《宋澤萊新著《天路拾穗》TOJ/台灣字版》 |
|
|
|
轉寄 |
Chútê 38:Sènglêng lāichū kah Sènglêng chhiongmóa
Pún bûn só͘ kóng ê "Sènglêng lāichū" sī teh chí Sènglêng éngchū tī sèngtô͘ sengkhu ni̍h lâi kóng ê, téchiām lāichū to̍h bô sǹg sī.
Sènglêng lāichū kah Sènglêng chhiongmóa bô kângkhoán. Sènglêng chhiongmóa sī chi̍t chióng te̍ksû chōngthài ê biâusu̍t, iā to̍h sī chi̍t chióng Sènglêng chhiongmóa tī sengkhu ni̍h ê hiānsiōng. I hián chhut tī sìntô͘ sengkhu téng ū nn̄g chióng chōnghóng:
Chi̍t chióng sī te̍ksû chōnghóng ê, ná chhinchhiūⁿ Sùtô͘ Hêngtoān 2:2~3 ê chit tōaⁿ kìchài, "hiônghiông, tùi thiⁿténg ū hiángsiaⁿ lo̍h lâi, kahná hi̍t chūn tōa hong chhoe kòe, chhiongmóa in só͘ chē ê chhùthe̍h; koh ū chhùichi̍h chhinchhiūⁿ hóeiām hiánhiān chhut lâi, hunkhui lak tī in ta̍k lâng ê thâukhak téng. In to̍h lóng hō͘ Sènglêng chhiongmóa, ànchiàu Sènglêng só͘ sù ê kháuchâi kóngkhí pa̍t kok ê ōe lâi." Chit sî, Sènglêng sī gōalâi ê, ētàng paukó tī lâng ê jio̍kthé, khòngchè sìntô͘ ê sinsim, sìntô͘ chiongkîbóe chin chūjiân chūchú kóngkhí honggiân lâi ā, la̍tthâu sī kiôngsè ê.
Chi̍t chióng sī pêngsiông chōngthài ê. He sī Sènglêng lâilîm liáuāu, tī lōechāi só͘ sánseng ê hílo̍k só͘ tòa lâi ê. Inūi ūsî hílo̍k seng koân, to̍h iông’ī tòa lâi Sènglêng chhiongmóa. Ná chhinchhiūⁿ Sùtô͘ Hêngtoān 〉13:52 só͘ kìchài ê, "bûntô͘ móasim hílo̍k, koh Sènglêng chhiongmóa", thongsiông che sī téchiām ê kámsiū.
Chit nn̄g chióng Sènglêng chhiongmóa m̄sī kútn̂g tiāⁿtiāⁿ lóng ū ê hiānsiōng; lán mā bô khólêng sîsîkhekkhek lóng hō͘ Sènglêng chhiongmóa, kású ánne, tiāⁿtio̍h ē hō͘ lâng chihchài bē tiâu, mā ē énghióng ji̍tsiông sengoa̍h ê chèngsiông ūnchok. M̄koh Sènglêng chhiongmóa sîsiông ē tòa lâi tōa sìnsim á sī kîtha insù ê lêngle̍k, só͘í chin chē thoântō lâng to̍h ǹgbāng "siôngsiông hō͘ Sènglêng chhiongmóa", sīmchì khǹg sìntô͘ mā tio̍h "siôngsiông hō͘ Sènglêng chhiongmóa".
M̄koh, Sènglêng lāichū leh? Sènglêng lāichū liáuāu, bô ittēng ē siôngsiông ū Sènglêng chhiongmóa ê hiānsiōng; ūsî simsū suibóng okchit, m̄koh iáu sī ē kámkak tio̍h Sènglêng lāichū, Sènglêng pēng bô līkhui lán ê sengkhu. Sènglêng lāichū koh khah sī chí chi̍tê sūsi̍t, to̍h sī Sènglêng íkeng éngchū tī sèngtô͘ sengkhu ni̍h ê sūsi̍t, i ē ínkhí sioliânsòa sinsim ê chhimkhek piànhòa, chìntián sī tn̂gkî koh chin bān. Tī siōng chákî "góa" kah "Sènglêng" ē hêngsêng chi̍t chióng hôhâi ê koanhē, ūsî chiâⁿchò chi̍t thé, hun bē chheng "góa" kah "Sènglêng" ê kàisòaⁿ, pêngsiông píkàu khah koân ê chêngsū to̍h sī "hílo̍k", píkàu khah pêngchēng ê chêngsū to̍h sī "pêngan", liântài iáu ū Sènglêng só͘ kiat ê kóechí ê chióngchióng iàusò͘; sòachiap Sènglêng ē chítō, bēnglēng sìntô͘ "góa" ittēng tio̍h jīnchōe hóekái, kiùchèng ài hoānchōe ê sèngchêng kah hêngûi, ánne thongkòe chēnghòa, to̍h ē tòa hō͘ sìntô͘ sinsim lióng hong bīn ê sèngkiat.
──2014, 08, 06 tī Lo̍kkáng