《宋澤萊新著《天路拾穗》TOJ/台灣字版》 |
 |
 |
|
 轉寄 |
Chútê 37：Sènglêng lāichū kah Sènglêng koànak
作者 Sòng Te̍klâi 2026.11.15
Chútê 37：Sènglêng lāichū kah Sènglêng koànak
Gê Tho̍ksiaⁿ tī "Chinlí ê Sènglêng" chit pún chheh ni̍h（chù 1）, kóng tio̍h Sènglêng tī lâng ê lāigōa nn̄g bīn teh kangchok. I kóng só͘ūi Sènglêng tī lâng lāibīn ê kangchok to̍h sī teh chí "Sènglêng lāichū" liáuāu só͘ sánseng ê 9 chióng Sènglêng kóechí ê iàusò͘, i ê bo̍ktek sī beh hō͘ lâng chiâⁿsèng. Kóng tio̍h Sènglêng tī lâng gōabīn ê kangchok to̍h sī teh chí "Sènglêng koànak" liáuāu só͘ sánseng ê sio̍klêng insù, iā to̍h sī hō͘ sìntô͘ ū 9 chióng insù ê lêngle̍k, i ê bo̍ktek tongjiân sī ūitio̍h thoânkàu chòkang, ná chhinchhiūⁿ Sùtô͘ Hêngtoān ni̍h Gō͘sûncheh só͘ hoatseng ê hitê kò͘sū. Gê Tho̍ksiaⁿ jīnûi chi̍tê Kitoktô nāsī ētàng ū "Sènglêng lāichū" ê chiâⁿsèng kengle̍k, koh ū "Sènglêng koànak" liáuāu ê sio̍klêng insù lêngle̍k, he sī "puttekliáu ê tāichì"!
I ánne kóng, "Só͘í tī Siniok tiong, lán khòaⁿ tio̍h Sènglêng nn̄g bīn ê kangchok,（1）I lîmkàu lâng ê sengkhu téng,（2）I tòa tī lâng lāibīn. I lîmkàu lâng sengkhu téng, sī ūitio̍h lêngle̍k, sînjiah kah kiànchèng. I tòa tī lâng lāibīn, sī hō͘ lâng sèngkiat. Sènglêng ê lāichū sī beh kā Kitok kiongèng hō͘ lán, hō͘ Kitok chiâⁿchò lán ê, hō͘ i chiâⁿchò lán ê sèⁿmiā, jîchhiáⁿ hō͘ lán ētàng kiat chhut chiâⁿsèng ê kóechí." Koh kóng, "Lán nā siôngsè khupia̍t téngbīn só͘ kóng ê lióngchiá, to̍h ē bêngpe̍k sī ánchóaⁿ chin chē koanhē Sènglêng ê koanliām sī chhògō͘ ê. Chin chē lâng lia̍hchún, chíiàu in ū kakī ê Gō͘sûncheh, in ê būntê to̍h ē káikoat. M̄koh chitmá lí íkeng tittio̍h lí ê Gō͘sûncheh, lí chiâⁿsèng ê būntê kám ū káikoat? I kám ū chhōa lí iâⁿkòe lí ê phîkhì à? He pēng bô káikoat iâⁿkòe chōe ê būntê. In hit chióng Gō͘sûncheh, kantaⁿ ū insù, bô kóechí."
Koh kóng, "Páulô khòaⁿkìⁿ Kolînto kàuhōe kongkéng ê sî, i bô kóng, ' Chia ê chênghêng chin hāi, lán ittēng tio̍h thêng lo̍h itchhè. ' chin chē modern phài（chù： engkai sī teh chí hokim phài）ê kàusu ē kā itchhè 'sio̍k jio̍kthé' ê mi̍hkiāⁿ thai tiāu. Páulô bô chiū ánne kā itchhè thai tiāu, khiok tòaji̍p chi̍tkóa mi̍hkiāⁿ lâi chò pênghêng. Kolîmto Chiânsu 3：16 kóng, ' Kám m̄chai lín sī SiōngChú ê tiān, SiōngChú ê lêng tòa tī lín lāibīn? ' Lín ittēng tio̍h ha̍ksi̍p, Sènglêng tī lín lāibīn, tòa tī lín lāibīn, sī siáⁿmi̍h ìsù."
Koh kóng, "Modern phài（chù：engkai sī teh chí hokim phài）ê kàusu kàutō lán kóng, 'Insù sī iùtī ê, lán sī sêngjîn, bô suiàu chhiūⁿ honggiân ánne ê chhitthô mi̍h à. Lán ê sìngióng pí hit kaitōaⁿ hiòng chêng ke chin chē, lán pí sùtô͘ in hiòng chêng ke chin chē, só͘í lán ài kā chiahê mi̍hkiāⁿ phah bô khì. ' lēnggōa chi̍t hongbīn, hit kóa chànsêng Sènglêng insù ê lâng, simlāi só͘ siūⁿ ê, tûliáu insù ígōa to̍h bô pa̍tê; in khinsī bô kângkhoán kengle̍k ê lâng, in kóng, 'Góa tī bó͘ nî bó͘ ji̍t, ū tittio̍h Sènglêng ê chìm. ' Chit nn̄g phài lóng sī m̄ tio̍h ê."
M̄koh, tī chòeāu, Gê Tho̍ksiaⁿ iáu sī kiôngtiāu "Sènglêng lāichū" ê chiâⁿsèng kengle̍k pí "Sènglêng koànak" liáuāu ê sio̍klêng insù lêngle̍k khah tiōngiàu. Ōaⁿ kù ōe lâi kóng, Kitoktô ê lāibīn siuióng iáu sī pí gōahián lêngle̍k koh khah tinkùi.
Tùi Gê Tho̍ksiaⁿ ê khòaⁿhoat, góa bô hoántùi ê ìkiàn, góa kámkak i kóng kah chin hó, m̄koh che sī ēng Kitoktô kòjîn ê līek lâi li̍plūn ê. Chóng sī, nāsī ūitio̍h thoânkàu iúlī tī thajîn, sio̍klêng insù ê lêngle̍k kahná koh khah tiōngiàu.
Gê Tho̍ksiaⁿ ê chit tōaⁿ bûnchiuⁿ mā hō͘ lán chaiiáⁿ, ū "Sènglêng lāichū" ê chiâⁿsèng kengle̍k ê Kitoktô, bô ittēng to̍h ū "Sènglêng koànak" ê sio̍klêng insù lêngle̍k; ū "Sènglêng koànak" ê sio̍klêng insù lêngle̍k ê Kitoktô, bô ittēng to̍h ū "Sènglêng lāichū" ê chiâⁿsèng kengle̍k. Chi̍tlāichi̍tgōa, lióngchiá sī oânchoân bô kângkhoán ê.
Chù 1：Beh tha̍k "Chinlí ê Sènglêng" chit pún chheh ê lâng, chhiáⁿ tiám ēkha bāngchí： https://www.churchinmarlboro.org/christdigest/NiTuoSheng/nituoshen/21.zldsl/211.shenling/chapter01.html#1 ──2014, 07, 27 tah tī Kitokkàu thongsìn
