi̍t phoe koaⁿ hujîn khì piàⁿmiā bé mi̍hkiāⁿ ê tāichì, to̍h hō͘ góa kámkak iáu ū pí chitê koh khah giâmtiōng ê tāichì teh beh hoatseng. Góa jīnûi, Gô͘ Sioktin ê chi̍tkóa hêngûi sī bô tìhūi ê, m̄sī sinûi chóngthóng hujîn engkai chò ê, SiōngChú ittēng íkeng teh khiánchek i à.

Kengkòe kúinā pái chhamsiông, goán koattēng siōng hó ētàng kā sìnsit thoân kàu chóngthóng hia. He kiùkèng kai ánchóaⁿ chò leh?

Tē it ê siūⁿ tio̍h ê tongjiân sī chóngthóng sinpiⁿ ê kokchhek kò͘būn, koh sī Kitoktô, kantaⁿin píkàu khah ū kihōe khǹg chóngthóng, mā chaiiáⁿ ībāng sī siáⁿmi̍h.

Kengkòe chi̍t hoan ê sûnmn̄g, góa chiongkîbóe khà tiānōe hō͘ góa bô se̍ksāi ê Ko ChùnBêng bo̍ksu. Ēkìtit lâi thiaⁿ tiānōe ê lâng sī Ko ChùnBêng ê hujîn. Góa kā i kóng, góa sī Kitoktô, chò chi̍tê ībāng, iúkoan Gô͘ Sioktin ê. Góa siôngsè kā i kóng chitê ībāng ê lōeiông, liáuāu chhiáⁿ Ko bo̍ksu hiòng chóngthóng choánta̍t, hoānnā Gô͘ Sioktin ê kó͘phiò lóng engkai bē tiāu, chiū ánne m̄thang kohchài bak tio̍h jīmhô iúkoan kimchîⁿ ê tāichì, jīmhô khansia̍p tio̍h kimchîⁿ ê hêngûi siōng hó lóng chiongchí, jîchhiáⁿ siōng hó lâi sìn Kitokkàu, inūi SiōngChú tng teh khiánchek i. Ko bo̍ksu hujîn thiaⁿliáu, tîmgîm chi̍t chūn’á, piáusī ûilân, i kóng chit hāng tāichì chin bô hó kóng, m̄koh i ē choánta̍t hō͘ Ko bo̍ksu chaiiáⁿ.

Tongsî, tùi Ko bo̍ksu hujîn ê kháukhì tiong, góa ti̍tkak kámkak, Ko bo̍ksu thoânta̍t chitê sìnsit ê khólêng sèng bô tōa. Góa sûisî koh chhōe hó pêngiú chokka Lí Kiâu siansiⁿ, i mā sī Kitoktô, tôngsî mā sī kokchhek kò͘būn tiong ê chi̍tê.

Lí Kiâu siansiⁿ ê thāitō͘ píkàu khah chekke̍k, i sûisî kah chi̍tkóa kàuiú kóngkhí chit hāng tāichì. I kóng tī Kitoktô tiong, ū chin chē lâng lóng teh hoânló chit hāng tāichì, khólêng ū chit chióng ībāng ê lâng mā bē kantaⁿ ū góa chi̍tê, tekkhak sī chin chē lâng íkeng hoatchhut kéngsìn à. M̄koh i kóng, i chísī chi̍tê kokchhek kò͘būn, iúkoan chóngthóng ê kabū sū, i bô khaktēng kám ētàng tngbīn kah chóngthóng tâm, i mā piáusī ûilân.

Tùi i ê kóngōe lāité, góa mā kámkak chin oh thàukòe i lâi thoânta̍t chit hāng tāichì. Siōng bóe ê ǹgbāng sī Sèhun hiaⁿ, ǹgbāng i ū kihōe hiòng Apíⁿ tâm chit hāng tāichì. Āu lâi, tī keklia̍t ê kēngsoán tiong, A’Píⁿ chóngthóng lâi thàmbōng Sèhun hiaⁿ ê soánchêng, Sèhun hiaⁿ hō͘ Apíⁿ chi̍t pún "sèngkeng", m̄koh mā bô hoattō͘ thoânta̍t chit kiāⁿ iúkoan Gô͘ Sioktin ê tāichì. Chitê sìnsit ê thoânta̍t siōng bóe í chún soah khì á lâi siutiûⁿ.

2006 nîté, Ângsaⁿ kun chi hō po̍khoat, Apíⁿ siū tio̍h giâmtiōng ê kongkek; jīmkî kiatsok liáuāu, kimchîⁿ ê tāichì oânchoân hiānkng, Píⁿ ka siaⁿbōng poa̍hlo̍h chhimkheⁿ, kuiê chóngthóng kacho̍k chhaputto lóng tio̍h phòchhùi à, Le̍k iâⁿ chhaputto hāmlo̍h kàu tēga̍k ê pianiân!

Tùi chit ê ībāng, goán to̍h chaiiáⁿ, SiōngChú kám chaiiáⁿ chóngthóng kah chóngthóng chi̍tke lâng ê tāichì? Tapàn sī, oânchoân chaiiáⁿ! Jîchhiáⁿ chaiiáⁿ kah chin thiatté! SiōngChú kám ē koán chóngthóng kah chóngthóng chi̍tke lâng ê tāichì? Tapàn sī, ē koán! Jîchhiáⁿ sī koán kah chin ân!

