《宋澤萊新著《天路拾穗》TOJ/台灣字版》 |
 |
 |
|
 轉寄 |
Chútê 28： Chongphài chúgī lâigoân ê sînsèng khésī
作者 Sòng Te̍klâi 2026.09.13
Chútê 28： Chongphài chúgī lâigoân ê sînsèng khésī
Chi̍tba̍knih’á kú, chhengêng ê Tâioân kòenî teh beh kòe khì, góa beh chiokhok bôlūn chhutgōa chhitthô á sī khiāke hiohkhùn ê bīniú, tī sin lâi ê chit nî sūsū jû’ì, hílo̍k pêngan!
Nîcheh kîkan, góa kîsi̍t ū chhutgōa khah hn̄g ê só͘chāi, siōng hn̄g khì kàu Tangkáng béthâu, Hêngchhun kó͘siâⁿ kah Bilong lôngchhoan. Te̍kpia̍t sī tī kôaⁿthiⁿ khiok chhinchhiūⁿ joa̍hthiⁿ ê Bilong, tiánhiān ê ânghoe koh khah âng, chheⁿhio̍h koh khah chheⁿ ê kéngsek, si̍tchāi sī chi̍t phiàn hó soaⁿ hó chúi, kahná jînkan ê sian kéng.
M̄koh iúkoan oániû, pēng m̄sī góa tī chia siūⁿ beh tâm ê, siūⁿ beh kóng ê tiantò sī tńglâi liáuāu ê chhe sì àmsî tī chhù ni̍h só͘ chò ê chi̍tê ībāng.
Kúi kògoe̍h ílâi, ū saⁿ, sì pái chò chi̍tê kângkhoán ê bāng. He to̍h sī góa tiāⁿtiāⁿ khì só͘ tòa ê koānchhī kah gōa koānchhī ê kaukài só͘chāi se̍hiû, hia ū chi̍tê bô koân khiok huisiông khoah ê chúichhiâng, kòe chúichhiâng, téngbīn to̍h sī gōa koānchhī, chúichhiâng ēbīn to̍h sī pún koānchhī.
Kîkoài ê sī, suijiân chúichhiâng hoānûi kóngkhoah, chúisè khiok chin sè káng, chúichhiâng chhiong lo̍h lâi liáuāu, tī pún koān hêngsêng chi̍t tiâu nńgchiáⁿ ê hôliû, khe chio̍h pōlō͘, hô chhn̂g tako͘, jîchhiáⁿ hunchhe chiâⁿchò chin chē ê sió chúiliû. Tùi pún koān ê chōnghóng khòaⁿ khí lâi, gōa koānchhī ê chúithâu hôtōaⁿ ittēng mā sī sè káng bô la̍t, chúiliû tasiap.
Sī ánchóaⁿ chóng sī tiônghok bāngkìⁿ chitê bāng, góa pēng bô chin chhengchhó.
Chhe sì mê, kohchài bāngkìⁿ lâi kàu koānchhī kaukài ê chúichhiâng; m̄koh, tī bînbāng tiong, huisiông ìgōa, góa kèngjiân ētàng khiā tī khongtiong, khiā koân hiòng ēkha khòaⁿ khì, hit pâi chúichhiâng íkeng bô khòaⁿkìⁿ, m̄koh khòaⁿ tio̍h chi̍t phiàn chin tōa phiàn ê chúi, khàm tiâu nn̄gê koānchhī ê piankài khu kah gánle̍k só͘ ētàng khòaⁿ tio̍h ê ke̍k chīn ê só͘chāi, íkeng bô hoattō͘ piānsek nn̄gê koānchhī ê kaukài á sī lio̍ktē ā, khòaⁿ khí lâi nn̄gê koānchhī lóng tângchê tîmté tī tōatōatōa ê tōachúi ni̍h, koh khah ánchóaⁿ to hun bē chheng chia á sī hia, kántan lâi kóng, sòaⁿ kah bīn lóng siausit, kantaⁿ ū chi̍t phiàn bûkiôngbûchīn ê tōachúi!
Ánne ê kéngsek tī bînbāng tiong tiônghok saⁿ pái. Chhéⁿ khí lâi, chin kín to̍h chaiiáⁿ che sī chi̍tê ībāng, inūi ībāng óngóng ē tiônghok, jîchhiáⁿ chêngkéng tōapō͘hūn sī kângkhoán, hôhòng bāng tiong kéngsek oa̍hthiàu, hō͘ lâng chìnhām! Jîchhiáⁿ sûisî chaiiáⁿ, che sī Sènglêng hôetap góa chòekīn kúi kògoe̍h ílâi só͘ mn̄g ê būntê, he to̍h sī, "sī ánchóaⁿ tī sìngióng siōng ū chongphài chúgī, á tó chi̍tê chongphài chiah sī siōng iusiù ê?"
Chitê bāng bênghián kā góa kóng, chongphài chúgī lâichū Sènglêng hō͘ in Kitok kanta iúhān ê Sènglêng ê la̍t（í sió chúiliû, nńgchiáⁿ chúichhiâng chò siōngteng）. Inūi Sènglêng siúⁿsù hō͘ lâng ê lêngsèng iúhān, kahná iúhān ê chúi bô hoattō͘ khàm choânpō͘ ê lio̍ktē, kantaⁿ ētàng piànsêng chiliû, kohchài iû tōa chiliû hunchhut chin chē sió chiliû, chiū ánne hunchongli̍pphài, piànpò͘ tēbīn. M̄koh, kású ū lâng ētàng tit tio̍h só͘ū tōatōatōa ê Sènglêng ê la̍t（í tōachúi chò siōngteng）, ánne to̍h ētàng khàm choân tē, sīmchì liân saⁿ tōa iûⁿ gō͘ tōa chiu lóng koh khah ánchóaⁿ to kìⁿ bē tio̍h, ánne to̍h bûsó͘ūi ê chiliû à.
Tongjiân, góa mā bêngpe̍k Sènglêng ê ìsù pēng m̄sī oânchoân hó͘ⁿtēng chongphài chúgī, inūi sūsi̍tsiōng, jīmhô chongphài ētàng chhîiú choânpō͘ só͘ sù ê Sènglêng, inūi ánne in kantaⁿ ētàng í iúhān ê só͘ sù khì chò iúhān ê tāichì, che to̍h sī chongphài chúgī bûnāihô ittēng ē chûnchāi ê goânin. Tùi bāng tiong chhéⁿ khí lâi, chiū ánne khailóng khí lâi à, kámkak hit phiàn tōatōatōa ê tōachúi sī huisiông se̍ksāi ê, ētàng kámkak tio̍h hit phiàn tōachúi to̍h sī só͘chāi, to̍h sī Iésu, to̍h sī Sènglêng, sī saⁿ ūi ho̍kha̍p khí lâi ê tōachúi, he sī chi̍tê bānmi̍h ê goânthâu, póhō͘ iúⁿchhī bānmi̍h.
─2022, 02, 05 tī Lo̍kkáng