M̄koh, ūisiáⁿmi̍h SiōngChú hòngchhiòng chit khoán tāichìê hoatseng? Ūisiáⁿmi̍h m̄ chhinsin chèchí Gô͘ Sioktin ê hêngûi? Che sī inūi i m̄sī Kitoktô, chèchí i mā bô ittēng ē thiaⁿ. Tôngsî, SiōngChú híkhó chi̍tkóa lâng ê hoānchōe ū I amkhàm ê bo̍ktek, chitê bo̍ktek sī chiāmsî amkhàm, m̄koh chóng ū chi̍t kang ē oânchoân hiánbêng!

Góa tiāⁿtiāⁿ himsiān chi̍tkóa ētàng kah SiōngChú tngbīn kóngōe ê lâng, in ētàng ēng thiaⁿkak tiāⁿtiāⁿ thiaⁿ tio̍h SiōngChú chísī ê ōegí, chiongkîbóe piànsêng Kitokkàu ê sianti. Góa to̍h bētàng, kantaⁿ ētàng ngó͘jiân ū chi̍tê ībāng, jîchhiáⁿ kā i tinsioh, kámkak bôpí ê kiaⁿgî.

Góa chitmá iáu sī kengsiông hoâigî "Kūiok" lāité hit kóa thoânta̍t SiōngChú chí'ì hō͘ Isulael chu ông ê sianti, ná chhinchhiūⁿ Elíiah hit kóa lâng, kámkak in sī hikò͘ ê jînbu̍t, inūi in thài sînpì, kèngjiân ētàng khò tio̍h SiōngChú ê chísī, tiāⁿtiāⁿ khòaⁿphòa chu ông iapthiap ê tāichì, jîchhiáⁿ thêchhut kéngkò. Góa kámkak hit kóa kiámchhái sī "Kūiok" chokchiá só͘ pianchō ê kò͘sū, chísī chi̍t khoán hiōti chibêng ê o͘pe̍h susiá jîí.

M̄koh, tùichiàu góa îit ê chi̍t nn̄g ê ībāng lâi khòaⁿ, koh bô gōa káⁿ khaktēng kóng "Kūiok" sianti ê púnléng sī hikò͘ ê! ──2010, 07, 10 tah tī "Kitokkàu Thongsìn"

Hùlo̍k：〈2023, 07, 20 Ông Sèhun li̍púi tī bīnchheh tùi chit hāng tāichì só͘ siá ê hôeek 〉：

Kin'áji̍t chákhí tī Ichikhaoah(いちかわ) chhiathâu ê lâuthui keng siá kóa koanhē Tâioân bûnha̍kka Sòng Te̍klâi lāusu ê īgiân kò͘sū, inūi tongsî paktó͘ bô gōa sóngkhoài, siá ê lōeiông m̄sī chin lísióng, ū kúi hun kóaⁿkang ê kámkak, m̄koh inūi tio̍h chhúlí paktó͘ bô sóngkhoài ê kámkak, chiū chhìnchhìnchháichhái siá.

Tńglâi chabó͘ kiáⁿ Suoada (すわだ/Suwada) ê chhù ni̍h, khùn chi̍t khùn khí lâi, hutjiân siūⁿ tio̍h 2004 nîté, Sòng Te̍klâi lāusu kā góa kóng tio̍h i bāngkìⁿ a’Píⁿ chóngthóng ê hujîn ê chi̍tê ībāng（Kitoktô khòaⁿ tio̍h SiōngChú kóngōe ê kéngsiōng）, to̍h kámkak chínhùn（tōa tio̍hkiaⁿ kah sînkeng putan ê kámkak）bô thêng!

2004 nîkan, a’Píⁿ chóngthóng íkeng sūnlī liânjīm, góa mā inūi a’Píⁿ chóngthóng tōala̍t chō͘sóan koh tńglâi Li̍phoat’īⁿ. Kēngsoán kîkan, Sòng Te̍klâi lāusu kā góa kóng, i khòaⁿ tio̍h SiōngChú ê ībāng, sī chóngthóng hujîn Gô͘ Sioktin, ē inūi kimchîⁿ ê būntê, chio lâi chailān（ībāng lāibīn sī chi̍tê tōa gînchù ū khek hujîn sèⁿmiâ ê siámsiám hoatkng ê bōng'ápo͘, chhinchhiūⁿ "sèngkeng" lāibīn kóng ê, Kitoktô kakī ētàng sûisî chin chhengchhó káitho̍k ībāng ê ìhâm （SiōngChú tī ībāng lāité únchông ê chí'ì）!

Sòng Te̍klâi lāusu inūi ánne thàukòe kokchióng kokiūⁿ ê koántō, hibāng ētàng chó͘chí chit tiûⁿ chóngthóng hujîn koanhē chîⁿchâi ê chailān hoatseng, m̄koh sa bô liâu'á mn̂g, siōng bóe góa chíhó biánkióng kā a’Píⁿ chóngthóng thoânta̍t "hóekái sìn Chú phiah chai" ê sìnsit, khólêng sī inūi góa thunthunthò͘thò͘ kóng bē chhengchhó, a’Píⁿ chóngthóng kah hujîn, pēng bô inūi ánne ū siūsé kui Chú lâi bián chaieh ê iáⁿchiah!

Saⁿ nî gōa íāu, gînsek hongpō táⁿkek liáu íkeng siàjīm ê a’Píⁿ chóngthóng kah hujîn chi̍tke lâng, Bînchìn tóng mā hām lo̍hkhì kàu taⁿ bô lâng ū ê hongpō tiong, nāsī bô Chhòa EngBûn ê chhuthiān, Bînchìn tóng khólêng to̍h ē inūi ánne kiâⁿ ji̍p le̍ksú ê hóehu tiong!